Dahme Kahrehda E Apwal En Wia Me Mwahu?

IHS me peren ni en Sohl eh kin wiahda me suwed?— Sehdan me Tepil. Oh kaunen pelien lamalam en Suhs akan pil kin iang peren. Eri ni ahnsou me Sohl wiahla emen tohnpadahk en Sounpadahk Lapalapo oh aramas tepida likwerihki Pohl, irail kaunen pelien lamalam pwukat tepida kailongkihla ih. Eri ke kak wehwehki dahme kahrehda e apwal ong sapwellimen Sises tohnpadahk men en wia me mwahu?—

Ehu pako, samworo lapalap me adaneki Ananaias padahkihong aramas oko en pohr mesen Pohl. E pil song en salihedi Pohl. Pohl lokolok laud ni eh wiahla sapwellimen Sises tohnpadahk. Karasepe, aramas suwed kei keme Pohl oh irail katehki ih lapalahn takai kei pwehn kemehla.​—Wiewia 23:1, 2; 2 Kor. 11:24, 25.

Aramas tohto pahn song en kahrehiong kitail en wia soahng kan me kin kansensuwedih Koht. Eri, medewe duwen peidek pwukat: Ia uwen ahmw kin poakohng dahme mwahu? Ke uhdahn poakohng wia me mwahu me kahrehda ke pahn wia me mwahu mendahte ma meteikan pahn kailongkinuhkala? Ke sou pahn anahne eimah pwehn wia me mwahu?—

Mwein ke pahn kin medewe, ‘Dahme kahrehda aramas kin kailongkin kitail pwehki kitail kin wia me mwahu? E sou konehng ren peren?’ Ih me ke pahn medewe. Aramas akan kin kalapw perenki Sises pwehki soahng mwahu kan me e ketin wiahda. Ehu pako, aramas koaros nan kahnimw ehu pokonpene ni wenihmw en ihmw me e ketiket ie. Irail kohdo mwo pwehki Sises kin ketin kamwahwihala me soumwahu kan.​—Mark 1:33.

Ahpw ekei pak aramas akan sohte kin pwungki dahme Sises kin ketin padahngki. Mendahki ahnsou koaros e kin ketin padahngki dahme pwung, ahpw irail sohte kin pwungki. Ekei kin kasalehda arail uhdahn kailongki ih pwehki e kin ketin mahsanih dahme mehlel. Met wiawi rahn ehu nan Nasaret, kahnimw me Sises ketin keirda ie. E ketilong nan Sinakoke, wasa me mehn Suhs akan kin kohpene ie pwehn kaudokiong Koht.

Sises ketikihda padahk kaselel ehu wasao sang nan Paipel. Nin tapio, aramas ko pwungki. Irail pwuriamweikihla mahsen kaselel ko me e mahsanih. E apwal ong irail en kamehlele me iei ih mwahnakapw me tikida nan pein arail kahnimwo.

Ahpw Sises pil mahsanih mehkot tohrohr. E mahsanih duwen ahnsou me Koht ketin kasalehda me e kupwurki aramas akan me kaidehn mehn Suhs. Ni ahnsou me Sises mahsanih met, tohn sinakokeo lingeringerda. Ke ese dahme kahrehda?— Pwehki irail kin medemedewe me irail kelehpw me Koht kupwurki. Irail kin medewe me irail mwahusang meteikan. Kahrehda irail kailongki Sises pwehki dahme e mahsanih. Ke ese dahme irail song en wiahiong ih?—

Paipel mahsanih: ‘Irail eri koledi Sises oh wurahdekieisang nan kahnimwo. Irail wahlahng ni keilen dohlo pwe ren sikendilahng pah oh kemehla ih. Ahpw Sises ketin keidte nanpwungarail, ketiketla sang irail.’​—Luk 4:16-30.

Ma met wiawihong uhk, ke pahn kak pwurehng pwurala oh koasoiaiong aramas ko duwen Koht?— Ke sou pahn anahne eimah?— Eri, mwurin sounpar ehu, Sises pwurehng ketila Nasaret. Paipel mahsanih: “E ahpw ketin kawehwehda mahsen en Koht nan arail sinakokeo.” E sohte ketin uhdihsang padapadahngki me mehlel pwehki eh masak aramas me sohte kin poakohng Koht.​—Madiu 13:54.

Pil ehu rahn tohrohr iei rahnen sapad ehu, Sises ketiket ehu wasa me ohl peh mwoator men mihmi ie. Sises sapwellimaniki manaman me kohsang rehn Koht pwehn kamwahwihala ohlo. Ahpw ekei aramas me mi wasao kin song en uhwong Sises. Dahme Sounpadahk Lapalapo pahn wia?— Keieu e ketin idek rehrail: ‘Ma mie noumw sihpw men me pwupwudiong nan pwoahr loal ehu rahnen Sapad, ke sou pahn pwekadahsang nan pwoahro?’

Ei, irail pahn pwekada sihpwo mendahki rahnen Sapad ehu, iei rahn me irail anahne kommoal. Eri Sises mahsanih: ‘E mwahu en sewese aramas emen rahnen Sapad, pwehki aramas kesempwalsang sihpw!’ E inenen sansal me Sises anahne sewese ohl menet ni eh ketin kamwahwihala ih.

Sises mahsanihong ohlo en kapahla peho. Ahnsowohte peho mwahula. Ohlo uhdahn perenda! Ahpw ia duwen aramas teikan? Irail pil iang perenda?— Soh. Arail kailongki Sises laudla sang mahs. Irail kohieila oh koasoanehdi en kemehla ih!​—Madiu 12:9-14.

Pil duwehte rahnwet. Sohte lipilipil dahme kitail wia, kitail sohte kak kaperenda aramas koaros. Kahrehda kitail anahne pilada ihs me kitail uhdahn men kaperenih. Ma kitail men kaperenda Siohwa Koht oh sapwellime Ohl Sises Krais, eri kitail anahne ahnsou koaros wia dahme ira kupwurki. Ahpw ni atail pahn wia met, ihs me pahn kailongki kitail? Ihs me pahn kahrehda e apwal ong kitail en wia dahme mwahu?—

Sehdan me Tepil. Oh ihs me pil pahn iang?— Irail kan me Tepil pitihedier kahrehda irail en kamehlele soahng sapwung kan. Sises mahsanihong kaunen pelien lamalam kan: “Kumwail kadaudok en Tepil, pwehki iei ih samamwail, oh kumwail kin nantihong kapwaiada mehkan me samamwailo kin inengieng.”​—Sohn 8:44.

Mie aramas tohto me Tepil kin perenki. Sises kin ketin kahdaneki irail “sampah.” Dahme ke leme lepin lokaia “sampah” kin wehwehki?— Kita kak kilang Sohn 15:19. Sises mahsanih wasaht: “Ma kumwail kisehn sampah wet, eri, sampah wet pahn poakohng kumwail duwehte eh kin poakohng nah kan. A I pilkumwailda sang nin sampah; eri, kaidehn kumwail kisehn sampah. Iei kahrepen en sampah eh kin kailongkin kumwail.”

Eri, sampah me kin kailongki sapwellimen Sises tohnpadahk kan kin oarepene aramas koaros me kaidehn sapwellime tohnpadahk kan. Dahme kahrehda sampah kin kailongki sapwellimen Sises tohnpadahk kan?— Medewe duwen met. Ihs me kaunen sampah wet?— Paipel mahsanih: “Sampah unsek mi pahn manaman en Me Suwedo.” Me suwedo iei Sehdan me Tepil.​—1 Sohn 5:19.

Eri, ke kak kilang dahme kahrehda e apwal en wia me mwahu?— Pwehki Sehdan oh eh sampah me kahrehda e kin apwal. Ahpw pil mie ehu kahrepe. Ke tamataman dahkot mwo?— Nan irelaud 23 en pwuhk wet, kitail sukuhlkier me kitail koaros kin sohsohki dihp. E sou pahn mwahu ma dihp, Tepil oh eh sampah wet pahn kasohrala?—

Paipel inoukihdi: ‘Sampah wet kin sosohrala.’ Met wehwehki me koaros me sohte kin idawehn Sounpadahk Lapalapo pahn sohrala. Irail sohte pahn mour soutuk. Ke ese ihs me pahn mour kohkohlahte?— Paipel pil mahsanih: “Ahpw me kin kapwaiada kupwur en Koht pahn momour kohkohlahte.” (1 Sohn 2:17) Ei, irail kante me kin wia me mwahu oh pil “kupwur en Koht” pahn mour kohkohlahte nan sapwellimen Koht sampah kapw. Kahrehda mehnda ma apwal, ahpw kitail men wia dahme mwahu, kaidehn?—