Manaman akan Mehlel de Likamw?

MWAHNAKAPW men mwadangete tehkada kilel ieu me mihmi mwurin sidohsa me ntingo nda, “Manaman akan kin Wiawi​—Ke Nek Kalelapak Rehn Tohnleng kan.” Edetehn ih aramas poadidiong sarawi men, e sohte ese ia wehwehn met. Kilel me e wadeko wehwehki me aramas me tangatangahki weren nansapwo kin kamehlele wie manaman akan? De iaduwen​—⁠met kin wehwehki me aramas me wiahda kilelo kin kamwaniki pwe e sohte kamehlele wie manaman oh pil sohte kamehlele tohnleng?

Mwein ke pahn men ese dahme soun nting en German, Manfred Barthel, ntingihdi: “Manaman iei lepin lokaia ieu me kin mwadangete nekpeseng aramas me wadek pwuhk kan en wiahda pali riau me kin uhpene.” Irail akan me kin kamehlele manaman kin kamehlele me e kin kalap wiawi.a Karasepe, ripoht kasalehda me nan Greece nan pahr ekei samwalahr oko, aramas me kamehlele wie manaman akan koasoia me e kin wia pak ehu nan sounpwong ehu. Met me elehda emen kaun (bishop) en palien sarawi en Greek Orthodox Church en kalekehki aramas akan nda: “Aramas akan me kin kamehlele manaman akan kin kose me Koht, Maria, oh aramas sarawi kan kin duwehte aramas, a kaidehn duwehte ngehn akan. Aramas pwukat en dehr nohn likamwala nan arail madamadau.”

Nan ekei wehin sampah kan, me malaulaute me kin kamehlele manaman kan. Nin duwen roporop ieu nan Germany me wiawi nan pahr 2002 kasalehda, persent 71 en tohnwehio nda me manaman koasoi likamw ekei. Nanpwungen irail silikis ehu (1/3) en towe kan me kamehlele manaman, lih silimen me nda me re ale mahsen sang rehn Meipwon Maria. Sounpwong kei mwurin Maria ah dene e pwarohng irail​—iangahki tohnleng kan oh mwuroi men⁠—nuhspepa en Germany me ede Westfalenpost ripohtki: “Leledo met, mpen aramas en seilokodo 50,000​—⁠me rapahki dahme kak kamwahuwihala arail soumwahu kan​—⁠oh pil ekei aramas likin irail men rong duwen kasansal kan me lih oko kilang.” Pil aramas 10,000 kohla kilang ma Maria soh pahn uhd pwarehng irail. Aramas pil dene Meipwon Maria pwarohng irail nan Lourdes, France, nan pahr 1858, oh pil nan Fátima, Portugal, nan pahr 1917.

A Iaduwen Sarawi kan me Kaidehn Kristian?

Kamehlele manaman kan kin dierek kereniong nan pelien lamalam koaros. The Encyclopedia of Religion kawehwehda me irail me kauwada palien Buddhism, Christianity, oh Islam kin ahneki soangsoangen madamadau wekpeseng kan me pid manaman akan, ahpw e ntingihdi: “Poadoapoad en mwuhr akan me pid sarawi pwukat kasalehda ni sansal me manaman akan oh koasoipen manaman akan wia kiseh kesempwal ieu en ahn aramas emen oh mour en palien sarawi.” Mehn sawaspen kadehde wet koasoia me “pein Buddha ekei pak kin wiahda manaman akan.” Mwuhr, ni ahnsou me “sarawi en Buddhism kosoulahng China, misineri kan kin kalap wiahda manaman akan.”

Mwurinte pwuhk wet a koasoia duwen manaman pwukat, e uhd kaimwisekla: “Ele aramas sohte pahn kamehlele soangsoangen koasoi kan en manaman akan me wiawi me irail soun nting en pelien lamalam akan kin koasoia, ahpw koasoi pwukat kin poahsoankihda kahrepe mwahu pwe en kin kalinganahda Buddha, me dene e kak wiahda manaman ohng irail nah werek kan me kin loalopwoat ong ih.” Pwuhko pil kasalehda duwen Islam: “Pali moron en irail mehn Islam akan kin kasik me manaman pahn kin wiawihong irail. Irail kin nda me Muhammad kin kalap wia manaman akan nan wasahn kapokon akan pak tohto (hadīths). . . . Pil mwurin aramas sarawi kan arail mehla, irail pil kin wiahda manaman akan sang nan arail sousou kan pwehn sewese irail akan me kin lelepek, oh aramas akan kin pekipekiong aramas sarawi kan en sewese irail.”

Ahpw Iaduwen Manaman akan nan Palien Kristian?

Pali laud en irail akan me iangada palien Kristian arail kamehlele manaman kan kin wekpeseng. Ekei kamehlele me koasoi kan nan Paipel me pid manaman akan me Sises oh ladu en Koht akan me memour mwohn Krais wiahdahr me mehlel. Ahpw, me tohto pwungki dahme Martin Luther me tapiada palien Pros koasoia. The Encyclopedia of Religion koasoiahki ih nda: “Luther oh Calvin ira koaros ntingihdi me mwein ahnsoun wia manaman nekier oh aramas dehr kasik me re pahn pwurehng wiawi.” Pwuhko pil koasoia me palien sarawi en Kadohlik kolokolete arail kamehlele manaman akan “ni arail sohte songen kawehwehda iaduwen ahr kak wiawi.” Ahpw, “mehn Pros akan songosong en wehwehki duwen manaman akan oh irail eri kamehlelehier me mehkan me palien Kristian kin wia kin pali laud en ahnsou poahsoanda pohn nsenen emen emen oh Koht oh pil ngehn teikan sohte kin kaweid wiewiahn aramas akan.”

Meteikan me kose me irail Kristian kei, iangahki ekei kaunen lamalam akan, kin kelikamwe manaman akan me pwarada nan Paipel. Karasepe, unpwul en kisiniei me mih nan kisin tuhke me koasoiepen mih nan pwuhken Eksodus 3:1-5. Pwuhk ehu me ede “What the Bible Really Says” kawehwehda me semen en palien Pwuhk Sarawi en Sehmen tohto sohte kin kamehlele me manaman wet uhdahn mehlel. Irail eri kawehwe me dene met kin wia “karasaras ieu en pepehm nan loalen Moses ki nsensuwed me mih loale oh kin wie lullul nan kadeikpen loale.” Pwuhko pil nda me: “Umpwul en kisiniei wet kak wehwehki wahn rohs akan me kin masal pwehki marain en ketipin en pali ngehn ah kin lel.”

Soangen mwomwen kawehwe duwehte met sohte kin kak kaitarala ahn aramas madamadau. Kahrehda, dahme ke pahn kamehlele? E konehng kitail en kamehlele me manaman akan wiawi mahs? A iaduwen manaman akan nan atail ahnsou? Pwehki kitail sohte kak peidekiong tohnleng kan, eri ihs me kitail kak idek reh?

Dahme Paipel Kasalehda

Sohte aramas emen kak kelikamwe me ripoht en Paipel akan me kin kasalehda me Koht kin ketin wia mehkan me aramas sohte kak iang wia. Kitail wadek duwen Koht me mahsanih: “Komw ketin ketikihweisang sapwellimomwi aramas en Israel kan sang nan sapwen Isip, ni kilel oh manaman akan oh ki limomwi manaman oh komw kin ketin kapahwei limomwi ni irair kaloamw.” (Seremaia 32:⁠21, New World Translation) Kitail kak medewehla duwen wehi ieu me keieu kehlail ahnsowo sarohdi pwehki manaman en kalokolok eisek me lelohng irail me iangahki mehlahn mesenih kan. Mepwukat uhdahn manaman ekei!​—Eksodus, irelaud 7 lel 14.

Pahr 1,500 samwa mwuri, pwuhken Rongamwahu pahieu ntingihdi duwen manaman mpen 35 me Sises ketin wiahdahr. Ni mehlel, mahsen akan en soun nting en Rongamwahu kan kasalehda me Sises ketin wiahda manaman tohto sang dahme ntingdi nan Pwuhk Sarawi. Ripoht pwukat mehlel kei de likamw kei?b​—Madiu 9:35; Luk 9:11.

Ma e mehlel me Mahsen en Koht kin audaudki padahk mehlel kan, eri pahn mie kahrepe mwahu kitail en kamehlele manaman akan me ntingihdi loale. Paipel kin sansal mwahu ni ah wia ripoht en manaman akan me wiawihier kawao​—⁠manaman me pid kamwahuwihala soumwahu, kaiasada aramas, oh soangen manaman pwukat​—ahpw e pil kawehwehda mwahu me soangen manaman pwukat solahr kin wiawi.

[Nting tikitik me mi pahs]