Sapwellimen Sises Manaman Akan Dahme Ke Kak Sukuhliki?
ELE ke pahn pwuriamweiki esehda me dahme Pwuhk Sarawi mahsanih duwen mour en Sises ni ah ketiket sampah sohte kin doadoahngki lepin lokaiahn Krihk me wehwehki “manaman.” Lepin lokaiahn Krihk (dyʹna·mis) me ekei pak kawehwehiong “manaman” me kin wehwehki “kehl.” (Luk 8:46) E pil kin wehwehki “koahiek” de “doadoahk kehlail kan.”—Madiu 11:20; 25:15.
Pwuhk Sarawi sohte kin kawehwe me sapwellimen Sises manaman akan wia akmanaman kei de likamw kei mehnte kamwait aramas. Mehpwukat wia kasalepen “kehl roson en Koht,” duwehte ni ahnsou me Sises kausang emen pwutak ngehn saut emen. (Luk 9:37-43) Soangen doadoahk roson pwukat mehkot me sohte kak pahn Koht me Keieu Lapalap—“iei duwen lapalap en sapwellime manaman.” (Aiseia 40:26) Ni mehlel soh!
Nan pwuhken Rongamwahu kan kasalehda ahn Sises manaman mpen 35 me e ketin wiahda. Ahpw met sohte kasalehda manaman koaros me e ketin wiahda. Karasepe, Madiu 14:14 mahsanih: “E [Sises] mahsanih lapalahn pokon; e kupwurei irailla, oh ketin kamwahuwiahla arail soumwahu kan.” E sohte padahkiong kitail aramas soumwahu depe me e kamwahuwiahla ni ahnsowo.
Soangen doadoahk manaman pwukat wia mehkot kesempwal ong wia kadehdehpen me Sises iei sapwellimen Koht Ohl, oh iei ih me Mesaia me inoupe mie. Iren Pwuhk Sarawi kan kasalehda mwahu me kehl me pwilsang rehn Koht me kahrehiong Sises en kak wiahda manaman oko. Wahnpoaron Piter mahsaniheki duwen Sises me ih “ohlo me Koht ketin kasalehda ong weipokon sang ni doadoahk manaman akan, me kapwuriamwei kan, oh kilel akan me Koht wiahda nanpwungamwail ki limen Sises, nin duwen me pein kumwail eshier.”—Wiewia 2:22.
Sapwellimen Sises manaman akan kin wia kisehn mehn kadehde sapwellime padahk kan. Mark 1:21-27 kasalehda madamadau en pokono ong sapwellimen Sises padahk oh ehu sapwellime manaman akan. Mark 1:22 mahsanih me pokono “pwuriamweikihla duwen eh kin ketkihwei sapwellime padahk,” oh iretikitik 27 kasalehda me aramas akan “pwuriamweikihla” ni ah ketin kausasang ngehn saut emen. Koaros, sapwellimen Sises doadoahk manaman akan oh sapwellime padahk kin wia kadehdehpen me ih me Mesaia.
Kilelepen Me Sapwellimen Sises Manaman akan Uhdahn Mehlel
Dahme kitail kak esehki ni mehlel me sapwellimen Sises manaman akan mehkan me uhdahn wiawi oh mehlel? Tehk ekei kilel akan me kamehlelehda met.
Ni Sises ah kin wiahda doadoahk manaman akan, e sohte kin men ahdeki. E kin nantiong kadehdehiong aramas akan me Koht me ketin wiahda pwe kaping oh lingan en kohiong Ih. Mwohn a kamwahuwiahla ohl maskun emen Sises kadehdehiong me ah soumwahu pahn mwahula “pwe sapwellimen Koht doadoahk manaman akan en sansal.”—Sohn 9:1-3; 11:1-4.
Sohte kasarawi, wiepehieu de mwohmw ieu me pidada. Sises wiahda sapwellime doadoahk manaman akan wasa me aramas tohto akan udiahl oh sohte ekiek. E sohte kin doadoahngki dengki tohrohr, de wasa ieu me koasondi ong wia akmanaman de widing kan mehn kasalonge madamadau.—Mark 5:24-29; Luk 7:11-15.
Ekei ahnsou Sises kin pohnese pwoson en irail oko me kin ale kapai en sapwellime manaman akan. Ahpw ma aramas emen sohte ah pwoson, met sohte kin kahrehong Sises en sohte wia manaman. Ni ahnsou ehu me e ketiket nan Kapernium nan Kalili, “aramas akan wahdohng ih aramas tohto me ngehn saut tih pohrail; oh doadoahngki lokaia oh kausasang ngehn akan, oh e ketin kamwahuwiahla koaros me mih nan apwal.”—Madiu 8:16.
Sapwellimen Sises manaman akan wiawi pwehn kaitarala anahn en war mehlel ekei ahn aramas akan, kaidehn en kaitarala ahn aramas emen a men kilang ma mie ah manaman de soh. (Mark 10:46-52; Luk 23:8) Oh Sises sohte kin wiahda manaman akan pwehn ale wihn ieu sang ie.—Madiu 4:2-4; 10:8.
Ohlo me Wiahda Manaman akan
Keseupen sapwellimen Sises manaman akan sohte pahn unsekla ma e pahn dokedokehte ma iei uhdahn mehlel en manaman ekei met de soh. Ni ahnsou me Rongamwahu kan kadehdehda sapwellimen Sises doadoahk manaman akan, re kasalehda duwen ohl emen me sapwellimaniki pepehm loal oh limpoak me sohte emen pahrekiong, oh me e kin ketin nsenohkihla kamwahupen ienge aramas akan.
Tehk irair me pid aramas tokutok emen me kohdohng Sises oh ngidingid pekipek: “Maing, ma komw ketin kupwurki, komw kak ketin kamwakeleiehda.” Sises ketin “kupwurehla,” kapahwei lime kan oh sair aramas tokutoko, mahsanih: “Iei, I mwahuki. Nna, mwakelekelda.” Ahnsowohte ohlo mwahula. (Mark 1:40-42) Sises eri ni ahl wet me sapwellime wehwehki pepehm en aramas me kamwakid ih en ketin doadoahngki kehl me Koht ketkihong Ih oh Ih ketin wiahkihda manaman akan.
Mehn kasukuhl mwahu me kohsang sapwellimen Sises manaman akan me iei ah ketin “poakehla” oh wia mehkan pwe en sewese aramas akan. Ahpw, soangen manaman pwukat kaidehn mehn wiahte poadoapoad. “Sises Krais ketin duweduwehte, aio, rahnwet, oh pil kohkohlahte,” iei me Ipru 13:8 mahsanih. Met e ketin wia Nanmwarki men nanleng, onopadahr oh kak ketin doadoahngki kehl en wia manaman me Koht ketikihong ih me laudsang dahme e ketin wiahda ni a wia aramas nin sampah. Ahnsou keren Sises pahn ketin doadoahngki mehpwukat me kamwahuwihala ahn aramas peik kan soumwahu. Sounkadehdehn Siohwa kan pahn perenki sewese iuk en kalaudehla omw sukuhliki duwen kamwahu kaselel akan me pahn wiawi ni ahnsou kohkohdo.