Dahme Kahrehda Sises Ketin Wia Sounpadahk Lapalap Emen?

POHNANGIN sounpar riekid samwalahro, seri men me inenen kesempwal ipwidi. E kekeirda oh wiahla ohl me keieu lapalap nin sampah. Nan ahnsowo sohte sidohsa de pil sompihr. Pil sohte kasdo, redio oh telepwohn.

Eden serio Sises. E ketin wiahla ohl me keieu loalokong nin sampah. Sises pil ketin wiahla sounpadahk me keieu mwahu. E kin ketin kawehwehda soahng apwal akan ni ahl me mengei ong aramas en wehwehki.

Sises kin ketin padahkih aramas wasa koaros. E kin ketin padahkih irail ni oaroahr oh pohn pwoht akan. E kin ketin padahkih irail nan ihmw kan oh pil ni ahnsou me e kin ketin seiseiloak. E sohte kin ketin doadoahngki sidohsa. Sises kin ketin sapasapalseli oh padapadahk ong aramas akan.

Kitail kin sukuhlki soahng tohto sang aramas teikan. Ahpw kitail kak sukuhlki soahng kan me keieu kesempwal sang rehn Sounpadahk Lapalapo, Sises. Mahsen en Sises kin dierek nan Paipel. Ni atail kin wadek mahsen pwukat nan Paipel, e duwehte Sises eh kin mahmahseniong kitail.

Dahme kahrehda Sises ketin wia Sounpadahk Lapalap men? Ehu kahrepe iei e ketin ale kasukuhl sang emen sounpadahk. Oh e mwahngih uwen kesempwalpen en kin rong. Ahpw ihs me Sises kin ketin rong? Ihs me kin kasukuhlih ih?— Semeo me ketin kasukuhlih ih. Semen Sises iei Koht.

Mwohn Sises ketido sampah nin duwen aramas emen, e kin ketiket nanleng rehn Koht. Eri Sises weksang aramas teikan pwehki sohte emen me mour nanleng mwohn eh ipwidi pohn sampah. Ni Sises eh ketiket nanleng, e kin peikiong Semeo. Ihme kahrehda Sises kak ketin padahkih aramas akan dahme e sukuhlki sang Koht. Ni ahmw pahn peikiong ahmw pahpa oh nohno, ke kak alasang Sises.

Pil ehu kahrepe me Sises ketin wia Sounpadahk Lapalap men iei pwehki eh kin ketin poakohng aramas. E kin kupwurki sewese aramas en esehla Koht. Sises kin ketin poakohng aramas laud kan oh pil seri kan. Seri kan kin perenki mi rehn Sises pwehki e kin ketin mahseniong irail oh karonge arail koasoi kan.

Ehu rahno ekei pahpa oh nohno kan wahdo neirail seri kan rehn Sises. Ahpw kompoakepah kan medewe me Sounpadahk Lapalapo nohn kedirepw pwehn mahseniong kisin seri kan. Eri re padahkihong irail en kohkohla. Ahpw dahme Sises mahsanih?— E mahsanih: ‘Kumwail mweidohng kisin seri kan ren kohdo rehi. Kumwail dehr ireiraildi.’ Ei, Sises ketin perenki seri kan en kohdo reh. Mendahki Sises wia ohl me inenen loalokong oh kesempwal, e kin ketikihong eh ahnsou pwehn padahkih kisin seri kan.​—Mark 10:13, 14.

Ke ese dahme kahrehda Sises kin ketin padahkih seri kan oh karonge arail koasoi kan? Ehu kahrepe iei pwehki eh kin men kaperenda irail sang ni eh ketin padahkihong irail soahng kan duwen Semeo nanleng me iei Koht. Ia duwen ahmw kak kaperenda meteikan?— Sang ni ahmw pahn padahkihong irail soahng kan me ke sukuhlki me pid duwen Koht.

Ehu ahnsou, Sises ketin doadoahngki kisin seri men pwehn padahkihong kompoakepah kan ire kesempwal ehu. E ketin kahrehdo serio nanpwungen sapwellime tohnpadahk ko. Sises eri mahsanih me aramas laud pwukat anahne wekidala arail madamadau oh duwehla kisin serio.

Ia wehwehn sapwellimen Sises mahsen pwukat? Ke ese ia duwen aramas laud men de seri laud men eh kak duwehla kisin seri men?— Kisin seri men kin sehse soahng kan me aramas laud men kin ese oh e kin perenki sukuhlki mehkot. Eri, Sises kin ketin kasalehda me sapwellime tohnpadahk kan anahne perenki sukuhlki mehkan duwehte kisin seri kan. Kitail koaros kak sukuhlki soahng tohto sang meteikan. Kitail anahne taman me padahk kan en Sises kin kesempwal sang pein atail madamadau kan.​—Madiu 18:1-5.

Pil ehu kahrepe me Sises ketin wia Sounpadahk Lapalap men iei pwehki eh mwahngih ia duwen eh pahn ketin padahk ni ahl me aramas pahn perenki rong. E kin ketin kawehwe soahng kan ni ahl me mengei oh sansal. E kin ketin koasoia duwen menpihr kan oh wahn rohs kan oh pil soahng teikan pwehn sewese aramas akan en wehwehkihla duwen Koht.

Ehu ahnsou, ni en Sises ketiket limwahn nahna ehu, aramas tohto kohdo reh. Sises ketidi oh ketin wia padahk ehu ong irail, duwehte nan kilel wet. Padahk wet kin adaneki Kapahrek en Pohn Dohl. E mahsanih: ‘Kumwail tehk mwahu menpihr en pahnlahng kan: re sohte kin padok wahntuhke, re sohte kin dolung, re sohte kin nahkpene nan imwen nahk kan; a Samamwail me ketiket nanleng kin ketin apwalih irail. A ia duwe, kumwail soh kesempwalsang menpihr kan?’

Sises pil mahsanih: ‘Kumwail kilang wahnrohs en nansapw akan ar kin keirda; re sohte kin doadoahk, re sohte kin pein wiahda ar likou. A I ndaiong kumwail pwe pil Solomon, nan eh kepwehpwe mehlel, sohte mwahn kapwatkihda likou kaselel ehu duwehte apwoat irail. Koht me kin ketin kapwatahda dihpw en nansapw akan, eri, ia duwe, e soh pahn ketin apwalih kumwail mwahusang e kin ketin apwalih mepwukat?’​—Madiu 6:25-33.

Ke wehwehki mehn kasukuhl dah me Sises ketin padahngki wasaht?— E sohte kupwurki kitail en pwunodki ia wasa kitail pahn kihsang ie kanatail mwenge de likou. Koht mwahngih me kitail anahne soahng pwukat. Sises sohte mahsanih me kitail sohte anahne doadoahk pwehn ale mwenge oh likou. Ahpw e mahsanih me kitail anahne keieu kesempwalki Koht. Ma kitail pahn wia met, Koht pahn ketin apwalih atail anahn en mwenge oh likou. Ia duwe, ke kamehlele met?—

Ni en Sises ketin kaimwisekala sapwellime padahk, dahme aramas ako medemedewe?— Paipel kasalehda me irail pwuriamweikihla mwomwen sapwellime padahk. Aramas akan kin men rong ih. Dahme e kin mahsanih kin sewese aramas akan en wia dahme pwung.​—Madiu 7:28.

Eri e uhdahn kesempwal kitail en sukuhlki sang rehn Sises. Ke ese ia duwen atail kak wia met?— Sapwellime mahsen kan kin ntingdi nan pwuhk ehu. Ke ese mehnia pwuhk met?— Iei Pwuhk Sarawi. Met wehwehki me kitail kak rong Sises ni atail kin tehk kanahieng soahng kan me kitail kin wadek nan Paipel. Paipel kin kasalehda me mehkot kapwuriamwei wiawi ni Koht eh ketin padahkihong kitail en rong Sises. Kitail pahn tehk dahme wiawi.

Ehu rahno, Sises ketin kahredahla kompoakepah silimen pohn nahna ileile ehu. Adarail kan iei Seims, Sohn oh Piter. Kitail pahn sukuhlki duwen ohl pwukat mwuhr pwehki irail kin wia kompoakepahn Sises. Ni ahnsowo, silangin Sises lingalingla. Oh sapwellime likou kan pil linganla duwehte nan kilel wet.

Mwurin mwo, Sises oh kompoakepah ko rongada ngihl ehu sang nanleng. Ngihlo mahsanih: “Iei met nei pwutak kompoake me I kin popohlki​—kumwail rong sapwellime padahk!” (Madiu 17:1-5) Ngilen ihs mwo?— Koht! Koht me ketin mahsanih me irail anahne rong sapwellime Ohlo.

Ia duwen kitail rahnwet? Kitail pahn peikiong Koht oh rong sapwellime Ohl, Sounpadahk Lapalapo?— Ihme kitail koaros anahne wia. Ke taman ia duwen atail kak wia met?—

Kitail kak rong sapwellimen Koht Ohlo ni atail pahn wadek ire kan nan Paipel duwen mouren Sises. Mie soahng kaselel tohto me Sounpadahk Lapalapo kak padahkihong kitail. Ke pahn perenki sukuhlki duwen soahng pwukat me ntingdi nan Paipel. Oh e pahn pil kahrehiong uhk ken peren ma ke padahkihong kompoakepahmw kan duwen soahng mwahu kan me ke kin sukuhlki.