Koht Pilada Depit

KE KAK kilang dahme wiawi? Pwutako doarehla kisin sihpwo sang pehro. Pehro tangahki kisin sihpw pwulopwulo pwen kangala. Ahpw pwutako pwakihdi, oh doarehla kisin sihpwo sang nan auwen pehro. Oh ni ansou me pehro pirekekdo pwen peiong pwutako, pwutako poakih pehro oh kamehla! Pil mie ehu ansou me e doarehla emen sihpw sang emen laion. Kaidehn mehlel pwutak menet kommwad? Ke ese ihs ih?

Pwutak pwulopwulo adaneki Depit. E kin mihmi nan kahnihmwen Pedlehem. Ah pahpa kalap adaneki Oped, nain Ruhd oh Poas. Ke tamatamante ira? Oh semen Depit adaneki Sehsi. Depit kin apwahpwali nain seme sihpw ko. Depit ipwidi sounpahr 10 mwehrin Siohwa pilada Saul en nanmwahrki.

Ansou lelehr Siohwa mahsanih ong Samuel: ‘Alehda leh tohrohro oh kohla nan ihmwen Sehsi nan Pedlehem. I piladahr emen nah pwutak ko en nanmwahrki.’ Ni ansou me Samuel kilang nain Sehsi pwutak me keieu laud, e indaiong pein ih: ‘Iet menet me Siohwa piladahr.’ Ahpw Siohwa padahkiong ih: ‘Dehr kilang wen ah reirei oh masamwahu. Kaidehn ih me I pilada pwen nanmwahrki.’

Sehsi eri likweri nah pwutak Apinadap oh kahrehdo ih rehn Samuel. Ahpw Samuel inda: ‘Soh, Siohwa sohte pilada menet.’ Mwuhri, Sehsi pil wahdo nah pwutak Sammah. ‘Soh, Siohwa pil sohte pilada menet,’ Samuel inda. Sehsi wahdo nah pwutak isimen ko ong Samuel, ahpw Siohwa sohte pilada emen irail. ‘Ihte noumw pwutak kan met?’ Samuel idek.

‘Mie emen me keieu tikitik,’ Sehsi inda. ‘Ahpw e mihmi nan wel apwahpwali sihpw kan.’ Ni ansou me irail kahrehdo Depit, Samuel kilangehr me pwutako inenen masamwahu. ‘Iet ih,’ Siohwa mahsanih. ‘Wudekihdi leh pohn menet.’ Oh ihme Samuel wiahdahr. Ansou kohkohwong me Depit pahn wiahla nanmwahrki en Israel.