Ke Kin Men Keieu Ahnsou Koaros?

MIE emen me ke ese me kin men keieu ahnsou koaros?— Mwein e kin siken meteikan pwe en kak keieu nan lain. Mie pak ke kilang met wiawi?— Sounpadahk Lapalapo ketin tehkada irail me laud kan arail pil kin song en ale wasa me keieu mwahu de kesempwal. Oh e sohte kupwurki met. Kita pahn kilang dahme wiawi.

Paipel kasalehda me Sises ketin ale luhk en iang towehda kamadipw ehu nan imwen Parisi men me wia kaunen pelien lamalam kesempwal men. Mwurin Sises eh lella wasa, e ketin tehkada duwen aramas akan arail kin kohdo oh pilada wasa me keieu mwahu ren mwohndi. Ih eri ketin padahkihong irail me mi wasao duwen soai pwoat. Ke men rong duwen met?—

Sises mahsanih: ‘Ma ke ale luhk en iang kamadipw en kapwopwoud ehu, ieremen ke kohdo oh mwohndi wasa me keieu mwahu.’ Ke ese dahme kahrehda Sises mahsanihki met?— E ketin kawehwehda me emen me lapalap sang ih mwein pil ale luhk en iang kohdo. Eri duwehte ni ahmw kilang nan kilel wet, aramas me ahneki kamadipwo pahn kohdo oh nda: ‘Kihong mahs ohl menet deumwen, ah kowe keidihla palio.’ Ia pahn en aramaso eh pepehm?— E pahn namenekla pwehki meteikan koaros pahn kilang eh pahn keidihla nan wasa me sohte nohn kesempwal.

Sises ketin kasalehda me e sohte pwung en men ale wasa me keieu mwahu. Ih eri mahsanih: ‘Ma ke pahn ale luhk, kohdo oh mwohndiong ni kapio, pwe me lukeiuko en kohdo oh ndaiong uhk, “Kompoakepahi, menlau keidahdo met.” Met pahn kahrehiong ahmw pahn adamwahula rehn tohnkapar en kamadipwo koaros.’​—Luk 14:1, 7-11.

Ke wehwehki ia mehn kasukuhl me Sises men padahkihong kitail?— Kita pahn kilang ehu karasepe pwehn kilang ma ke wehwehki. Medewe ma ke pahn douda pohn bus pwoat me diren aramas loale. Ia duwe, ke pahn mwadang ale wasahn mwohd oh mweidohng me mah men en kesihnen?— Ke leme Sises pahn ketin perenki ma ke wia met?—

Emen mwein pahn nda me Sises sohte pahn ketin nsenohki dahme kitail kin wia. Ahpw ke kamehlele met?— Ni en Sises eh ketiket ni kamadipwo ni imwen Parisio, e ketin tehkada aramas ko arail kin pilada dewerail kan. Ke sou leme me e pil kin ketin nsenohki dahme kitail kin wia rahnwet?— Met ni en Sises eh ketiket nanleng, e uhdahn kak kilang kitail.

Ma emen kin song en keieu, e kak kahrehda kahpwal. Pali laud en ahnsou aramas kin akamai oh lingeringerda. Ekei pak met kin wiawi ni en seri kan arail kin iang dake bus. Ni ahnsou me wenihmw en buso kin ritida, seri kan kin weirih ihs me pahn tepin pedolong. Irail men ale sehr me keieu mwahu pwe ren kak kilangla likin buso. Eri dahme kakete wiawi?— Seri kan kakete lingeringerda pahn emenemen.

En men keieu kak kahrehda kahpwal tohto. E pil kahrehiong kahpwal nanpwungen sapwellimen Sises wahnpoaron ko. Duwehte atail sukuhlki nan irelaud 6, re akamaiki ihs me keieu lapalap rehrail. Dahme Sises ketin wia?— Ei, e ketin kapwungala arail madamadau. Ahpw mwuhr re pwurehng akamaida. Kita pahn kilang ia duwen akamaio eh tepida.

Wahnpoaron ko iangahki meteikan iang Sises ni kaimwiseklahn eh seiloak ong kahnimw en Serusalem. Sises wie mahmahseniong irail duwen sapwellime Wehio, kahrehda Seims oh Sohn wie medemedewe duwen ara pahn iang Sises kakaun nin duwen nanmwarki kei. Ira pil koasoiaiong ara nohno Salome duwen met. (Madiu 27:56; Mark 15:40) Eri ni arail kohkohlahng nan Serusalem, Salome kohdo oh poaridi mwohn Sises oh wia pekipek ehu.

Sises eri mahsanih: “Dahme ke anahne?” Ih eri patohwanohng Sises me e men en ketin mweidohng nah pwutak ko en mwohd mpe nan sapwellime Wehio, emen ni palimaun ah emen ni palimeing. Eri ke leme ia en wahnpoaron ehk teiko arail pepehm ni arail rongada dahme Seims oh Sohn ndahng ara nohno en wia?—

Re uhdahn lingeringerda rehn Seims oh Sohn. Sises eri ketikihong kaweid mwahu kei ong sapwellime wahnpoaron ko koaros. Sises ketin padahkihong irail me kaunen wehi kan kin men lapalap oh kesempwal. Re kin men ahneki pwukoa kesempwal kan pwe aramas koaros en kin peikiong irail. Ahpw Sises ketin padahkihong sapwellime tohnpadahk ko me re sohte pahn kin wia soahng wet. Sises mahsanih: ‘Mehmen rehmwail me men keieu, e uhdahn pahn wiahla lidu.’ Medewehla duwen met.​—Madiu 20:20-28.

Ke ese dahme lidu men kin wia?— E kin papah meteikan oh sohte kasik meteikan en papah ih. E sohte kin ale wasa me keieu mwahu. E kin wiahkin ih duwehte emen me keieu sohte katepe ahpw kaidehn emen me keieu kesempwal. Oh tamataman, Sises mahsanih me emen me men keieu anahne en duwehte lidu men ong meteikan.

Eri ia wehwehn met ong kitail?— Ia duwe, lidu men kin akamaikihong eh soumas ihs me pahn ale wasa me keieu mwahu? De e kin akamaiki ihs me pahn tepin mwenge? Ia ahmw madamadau?— Sises ketin kawehwehda me lidu men kin ahnsou koaros kihdi eh soumas mwohn ih.​—Luk 17:7-10.

Eri ma kitail sohte pahn song en keieu, dahme kitail anahne wia?— Ei, kitail anahne duwehte lidu men ong meteikan. Met kin wehwehki me kitail pahn kihdi meteikan mwohn kitail. E kin wehwehki me kitail pahn medewe me meteikan kesempwal sang kitail. Ke kak medewehda duwen ekei ahl kan me kitail kak kasalehda atail kesempwalki meteikan sang kitail?— Ke sou pahkalahng nan pali 40 oh 41 oh kilang ekei ahl kan ni ahmw pahn papah irail.

Ke pahn taman me Sounpadahk Lapalapo kin ketin kesempwalki meteikan sang pein ih ni eh kin papah irail. Ni kaimwiseklahn ni soutik me e ketiket rehn sapwellime wahnpoaron ko, e pil ketin kelepwikihdi oh widen nehrail ko. Ma kitail pil kin kesempwalki meteikan ni atail kin papah irail, kitail pahn kaperenda Sounpadahk Lapalapo oh Semeo, Siohwa Koht.