Keieun Nanmwarki en Israel

Siohwa ketikihongehr mehn Israel kan sounkopwung kan ren kahluwa irail, ahpw irail men ahneki nanmwarki. Irail eri ndaiong Samuel: ‘Wehi koaros me karanih kiht mie arail nanmwarki. Se pil men iang ahneki nanmwarki.’ Samuel pehm me met sapwung, ih eri kapakapkihong Siohwa duwen met. Siohwa ahpw mahsanihong: ‘Kaidehn kowe me aramas akan soikalahr. Ngehi me re soikalahr. Padahkihong irail me re kak ahneki nanmwarki ahpw nanmwarkio pahn kaunirailda oh pahn kihsang irail soahng tohto.’ Mendahki met aramas ako nda: ‘Se sohte katapanki. Se anahne emen nanmwarki!’

Siohwa eri mahsanihong Samuel me ohl emen me adaneki Sohl me pahn wia keieun nanmwarki. Ni ahnsou me Sohl mwemweitla rehn Samuel nan Rama, Samuel keiekihdi leh pohn moangen Sohlo nin duwen nanmwarki.

Samuel eri ekerpene mehn Israel kan pwehn kasalehiong irail arail nanmwarki kapwo. Ahpw irail sohte kak kilangada Sohl. Ke ese dahme kahrehda? Pwehki e wie rukuruk nanpwungen kepwe ko. Ni ahnsou me irail diarada ih, irail wahieila oh kasihnenihada nanpwungen aramas ako. Sohl reireisang irail koaros, oh e uhdahn masamwahu. Samuel eri nda: ‘Kumwail kilang, ih aramas menet me Siohwa ketin piladahr.’ Aramas ako ahpw werkihda: ‘At nanmwarki en mour werei!’

Nin tapio Nanmwarki Sohl kin rong Samuel oh peikiong Siohwa. Ahpw kedekedeo e wekila. Karasepe, Sohl sohte mweimwei en wiahda meirong kan. Samuel, sapwellimen Siohwa soukohpo, ndaiong en awih lao e kohdo. Ahpw Samuel pwand en kohdo. Eri Sohl medewehda en pein wiahda meirongo. Dahme Samuel wia? E ndaiong Sohl: ‘E sapwung ahmw sapeikiong Siohwa.’ Ia duwe, Sohl pahn kak sukuhlkihdi mehkot sang eh sapwungo?

Mwuhr, ni ahnsou me Sohl kolahng mahweniong mehn Amalek kan, Samuel ndaiong Sohl en dehr mweidohng emen en pitila. Ahpw Sohl pilada me e sohte pahn kemehla Nanmwarki Akak. Siohwa eri mahsanihong Samuel: ‘Sohl keseielahr, oh e sohte kin rong ie.’ Samuel uhdahn nsensuwedkihla, oh ndaiong Sohl: ‘Pwehki omw solahr peikiong Siohwa, e pahn ketin pilada emen nanmwarki tohrohr.’ Ni Samuel eh pirekeksang pwehn kohkohla, Sohl ahpw koledi ih oh imwin en Samuel likouo pa teipeseng. Samuel eri ndaiong Sohl: ‘Siohwa ketin tehrasang komwi wehi wet.’ Siohwa pahn ketikihong wehi wet ong emen tohrohr me pahn poakohng oh peikiong ih.