Ripoht En Sounkalohk Kan En Wehio
“Ke Padikada Nempehn Telephone Sapwung”
NAN Johannesburg, South Africa, Leslie oh Caroline kin doadoahngki telephone pwehn kalohk ong aramas me neksangehr doadoahk (wasa ieu me aramas mah kan me “retired” de kommoaldiehr sang doadoahk kin mihmi ie) oh aramas sohte kak pedolong nan arail kehl. Ira diar aramas malaulau me mih nan imwarail oh pali laud kahng rong ira, eri, Caroline perenda ni ahnsou me lih emen a sapeng ih.
Caroline idek: “Mrs. B— met?”
Ngihl kadeko sapengki: “Soh. Ngehi Mrs. G—. Mwein ke padikadahr nempehn telephone sapwung.”
Ni Caroline a rong ngihl kadeko, e nda: “Eri, menlau mweidong ie ien kawehwe ong uhk dahme I men ndaiong Mrs. B—.” Ih eri doula oh ndaiong ih duwen kapai kan me Wehin Koht pahn wahdo. Mwurin ara koasoanepene me e pahn walahng nah brochure Dahme Koht Kupwurki Kitail en Wia?, Mrs. G— eri idek: “Eri, ia eden ahmw pelien lamalam?”
Caroline sapengki: “Kiht Sounkadehdehn Siohwa kan.”
Mrs. G— eri nda: “Eri, soh, I kahng amwail pelien lamalam! I sohte leme I pahn men tuhwong uhk.”
Caroline peki reh oh nda: “Ahpw Mrs. G— ni erein minit 20, I ehukihong uhk koapworopwor me keieu kaselel, me I kadehdehiong uhk sang nan Paipel duwen dahme Wehin Koht pahn wiahiong aramas ni ahnsou keren. Ke inenen perenki rong mepwukat oh ke pil mwahuki kalaudehla dahme ke esehier. Dahme ke uhdahn ese duwen Sounkadehdehn Siohwa kan? Ma ke soumwahuda, ke pahn kohla rehn sounwia misihn? Ke soh mweidohng ie ien kawehwehiong uhk dahme Sounkadehdehn Siohwa kan kin kamehlele?”
Liho nennenla ahnsoukis oh ih eri nda: “I leme ke pwung. E mwahu ken kohdo mahs. Ahpw, I men ken ese, ke sohte pahn kak wekid sang ie ahi pelien lamalam!”
Caroline sapeng: “Mrs. G—, I sohte kak wekiduhkala mehnda ma I pil mwahuki. Ihte Siohwa me pahn kak.”
Ni ahnsou me Caroline kohla reh pwehn kihla brochure, ara tuhpene inenen mwahu, oh Mrs. G— (Betty) pwungki me Caroline pahn pil ehu pwurodo. Ni ahnsou me Caroline pwurodo reh, Betty ndaiong Caroline me e ndaiong lien wasao me e kin koasoiong Sounkadehdehn Siohwa kan. Irail lingeringer oh nda: “Dahme ke wiewiahn? Aramas pwukan sohte kin kamehlele Sises!”
Caroline eri mwadangete katamanki Betty mouren ara koasoipene rahn teio duwen Wehin Koht.
Caroline idek reh: “Ihs me pahn wia Nanmwarkio?”
Betty sapengki: “Sises.”
Caroline eri nda: “Ehi, met me mehlel.” Ih eri doula oh kawehwehda me Sounkadehdehn Siohwa kan kin kamehlele me Sises iei sapwellimen Koht ohl, ahpw e sohte pahrekiong Koht oh pil e sohte wia kisehn “Trinity.”—Mark 13:32; Luk 22:42; Sohn 14:28.
Mwurin Caroline kohla rehn Betty pak kei, e sansal mwahu me edetehn Betty kin peren ahpw paliwere inenen soumwahu. Ni mehlel, e ahneki soumwahu en kanser oh e masak mehla. Betty wehkada: “I mentehno I rohng padahk pwukat sounpahr ekei samwalahr oko oh ngehi ahneki soangen pwoson me duwehte ahmwen.” Caroline eri kasalehong ih iren Paipel kan me kawehwehda me mehla kin duwehte meirkelik oh aramas kak mwuhr iasada sang mehla. (Sohn 11:11, 25) Met wia kangoang laud ong Betty, oh met e kin perenki onop Paipel kaukaule. Ihte me kin kak kasapwungehla en iang towehda mihding nan Kingdom Hall ma e kin soumwahu laud.
Caroline koasoia: “E inenen sansal ong ie me tohnleng kan me kin kaweid nan doadoahk wet. Caroline padikada ‘nempehn telephone sapwung’ oh uhd koasoiong Betty ahpw e imwila mwahu pwe Betty men rong oh, medewehla met, pwe ih sounpahr 89!”—Kaudiahl 14:6.