“Pwehki Sapwellimomwi Marain, Se Kak Kilang Marain”
MARAIN kin wia mehkot me kitail kalap sohte tehk lao lioal kin kunla oh ihmw koaros nan atail wasahn kousoan eri rotorotla. Ahpw, kitail pai, pwe atail “imwen lioal”—ketipin—sohte kak ohla. Oh pwehki marain en ketipin, kitail kak kilangki wasa, mwenge, esingek oh momour.
Pwehki marain kin kesempwal ohng momour en aramas, kitail dehr pwuriamweiki wadek en Senesis me marain pwarada nin tepin rahn en kepikpikdao. “Koht eri ketin mahsanih: ‘Marain en miehla.’ Eri, marain ahpw pwarada.” (Senesis 1:3) Ohl me kin lahn Koht me duwehte Nanmwarki Depit kin ahnsou koaros wauneki Siohwa me iei Ih me wia utupen mour oh marain. Depit ntingihdi: “Komwi iei utupen mour, oh pwehki sapwellimomwi marain, se kak kilang marain.”—Melkahka 36:9.
Mahsen en Depit mie wehwe ohng uhdahn marain oh marain ni karasaras. Encyclopædia Britannica kasalehda: “Marain, ni mehlel, iei me kin kahrehda aramas en kak kilang wasa.” E doula oh kapataiong: “Kaweid tohto kin lellahng mwahliel sang ni mesen aramas laud sang mehn doadoahk en paliwar teikan.” Pwehki pali laud en dahme kitail sukuhliki kin poahsoankihda kisakis en kak kilang wasa—oh met kin anahne marain pwehn kak wia mwahu ah doadoahk—marain pil kin doadoahk ni karasaras nan Pwuhk Sarawi.
Kahrehda, Sises mahsanih ong sapwellime tohnpadahk kan: “Ngehi me marain en sampah. Mehmen me pahn idawehniehdo pahn ahneki marain en mour, oh sohte pahn weweid nan rotorot.” (Sohn 8:12) Marain ni karasaras me Sises mahsanih wasaht iei mahsen en padahk mehlel me e kin ketin padahki, me kin kak kamarainihada nan madamadau oh mohngiong en irail me rongorong ih. Mwurin sounpahr tohto me sapwellimen Sises tohnpadahk ko mihmi nan rotorot en ngehn, met irail kakehr wehwehki sapwellimen Koht koasoandi ong aramas oh koapworopwor en Wehio. Met uhdahn wia “marain en mour en aramas,” pwehki loalokong wet kak kahluwalahng aramas ong mour soutuk. Sises kapakap ong Semeo oh mahsanih: “Met wehwehki mour soutuk: aramas akan en esehla oh loalokongkin komwihla, me komwihte Koht mehlel, oh pil esehla oh loalokongkin Sises Krais me komw ketin kadarodohr.” (Sohn 17:3) Kitail en kalahnganki—dehr mwamwahliki—marain en pali ngehn wet!