Aramas Me Kin Wia Me Suwed Kak Wekila?

ESOU pahn mwahu ma aramas koaros kin wia me mwahu?— Ahpw sohte me kin wia me mwahu ahnsou koaros. Ke ese dahme kahrehda kitail koaros kin wia me suwed ekei pak, mendahki atail kin men wia me mwahu?— Pwehki kitail koaros sohsohki dihp. Ahpw ekei aramas kin wiahda soahng suwed tohto. Irail kin kailongki aramas oh pil kin men kamedekih meteikan. Ke leme irail kak wekila oh sukuhlki wia me mwahu?—

Kilang ohl menet, e apwahpwalih likoun liki en aramas me kate Stipen nan kilel wet. Ede ni lokaiahn Ipru iei Sohl ahpw ede ni lokaiahn Rom iei Pohl. E peren pwehki Stipen me wia tohnpadahk en Sounpadahk Lapalapo kamakamala. Kita pahn kilang dahme kahrehda Sohl kin wiahki soahng suwed pwukat.

Sohl kin iang pelien lamalam en mehn Suhs me adaneki Parisi. Parisi ko ese Mahsen en Koht ahpw ekei arail kaunen lamalam kan kin pein wiahda arail padahk kei. Parisi ko kin kesempwalki padahk pwukat laudsang Mahsen en Koht. Met kahrehda Sohl kin wia me suwed.

Sohl mihmi nan Serusalem ni ahnsou me Stipen selidi mwo. Ekei sounkopwung en mwoalen kopwung me Stipen wisikla ie iei Parisi kei. Stipen sohte masepwehkada mendahki irail kin nda soahng suwed kan duwen ih. Stipen eimahda oh wia kadehde mwahu ong sounkopwung ko duwen Siohwa oh Sises.

Ahpw sounkopwung ko sohte pwungki dahme re rong. Irail esehier soahng tohto duwen Sises. Ni mehlel mwowe ekis, irail koasoanehdi Sises en kamakamala! Ahpw mwurin mwo, Siohwa ketikihdahla Sises nanleng. Sounkopwung ko sohte wekila, irail kin kalkalokehte sapwellimen Sises tohnpadahk ko.

Sounkopwung ko koledi Stipen oh keseieila likin kanihmwo. Irail wokiehdi ih oh kate ih. Ke kak kilang nan kilel wet me Sohl mihmi wasao oh e kilang dahme wiawi. E medewe me e pwung en kemehla Stipen.

Ke ese dahme kahrehda Sohl ahneki soangen madamadau wet?— Erein eh mour pwon e wia Parisi men oh e kin kamehlele me padahk en Parisi me pwung. E kin wiahki me kaunen Parisi ko mehn kahlemeng mwahu kei kahrehda e kin alasang irail.​—Wiewia 7:54-60.

Mwurin Stipen eh kamakamala, dahme Sohl wia?— E kin song en kemehla luhwen sapwellimen Sises tohnpadahk ko! E kin kohla nan imwarail kan oh wurahdekiei ohl oh lih akan. Oh e kin keseirailong nan imweteng. Tohnpadahk tohto anahne tangasang Serusalem ahpw re sohte uhdihsang arail kalohki duwen Sises.​—Wiewia 8:1-4.

Met kalaudehla en Sohl eh kailongki sapwellimen Sises tohnpadahk ko. E ahpw kohla rehn Samworo Lapalap Kaiapas oh ale kisin likoun mweimwei pwehn kak salihedi Kristian akan nan kahnimw en Damaskus. Sohl men salihiraildi oh wairailla Serusalem pwe irail en kalokolok. Ahpw ni eh kohkohlahng Damaskus, mehkot kapwuriamwei wiawi.

Marain ehu dakodo sang nanleng, oh ngihl ehu mahsanih: “Sohl, Sohl, dahme ke kin kemekemehkin ie?” Sises me mahmahsen sang nanleng! Maraino inenen lingaling kahrehda Sohl eh maskunla. Irail ko me iang Sohl seiseiloak kahrehla ih Damaskus.

Mwurin rahn siluh, Sises ketin pwarohng emen sapwellime tohnpadahk me adaneki Ananaias ni kasansal ehu nan Damaskus. Sises mahsanihong Ananaias en kohla rehn Sohl oh kamwahwihala eh maskun oh koasoiong ih. Sohl pwungki dahme Ananaias padahkihong ih duwen me mehlel me pid Sises. E pwurehng kilangada wasa. Elen eh mour pwon wekila oh e wiahla emen ladu lelepek en Koht.​—Wiewia 9:1-22.

Eri, ke wehwehkidahr dahme kahrehda Sohl kin wia me suwed mahso?— Met pwehki e kin sukuhlki soahng kan me sohte pwung. E kin idawehn aramas me sohte kin lelepek ong Koht. E kin iang pwihn en aramas ehu me kin kesempwalki lamalam en aramas laud sang Mahsen en Koht. Ahpw dahme kahrehda Sohl wekidala eh mour oh tepida wia me mwahu mendahki Parisi teikan arail kaukaule uhwong Koht?— Met pwehki Sohl sohte uhdahn kailongki padahk mehlel. Eri ni eh sukuhlkier dahme mehlel, e peikiong.

Ke ese ihs me Sohl uhd wiahla mwuhr?— E wiahla wahnpoaron Pohl, emen wahnpoaron en Sises. Pil tamataman me Pohl ntingihdi pwuhk tohto en Paipel sang meteikan.

Mie aramas tohto me duwehte Sohl me kak wekila. Ahpw met sohte mengei pwehki mie emen me kin doadoahk laud pwehn kahrehda aramas en wiahda me suwed. Ke ese ihs mwo?— Sises pil mahsanih duwen menet ahnsou me e ketin pwarohng Sohl nan ahl me kohlahng Damaskus. E mahsanihong Sohl sang nanleng: ‘I pahn kadarowohng uhk aramas akan pwe ken kapehdpeseng masarail kan, oh kahreiraildo sang nan rotorot ong nan marain, oh pil sang nan manaman en Sehdan ong rehn Koht.’​—Wiewia 26:17, 18.

Ei, iei Sehdan me Tepil me kin nannanti pwehn kahrehiong aramas koaros en wia me suwed. Ke kin apwalki wia me mwahu ekei pak?— Kitail koaros kin. Sehdan kin kahrehiong eh apwal. Ahpw pil mie ehu kahrepen eh sohte kin kalapw mengei en wia dahme pwung. Ke ese ia kahrepeo?— Met pwehki kitail kin sohsohki dihp.

Dihp me kin kalapw kahrehda e mengei ong kitail en wia me suwed ah kaidehn me mwahu. Eri dahme kitail anahne wia?— Kitail anahne nannanti en wia dahme pwung. Ni atail kin wia met, kitail kak kamehlele me Sises pahn ketin sewese kitail pwehki e kin ketin poakohng kitail.

Ni en Sises ketiket sampah, e kin ketin kasalehda me e kin ketin poakohng aramas me kin wia me suwed mahso ahpw met irail wekila. E mwahngih ia uwen eh apwal ong irail en wekila. Karasepe, mie lih akan me kin wendi rehn ohl tohto. Met uhdahn suwed. Paipel kin kahdaneki soangen lih pwukat lih en netiki paliwere.

Ehu ahnsou, mie emen lih me pil kin netiki paliwere rongada duwen Sises. E kohdo ni imwen emen Parisi, wasa me Sises ketiket ie. E keiehki leh nehn Sises oh doadoahngki pitenmoange pwehn limwihekihsang pilen mese me keredi pohn nehn Sises. E uhdahn koluhkihla dipe ko, kahrehda Sises ketin mahkohng ih. Ahpw Parisi ko sohte lemeleme me e konehng en ale mahkpen dipe ko.​—Luk 7:36-50.

Ke ese dahme Sises mahsanihong ekei Parisi ko ni ehu ahnsou tohrohr?— E mahsanih: “Lih tiahk suwed kan pahn tiengla mwohmwail pedolong nan Wehin Koht.” (Madiu 21:31) Sises mahsanih met pwehki lih pwukat pwoson ih oh irail wekidala arail elen mour suwed akan. Ahpw Parisi ko kaukaulehte wia me suwed ong sapwellimen Sises tohnpadahk ko.

Eri ma Paipel kin kasalehda me dahme kitail kin wia me suwed, kitail anahne wekila. Oh ni atail kin esehla dahme Siohwa kupwurki kitail en wia, kitail anahne nantihong wia. Eri Siohwa pahn ketin perenki kitail oh ketikihong kitail mour soutuk.