Sounpadahk Lapalapo Kin papah Meteikan

KE MWAHUKI meteikan ar kin wiahiong uhk mehkot mwahu?— Meteikan pil kin perenki ni ahnsou me emen kin wia mehkot mwahu ong irail. Kitail koaros kin perenki met. Sounpadahk Lapalapo mwahngih met oh e kin ketin wia met ahnsou koaros ong meteikan. E mahsanih: ‘I kohdo kaidehn pwe aramas akan en papah ie, ahpw en papah aramas akan.’​—Madiu 20:28.

Eri ma kitail men duwehte Sounpadahk Lapalapo, dahme kitail en wia?— Kitail anahne papah meteikan. Kitail anahne wia soahng mwahu kan ong irail. Aramas tohto sohte kin wia met. Pali laud en aramas kin men meteikan en papah irail ahnsou koaros. Mie ahnsou me sapwellimen Sises tohnpadahk kan pil kin ahneki soangen lamalam wet. Emenemen irail kin men ih me en keieu lapalap de keieu kesempwal.

Ehu rahno Sises oh sapwellime tohnpadahk ko wie seiseiloak. Mwurin arail lel nan kahnimw en Kapernaum limwahn Lehen Kalili, irail koaros ahpw pedolong nan ihmw ehu. Sises eri ketin idek rehrail ehu peidek: “Dahme kumwail akahkamaiki kohdo nanialo?” Irail ahpw nennenlahte pwehki irail akahkamaiki ihs me keieu lapalap rehrail.​—Mark 9:33, 34.

Sises mwahngih me e sohte pwung emen rehn sapwellime tohnpadahk ko en medemedewe me ih me keieu lapalap. Eri duwehte dahme kitail sukuhlki nan irelaud ehu nan pwuhk wet, Sises ketin kahrehdo kisin seri men nanpwungarail oh mahsanih me irail anahne aktikitik duwehte kisin serio. Ahpw irail saikinte wehwehkihla dahme Sises mahsanih. Ihme kahrehda mwohnte Sises eh pwoula, e ketikihong irail mehn kasukuhl ehu me irail sohte kak manokehla. Dahme e ketin wia?—

Ni arail wie konokonot, Sises ketida sang nin tehpelo oh ketikihsang sapwellime likoun liki. E ahpw ketikihda daul ehu oh pirekihdi lukope. E ahpw ketin wudekihdiong pihl nan peisin ehu. Sapwellime tohnpadahk ko mwein medemedewe dahme Sises pahn ketin wia. Ni arail kilikilang, Sises ketin kelepwikihdi oh widen patehnehn sapwellime tohnpadahk ko oh limwiheki daulo. Nna medewe mahs duwen met! Ma ke mi wasao, ia pahn ahmw pepehm?—

Sapwellime tohnpadahk ko pehm me e sohte konehng Sounpadahk Lapalapo en papah irail ni mwomw wet. Irail namenekla. Piter medewe me e sohte konehng Sises en ketin wia soangen doadoahk en papah wet ong ih. Ahpw Sises mahsanih me e kesempwal ong ih en wia met.

Rahnwet kitail sohte kin widen nehn emenemen. Ahpw met kin wiawi ni ahnsou me Sises ketiket pohn sampah. Ke ese dahme kahrehda?— Nan sahpw me Sises oh sapwellime tohnpadahk kan mihmi ie, aramas kin doadoahngki sandel. Eri ni arail kin alialu pohn ahl akan, nehrail kan kin pwelipwella. Tiahk en kadek ehu en kin widen nehn aramas men me kin mwemweitla ni ehu ihmw.

Ahpw sohte emen sapwellimen Sises tohnpadahk ko medewehda en widen patehnehn meteiko. Ihme kahrehda pein Sises ketin wia met. Ni eh ketin wia met, e ketin padahkihong sapwellime tohnpadahk ko mehn kasukuhl kesempwal ehu. Irail anahne esehla met. E pil wia mehn kasukuhl ehu me kitail anahne ese rahnwet.

Ke ese ia mehn kasukuhlo?— Mwurin Sises eh ketin pwuhriong nan sapwellime likoun likih oh ketin pwurala ni tehpelo, e ketin mahsanih: “Ia duwe, kumwail wehwehki dahme I ahpwtehn wiahiong kumwail? Kumwail kin kahdanekin ie Sounpadahk oh Kaun; eri, me pwung amwail nda met, pwe iei ngehi. Ngehi amwail Kaun oh Sounpadahk, me ahpwtehn widen patehnehmwail kan. Kumwail eri uhdahn pahn widen patehnehn emenemen kumwail.”​—Sohn 13:2-14.

Sounpadahk Lapalapo ketin kasalehda me e kupwurki sapwellime tohnpadahk ko en kin papah emenemen. E sohte kupwurki irail en kin medemedewehte pein irail. E sohte kupwurki irail en medewe me irail me nohk kesempwal pwe meteikan en papah irail. E kupwurki irail en perenki papah meteikan.

Met sou wia mehn kasukuhl mwahu ehu?— Ke pahn duwehte Sounpadahk Lapalapo oh papah meteikan?— Kitail koaros kak wia mehkot ong meteikan. Met pahn kaperenih irail. Ahpw me keieu kesempwal, kitail pahn kaperenda Sises oh Semeo.

E sohte apwal en papah meteikan. Ma ke pahn tehk mwahu, ke pahn diar me soahng tohto ke kak wiahiong meteikan. Medewe mahs met: Mie mehkot me ke kak wia pwehn sewese ahmw nohno? Ke ese me soahng tohto e kin wia ong kowe oh ahmw peneinei. Ke kak sewese ih?— Ke sou idek reh?

Mwein ke kak kaunopada wasahn mwenge mwohn peneinei eh pahn mwenge. De ke kak widen dahl mwurin mwenge. Ekei seri kan kin kesehla kihd rahn koaros. Sohte lipilipil dahme ke wia, ke kak papah meteikan duwehte Sises eh kin ketin wia.

Mie riomw me tikitik sang uhk me ke kak papah? Tamataman me Sises, Sounpadahk Lapalapo, ketin papah sapwellime tohnpadahk kan. Ke kin alasang Sises ni ahmw kin papah riomw me tikitik kan. Dahme ke kak wiahiong irail?— Mwein ke kak sewese irail koasoanehla neirail mehn mwadong kan mwurin arail mwadong. De ke kak sewese irail en likouda. De ke kak sewese irail en koasoanehdi arail wasahn meir. Mie mehkot tohrohr me ke kak pil wiahiong irail?— Irail pahn kalahnganki ahmw wiahiong irail soahng pwukat, duwehte sapwellimen Sises tohnpadahk ko arail kasalehda kalahngan ong ih.

Ke pil kak papah meteikan nan sukuhl. Ke kak papah iengomw tohnsukuhl kan de pil ahmw sounpadahk. Ma nein emen pwuhk pwupwudi, e pahn wia elen kadek ma ke pahn pwekada oh kihong ih. Ke kak kamwakelehda blackboard de wia mehkot tohrohr ong ahmw sounpadahk. Ke pil kak ritingada wenihmw ong meteikan.

Ekei pak ke pahn diar me aramas sohte kin kasalehda kalahngan ni atail kin papah irail. Ke leme e konehng kitail en uhdihsang wia me mwahu?— Soh! Aramas tohto sohte kin kalahngankihong Sises sapwellime doadoahk mwahu kan. Ahpw met sohte kauhdi ih sang wia doadoahk mwahu.

Kahrehda kitail en dehr uhdihsang papah meteikan. Kitail en tamataman Sounpadahk Lapalap Sises oh ahnsou koaros alasang sapwellime mehn kahlemeng.