Iaduwen Soh Unsek En Paliwar Akan Pahn Sohla
N NA, MEDEWEHLA mesen me maskun kan kilangada wasa, oh salengen me sohte rong wasa kan rongada ngihl koaros, lohn me lohteng kan kokoulki peren, oh nehn me mwoator akan kesihnenda oh kakehr alialu! Kitail koasoakoasoia kaidehn wiepen palien imwen wini, ahpw me pahn wia sang sapwellimen Koht reseu lap ong aramas. Paipel kohpada met: “Iei ahnsowo me maskun kan pahn pehdpeseng, oh me salengepon kan pahn rongada wasa. Me nehtuk kan pahn mwusikekda oh kahkahlek, oh me lohteng kan pahn ngisingiski ar peren.” (Aiseia 35:5, 6) Ahpw, iaduwen atail pahn uhdahn esehki me kokohp kapwuriamwei wet uhdahn pahn wiawi?
Keieu, nin doken Sises Krais a ketiket sampah, e ketin kamwahuwihala soangsoangen soumwahu koaros oh pil soh unsek en paliwar akan. Oh pil, pali laud en sapwellime manaman akan aramas tohto me kadehde—pil iangahki sapwellime imwintihti kan. Ni mehlel, mie pak me irail me kelikamwe ih kasawih mwahu sapwellime doadoahk en kamwahuwihala soumwahu pwe irail en kasapwunge sapwellime doadoahk. Ahpw, irail lingeringer pwe soahng koaros me re diar kamehlelehda sapwellime manaman. (Sohn 9:1, 5-34) Mwurin Sises wia pil ehu manaman, irail koasoia: “Dahme kitail pahn wia? Pwehki soangen kilel kan me ohl menet kin wiewia?” (Sohn 11:47) Aramas tikitik kan, sohte mwamwahleki pwe irail me tohto pwosonla Sises.—Sohn 2:23; 10:41, 42; 12:9-11.
Manaman kan me Sises Wia —Kilel Ehu en Kamwahulahn Soumwahu kan Sampah Pwon
Sapwellimen Sises manaman akan wia laud sang en kadehdehte me Sises iei Mesaia oh sapwellimen Koht ohl. Manaman pwukat kin wia poahsoanpen atail pwoson inou kan en Paipel, me iei aramas peik kan paliwarail kan pahn mwahu ni ahnsou kohkohdo. Sohte lipilipil soangen kahpwal en paliwar dah me mih rehn aramas, Sises kin kamwahuwihala ni aramas arail sohte kin pehm, oh sohte kin pwand, oh pil sohte pweipwei. Eri, iaduwen aramas kin mwekidki met? Madiu me pein kadehdehki mese kan oh mahsanih: “Pokon ahpw kin pwuriamweikihla ar kin kilangada duwen me lohteng kan ar kin lokaiahda, me poakolong kan ar mwahula, me nehtuk kan ar kin aluhki neh pokon, oh me maskun kan ar kin kilangada wasa; re ahpw kin kapikapingahki Koht en Israel.” (Madiu 15:30, 31) Ong aramas tohto me ahneki soh unsek en paliwar, ni arail kin rong met—arail koapworopwor kin kamwekidada arail madamadau oh pilen masarail en nsensuwed uhd welialihkihdi pilen masarail en peren.