Peidek kan Sang Sounwadawad kan
• Lucifer iei ahd ehu me Paipel kin doadoahngki ong Sehdan?
Ahd wet Lucifer pwarada pak ehute nan Pwuhk Sarawi oh pil kaidehn kawehwehn Paipel koaros e mih loale. Karasepe, King James Version kasalehda nan Aiseia 14:12: “Kowe pwupwusangehr nanleng, O Lucifer, nein irair en menseng pwutak!”
Lepin lokaiahn Ipru me kawehwe “Lucifer” kin wehwehki “ih me lingaling.” Pwuhk en Septuagint kin doadoahngki lepin lokaiahn Krihk ieu me wehwehki “wahdo marain en menseng.” Kahrehda, ekei kawehwehn Pwuhk Sarawi ntingihdi wehwehn tepin lokaiahn Ipru me iei ”usuhn menseng” de “usuhn rahn.” Ahpw nein Jerome kawehwehn Latin me ede Vulgate doadoahngki “Lucifer” (soun wa marain), oh iei met me kahrehda lepin lokaia wet pil doadoahkehr nan soangsoangen kawehwehn Paipel teikan.
Ihs me Lucifer? Pwuloi pwukat: “ih me lingaling,” de “Lucifer,” kin dierek nan mahsen en kokohp en Aiseia me kohwong mehn Israel oko en kin doadoahngki ni “lokaiahn karasaras ohng nanmwarki en Papilon.” Kahrehda, e wia kisehn mahsen kei me dokedoke kaundahn Papilon, me tepikihda Nepukadnesar. Oh pil, kasalepen mahsen pwukat “ih me lingaling” kin wiawihiong aramas a kaidehn ngehn iei met: “Ke pahn kohdihla pah nan Sheol.” Lepin lokaia Sheol iei sousou en aramas—kaidehn wasa ieu me Sehdan me Tepil kin kousoan ie. Oh pil, irail oko me kin kilang Lucifer a kohdihla nan irair wet eri idek: “Iei met ohlo me kin kamasakada sampah?” E sansal mwahu me “Lucifer” kin wehwehki aramas emen, kaidehn ngehn ehu.—Aiseia 14:4, 15, 16.
Dahme kahrehda soangen mwomwen ahd lingan wiawihkihong kaundahn Papilon? Kitail anahne pohnese me nanmwarki Papilon ahnsowo adaneki “ih me lingaling” ni ahnsou me eh kaunda ohlahr oh met wiawi ni elen kapailok oh kepit. (Aiseia 14:3) Sang ni pohnmwahso iei me kamwekid nanmwarki en Papilon kan en kasapwilada pein irail pohnangin irail teikan me kousoan limwah kan. Ah pohnmwahso me inenen laud mehlel me kahrehda e mwomwehdahr en suwei oh nda: “I pahn kohdahlahng nanleng. Pohn sapwellimen Koht usu kan I pahn kihong ahi mwoalen nanmwarki, oh I pahn mwohndiong pohn nahna en mihding, oh wasa keieu doh ni pali epeng. . . . I pahn wiakiniehla ien pahrekiong Me Keieu Ileile.”—Aiseia 14:13, 14.
“Sapwellimen Koht usu kan” iei irail nanmwarki kan me wia kadaudok en Depit. (Nempe 24:17) Sang Depit kohkohdo, “usu” pwukat kin kaunda nan Nahna Zion. Mwurin Solomon kauwada Tehnpas en kaudoko nan Serusalem, ahdo Zion wiahla eden kahnimwo pwon. Nin duwen Kosonned en Moses kasalehda, ohl koaros en Israel kehkehlik kohwong irail en kohwei Zion pak siluh nan pahr ehu koaros. Kahrehda, wasao wiahla “nahna en mihding.” Pwehki Nepukadnesar kasalehda me e men kalowehdi nanmwarki en Sudea kan oh kihsang irail sang pohn nahna wet, e koasoia me e pahn kihda ih pohn “usu” pwukat. E sohte pohnesehki me Siohwa me ketikihong kehl en kalowehdi nanmwarki pwukat. Eri, ahnsou me Koht lopukedi manaman en kaundahn Papilon iei ahnsowo me kepit kohwong me dene “ih me lingaling.”
Pohnmwahso en kaundahn Papilon akan kin wia kasalepen mehlel en lamalam en “koht en koasoandi wet”—Sehdan me Tepil. (2 Korint 4:4) E pil kin inangih manaman oh kin men en kesepwilda oh mihla pohnangin Siohwa Koht. Ahpw, Lucifer kaidehn iei ahd me Pwuhk Sarawi kihong Sehdan.