Sises Ketin Pilada Sohl

Sohl wia towe mehlel en Rom oh e ipwidi nan Tarsus. Ih Parisi men me kin wehwehki mwahu Kosonned en mehn Suhs kan, oh e kin kailongki Kristian kan. E kin wurahdekiei Kristian ohl oh lih akan likin imwarail kan oh keseirailong nan imweteng. E pil kesikesihnen oh kilikilang pwihnen aramas lingeringer ehu me wie katekate tohnpadahk Stipen lao e mehla.

Ahpw Sohl sohte itarkihte eh kin salihedi Kristian kan nan Serusalem. E pekihda rehn samworo lapalapo en kadarala ih nan kahnimw en Damaskus pwehn kak parokedi Kristian kan wasao. Ni Sohl eh kerenlahng kahnimwo, marain lingaling ehu pa pwarada oh kapilpene, ih eri pwupwudiong nanpwelo. E rongada ngihl ehu me mahsanih: ‘Sohl, dahme kahrehda ke kin kalokaloke ie?’ Sohl eri sapeng nda: ‘Ihs komwi?’ Ngihlo ahpw sapeng, mahsanih: ‘Ngehi Sises. Kohla Damaskus, oh ke pahn esehda dahme ke pahn wia.’ Ni ahnsowohte Sohl maskunla, oh emen anahne kol peho kahrehlongala nan kahnimwo.

Mie Kristian lelepek men me adaneki Ananaias nan Damaskus. Sises ketin mahsanihong ohlo nan kasansal ehu: ‘Kohla ni imwen Sudaso nan ahl me adaneki Inen, oh rapahki Sohl.’ Ananaias eri nda: ‘Maing ei Kaun, I ese soahng koaros me pid duwen ohlo! E kin kesehlong sapwellimomwi tohnpadahk kan nan imweteng!’ Ahpw Sises mahsanihong: ‘Kohla reh. I piladahr Sohl en kalohki rongamwahwo nan sahpw tohto.’

Ananaias eri diarada Sohl oh ndaiong ih: ‘Riei Sohl, Sises ketin kadariedohr pwe ken kak pwurehng kilangada wasa.’ Ni ahnsowohte, Sohl kakehr pwurehng kilang wasa. E sukuhlki duwen Sises oh wiahla sapwellime tohnpadahk. Met ni Sohl eh papidaislahr nin duwen Kristian men, e tepida iang rie Kristian teikan kalohkseli nan sinakoke kan. Ke kak medewehla ia uwen mehn Suhs ko ar pwuriamweila ni ar kilang Sohl eh kin padapadahkihong aramas akan duwen Sises? Irail kin nda: ‘Kaidehn ih ohlohte met me kin parokedi sapwellimen Sises tohnpadahk kan?’

Erein sounpar siluh, Sohl kin kalohk ong aramas akan me kin mihmi nan Damaskus. Mehn Suhs kan kailongkihla Sohl oh irail koasoanehdi en kemehla. Ahpw Kristian ko esehda met oh irail sewese kapitala Sohl. Irail kihong ih nan kopwou ehu oh pirehiong sahl ni kopwouo oh kadaridi sang pohn kehlo.

Ni ahnsou me Sohl kohla Serusalem, e song en iang rie Kristian ko wasao. Ahpw Kristian en wasao masak Sohl. Tohnpadahk kadek men me adaneki Parnapas wahla Sohl rehn wahnpoaron ko oh kamehlelehiong irail me Sohl uhdahn wekila. Sohl eri tepida iang mwomwohdisohn Serusalem oh ngoangki kalohkiseli rongamwahwo. Mwuhr, e adanekihla Pohl.