“E Kahluwa Ie Limwahn Pihl Mwele”
DUWEN karakar en nan sapwen Paipel kan, sihpw akan kin anahne nimpil rahn koaros. Kahrehda, ehu kin doadoahk kesempwal ong silepen sihpw emen iei en kihong pihl ong nah pelin sihpw. Ekei ahnsou, silepen sihpw akan kin idipohng neirail sihpw akan pihl sang nan pwarer ah wudekihdiong nan kasak pwe sihpw akan en kak nimadahsang loale. (Senesis 29:1-3) Ahpw, keieu nan ahnsoun keteu, wasa kan limwahn kisin piletik kan oh pillap akan kin wia wasa meleilei, “wasahn kommoal me lomwolomw.”—Melkahka 23:2.
Sounsilepen sihpw koahiek emen anahne ese iawasa e kak diar pihl oh mahs en dihpw me pahn mwahu ohng nah sihpw akan. E loalokongki wasa pwukat pahn kak kolokoliong mour en nah sihpw kan. Depit, me ahnsou werei kin kahkahreseli pelin sihpw akan pohn uluhl kan nan Sudea, kin karasahiong sapwellimen Koht kaweid en pali ngehn me e duwehte silepen sihpw me kin kahre nah sihpw akan ong mohs en dihpw kaselel oh pihl me wia utupen mour. Nan ehu kawehwehn Pwuhk Sarawi, Depit mahsanih: “E kahluwa ie limwahn pihl mwele.”—Melkahka 23:1-3, New International Version.
Sounpahr kei mwuri, ki soukohp Esekiel, Siohwa doadoahngki pil ehu karasaras me duwehte. E ketin inoukihong sapwellime kan me e pahn ketikihirailpene sang nan sahpw akan me irail mwarakpeseng ie kan, duwehte silepen sihpw emen me kin rikpene nah sihpw akan. E inoukihong irail met: “I pahn wahirailodo . . . nan arail pwehl oh kamwenge irail pohn nahnahn Israel akan, limwahn piletik kan.”—Esekiel 34:13.
Siohwa Koht pil kin inenen nsenohki ketikihda pihl ni pali ngehn. Pwuhken Kaudiahl kin mahsanih me “pillap ehu en pilen komour” kin kusukus sang mwoalen Koht. (Kaudiahl 22:1) Luhk ehu eri kohwong aramas akan en nim pihl sang pillap. “Mehmen me inengieng a en nim pilen komour me sohte pweipwei.”—Kaudiahl 22:17.
Pilen komour karasaras wet kin wia kilelen sapwellimen Koht kisakis sapan en mour soutuk. Aramas koaros kak tepida nim pihl wet ni arail pahn ‘loalokongkihla Koht mehlel tehmeno oh pil ih me E ketin poaronehdo, Sises Krais.’—Sohn 17:3.