Dahkot Wehin Koht? Ia Duwen Atail Pahn Kasalehda Me Kitail Men En Pweida?

KE ESE duwen kapakap me Sises ketin padahkihong sapwellime tohnpadahk ko?— Ma soh, kita kak wadekpene Madiu 6:9-13 sang nan Paipel. Kapakapo iei me aramas tohto kin kahdaneki kapakap en Samat. E kin audaudki mahsen pwukat: “Mweimwi en pweida wasa koaros.” Ke ese dahkot Mwein Koht de Wehin Koht?—

Eri, wehi ehu iei koperment ehu. Mie soangsoangen koperment oh nan ekei koperment pwukat, aramas me kaundao kin adaneki preseden. Ahpw koperment me Koht ketin inoukidahro kin adaneki Wehin Koht oh me kaundao kin adaneki Nanmwarki.

Ke ese ihs me Siohwa ketin pilada pwehn wia Nanmwarki en sapwellime kopermento?— Iei sapwellime ohl Sises Krais. Dahme kahrehda Sises mwahusang kaun akan me aramas kin pilada?— Met pwehki Sises kin uhdahn poakohng Semeo, Siohwa. Ihme kahrehda e kin ketin wia dahme pwung ahnsou koaros.

Mwohn Sises eh ketin ipwidi nan Pedleem, Paipel mahsanih duwen eh ipwidi oh me Koht pahn ketin pilada ih en wiahla Kaun men. Kita pahn wadekpene duwen met nan Aiseia 9:6, 7. E mahsanih: “Kisin seri kis ipwidiongkitailehr! Neitail pwutak emen kohiengkitailehr! Oh e pahn ketin wiahla atail kaun. E pahn mwarenki— ‘Nanmwarkien Popohl.’ Sapwellime manaman pahn wie lapalapala, oh popohl pahn poatopoat nan sapwellime wehi.”

Wasaht kasalehda me Sises, me wia Kaunen Wehin Koht kin adaneki “Nanmwarkien Popohl.” Ih pil sapwellimen Nanmwarki Lapalapo, Siohwa. Ahpw Siohwa ketin wiakihla Sises Nanmwarki en sapwellime koperment me pahn kaunda sampah erein pahr kid. (Kaudiahl 20:6) Mwurin Sises eh ketin papidaisla, e ketin tapiada “kapahrengkiseli sapwellime padahk, mahsanih, ‘Kumwail koluhla oh wiliakapwala! Pwe Wehin Koht kerendohr!’”​—Madiu 4:17.

Dahme ke leme me kahrehda Sises mahsanihki me Wehin Koht kerendohr?— Pwehki Nanmwarkio, me pahn mwuhr kaunda nanleng, wie ketiket rehrail ni ahnsowo! Ihme kahrehda Sises mahsanihong aramas ako: “Wehin Koht mihmi nanpwungamwail.” (Luk 17:21, NW) Nna medewehla me ke mihmi limwahn nanmwarki men, eri mehlel sapwellimen Siohwa Nanmwarkio oh ke kak koasoiong ih, ke sou pahn perenki?—

Eri, mehnia doadoahk kesempwal me Sises ketido sampah pwehn wia?— Sises sapeng mahsanih: “I uhdahn pahn pil kapahrengki Rongamwahu en Wehin Koht ong kahnimw teikan, pwe ih me Koht ketin poaronekiniehdo.” (Luk 4:43) Sises mwahngih me e sohte kak ketin kelehpw wia doadoahk en kalohko. Eri dahme ke leme e ketin wia?—

Sises kin ketin kahrehda ekei aramas ako oh e kin ketin kasalehiong irail ia duwen arail pahn wia doadoahk en kalohk. Irail kan me e tepin padahkih iei meh 12 ko me e ketin pilada ong wahnpoaron. (Madiu 10:5, 7) Ahpw ia duwe, ihte sapwellime wahnpoaron ko me e ketin kasukuhlihada ong doadoahk wet? Soh, Paipel mahsanih me Sises ketin kasukuhlihada me tohto ong kalohk. Mwuhr, e ketin kadarala tohnpadahk 70 teiko ni wad riemen. Dahme re padahkihong aramas akan?— Sises mahsanih: “Kapahrengkihong towe kan me Wehin Koht kerendohngirailehr!” (Luk 10:9) Ih duwen aramas ako arail esehla duwen Wehin Koht.

Mahso nan Israel, nanmwarki kapw kan kin dake ahs pwul men kohlong nan kahnimwo pwe aramas akan en kak kilang ih. Ih duwen me Sises pil ketin wia ni kaimwiseklahn eh ketila nan Serusalem. Ke kilang, Sises pahn ketin wiahla kaunen Wehin Koht. Ia duwe, aramas ako men Sises en wia arail Nanmwarki?—

Ni eh ketiket kohla, pali laud en aramas ako tepida perekihdi mwowe arail likou en liki ko nanialo. A ekei pelehdi rahntuhke kei oh pil perekihdi nanialo. Ni arail kin wia met, irail kin kasalehda me irail pwungki Sises en wia arail Nanmwarki. Irail eri werikihda: ‘Koht en ketin kupwuramwahwih nanmwarki me ketiket kohdo ni mwaren Siohwa!’ Ahpw kaidehn koaros perenki met. Ekei kaunen pelien lamalam kan ndaiong Sises, ‘komw mahsanihong sapwellimomwi tohnpadahk kan en nennenla.’​—Luk 19:28-40.

Mwurin rahn limau, Sises ketin selidi oh wisiklahng nan tehnpas en kepina Pontius Pailet. Sapwellimen Sises imwintihti ko nda me Sises kin mahsanih me ih nanmwarki men oh e kin ketin uhwong koperment en Rom. Pailet eri idek rehn Sises duwen met. Sises ketin kasalehda me e sohte kin ketin song en kaunda arail kopermento. E mahsanihong Pailet: “Ei wehi, kaidehn kisehn sampah wet.”​—Sohn 18:36.

Pailet eri kohieila likio oh ndaiong aramas ako me sohte sapwung ehu e diar rehn Sises. Ahpw ahnsowo aramas ako sohte men Sises en ketin wia arail Nanmwarki. Irail sohte men en lapwada. (Sohn 18:37-40) Mwurin eh pwurehng koasoiong Sises, Pailet esehier me Sises sohte ketin wiahda mehkot sapwung. Mwurin kaimwiseklahn Sises eh ketin wisikla likio, Pailet eri nda: “Iet ih amwail nanmwarki!” Re ahpw weriwerki, ‘En kamala! En kamala! Komw katuhkehla!’

Pailet ahpw idek: ‘Dah? Kumwail men I en katuhkehla amwail nanmwarki?’ Samworo lapalap ako ahpw sapengki, “Sohte at nanmwarki, pwe Sihsarte!” Ken medewe mahs duwen met? Samworo suwed pwukat kahrehiong aramas akan en uhwongada Sises!​—Sohn 19:1-16.

Rahnwet pil kin duwehte dahme wiawi ni mwehin Siseso. Pali laud en aramas sohte men Sises en ketin wia arail Nanmwarki. Mwein irail kin nda me re kamehlele Koht ahpw irail sohte kin men Koht oh Krais en ketin padahkihong irail dahme irail en wia. Irail kin pwungkihte pein arail koperment me mi nin sampah.

Ia duwen kitail? Ni ahnsou me kitail esehla duwen Wehin Koht oh soahng kaselel koaros me e pahn wiahiong kitail, ia duwen met eh kin kamwakid atail pepehm ong Koht?— Kitail kin poakohng ih, kaidehn?— Eri, ia duwen atail kak kasalehiong Koht me kitail poakohng ih oh me kitail men sapwellime Wehi en kaun kitailda?—

Kitail kak kasalehiong Koht atail pepehm ni atail kin kahlemengih Sises. Dahme Sises ketin wia pwehn kasalehda me e ketin poakohng Siohwa?— Sises mahsanih me e kin ketin ‘poaden wiewia mehkan me Sahmo kin ketin kupwurperenki.’ (Sohn 8:29) Ei, Sises ketido nin sampah pwehn ‘kapwaiada kupwuren Koht’ oh “wiahda sapwellime doadoahk.” (Ipru 10:7; Sohn 4:34) Medewe duwen dahme Sises ketin wia mwohn e tapiada sapwellime doadoahk en kalohk.

Sises ketila rehn Sohn Sounpapidais ni Pillap en Sordan. Mwurin ara doudihla nan pihlo, Sohn kaduhdi Sises pahn pihlo oh pil kihda sang ih nan pihlo. Ke ese dahme kahrehda Sohn papidaisiala Sises?—

Sises me ketin peki Sohn en wia met. Ahpw ia duwen atail ese me Koht kupwurki Sises en papidaisla?— Kitail ese met pwehki ni ahnsou me Sises ketida sang nan pihlo, e ketin rong Koht eh mahsanih sang nanleng: “Kowe, me iei nei pwutak kompoake, me I kin kupwurperenki.” Koht pil ketin kadarodo sapwellime manaman pohn Sises ni mwomwen mwuroi men. Eri, ni Sises eh ketin papidaislahr, e ketin kasalehda me e kupwurki papah Siohwa erein sapwellime mour, kohkohlahte.​—Mark 1:9-11.

Ahnsou wet ke wie serihte. Ahpw dahme ke pahn wia mwuhr ma ke laudla?— Ke pahn duwehte Sises oh papidaisla?— Ke anahne alasang ih pwehki Paipel mahsanih me e ketikihong kitail mehn “karasepe mwahu” pwehn kahlemengih. (1 Piter 2:21) Ni ahmw pahn papidaisla, ke pahn kasalehda me ke uhdahn men Wehin Koht en kaun uhk. Ahpw e sohte itar en papidaislahte.

Kitail anahne peikiong soahng koaros me Sises ketin padahkihong kitail. Sises mahsanih me kitail “kaidehn kisehn sampah.” Ia duwe, kitail pahn peikiong ih ma kitail iang pidada wiewia kan en sampah?— Sises oh sapwellime wahnpoaron ko sohte iang pidada mehkan en sampah. (Sohn 17:14) Ahpw dahme irail wia?— Irail kin koasoiaiong meteikan duwen Wehin Koht. Ih doadoahk me keieu kesempwal nan arail mour. Ia duwen, kitail pil kak wia met?— Ei, oh kitail pahn wia met ma kitail mehleliong dahme kitail nda ni atail kapakapki Wehin Koht en pweida.