Soh Unsek En Paliwar Akan Sohte Kin Lipilipilki Aramas
CHRISTIAN, emen ohl me kin mihmi nan Aperika, sounpei kan koledi oh idingkihong ih en iang wiahla sounpei, ahpw e kahng pwehki e sohte pahrekiong ah kadeikpen loale me kaiahnda pohn Paipel. Sounpei kan wahla ih nan kelen sounpei ieu, oh mwurin arail keme ih rahn pahieu, emen irail eri kasikihdi ehu neh ko. Christian eri nantihla oh lel imwen wini, ahpw neho anahne en lopsang pahnangin pwukie. Nan pil ehu wehin Aperika, seri tikitik kan—nehrail de pil pehrail akan arail imwintihti kan kin lopukasang. Oh pil, sang Cambodia lel Balkans, pil sang Afghanistan lel Angola, pakudang tikitik kan me kin seredi nan pwehl kin kauwehla oh pil kaluwetala aramas sohte lipilipil me mah oh me pwulopwul kan.
Pil ehu me kin kauwehla aramas iei aksident kan oh pil soumwahu kan me duwehte soumwahu en suke. Oh pil, poisin akan nan wasahn kousoan kak kahrehda soh unsek en paliwar akan. Karasepe ehu, nan ekei wasahn kousoan limwahn kahnimw ieu nan Eastern Europe, seri tohto kin ipwidi oh sohte kumwut en apali pehrail. Kisin kunot kis te kin mweteudi sang ni tipwengen peh kohdi. Mehn kadehde kasalehda me met iei ohlahn nan nta kan me kin kohsang samin en wini suwed akan nan wehwe. Aramas ngeder me pehrail oh nehrail unsek ahpw ahneki soh unsek en paliwar duwehte mwoator de pil ehu kahpwal en paliwar. Ni mehlel, soh unsek en paliwar akan sohte kin lipilipilki ihs ihs.
Sohte lipilipil dahme wiahda, soh unsek en paliwar akan mehkot me kahpwal. Ni eh sounpahr 20, sang pwukie pali meing en neh en Junior kohdi lel ni patehn neh kohsang. Mwuri, e koasoia: “I ahnekihdi kahpwal en madamadau tohto. I kin kalap sengiseng ni ahi kin medewehla me neh pali meinget sohla pahn pwurehng miehla. I sehsehla dahme ien wia. Ahi lamalam sohla kin soandi.” Ahpw, mwuhr, ahn Junior madamadau wekila mehlel. E tepida onop Paipel oh sukuhliki soahng kan me kaidehn ihte sewese ih pwe en kak powehdi ah nsensuwed ahpw e pil kihong ih koapworopwor en ale peren ehu rahn pohn sampah wet. Ma mie soh unsek en paliwaromw, ke men iang ale soangen koapworopwor wet?
Ma iei, eri menlau wadek artikel en mwurin met. Se men kangoangehkin uhk ken rapahkihda iren Pwuhk Sarawi kan sang pein noumw Pwuhk Sarawi me kin wia mehn sawas pwe ken kak pein kilang dahme Sounkapikpatail kin kolokoliong irail akan me kin sukuhliki sapwellime koasoandi oh eri kapwungala arail mour pwehn pahrekiong dahme re sukuhliki.