Dahkot Wehin Koht?

1. Kapakap ndand dah me kitail pahn koasoiapene ahnsouwet?

ARAMAS rar kei ese kapakap ndand me adaneki Kapakap en Samat de Kapakap en Kauno. Sises ketin doadoahngki kapakap wet pwehn padahkihong sapwellime tohnpadahk kan ia mwomwen arail pahn kin kapakap. Dahme e ketin kapakapki? Oh dahme kahrehda kapakap wet kesempwal ong kitail rahnwet?

2. Soahng kesempwal siluh dah me Sises ketin padahkihong kitail en kapakapki?

² Sises mahsanih: “Eri, iet duwen amwail pahn kin kapakap: ‘Samat me ketiket nanleng: Mwaromwi en sarawihla rehn aramas koaros, mweimwi [“Wehiomwi,” NW] en pweida wasa koaros, kupwuromwi en kin wiawi nin sampah duwen eh kin wiawi nanleng.” (Wadek Madiu 6:9-13.) Dahme kahrehda Sises ketin padahkihong kitail en kapakapki soahng siluh pwukat?​—Menlau kilang Ire kan 20.

3. Dahme kitail anahne ese me pid duwen Wehin Koht?

³ Kitail sukuhlkier me mwaren Koht iei Siohwa. Oh kitail koasoiapeneier ia kupwuren Koht ong aramas akan oh ong sampah. Ahpw ia wehwehn dahme Sises ketin mahsanih: “Mweimwi [“Wehiomwi,” NW] en pweida wasa koaros”? Kitail pahn sukuhlki dahkot Wehin Koht, dahme e pahn wia, oh ia duwen eh pahn kasarawihala mwaren Koht.

DAHKOT WEHIN KOHT?

4. Dahkot Wehin Koht, oh ihs me wia Nanmwarki?

⁴ Siohwa ketin kauwada koperment ehu nanleng oh ketin pilada Sises en wia Nanmwarki en Wehi wet. Paipel kin kahdaneki koperment wet Wehin Koht. Sises iei me “Kaunen kaun akan oh Nanmwarkien nanmwarki kan.” (Kaudiahl 17:14) Sises kak ketin wia mwahu laudsang soulipilipil en kaunen aramas men kak wia, oh e ketin manaman sang en kaun akan koaros ar manaman patpene.

5. Sapwellimen Koht koperment pahn kaun sang ia? Dahme e pahn kaunda?

⁵ Rahn pahisek mwurin eh ketin iasada, Sises ketin sapahlla nanleng. Kedekedeo, Siohwa ketin idihada ih nin duwen Nanmwarki en Wehio. (Wiewia 2:33) Sapwellimen Koht koperment pahn kaunda sampah pwon sang nanleng. (Kaudiahl 11:15) Ihme kahrehda Paipel kin kahdaneki Wehin Koht “Wehin nanleng.”​—2 Timoty 4:18.

6, 7. Dahme kahrehda Sises ketin wia nanmwarki men me mwahusang nanmwarki koaros en sampah?

⁶ Paipel mahsanih me Sises ketin lapalapasang nanmwarki koaros en sampah pwehki “e sohte pahn pwurehng pwoula.” (Rom 6:9) Kaunen aramas akan koaros kin kedekedeo mehla, ahpw Sises sohte mwahn pahn pwoula. Soahng mwahu koaros me Sises pahn ketin wia ong kitail pahn mihmi kohkohlahte.

⁷ Kokohp en Paipel mahsanih me Sises pahn ketin wia Nanmwarki me kin toupahrek oh kadek: “E pahn ketin kaunkihda sapwellime aramas akan kupwurokong oh erpit. E pahn ketin mwahngih kupwur en KAUN-O oh lemmwiki, pwe e pahn ketin perenki kapwaiada kupwure. E sohte pahn ketin kadeikada sang ni me e kin mahsanihete de ketin karongehte. E pahn ketin kadeik me semwehmwe kan nin duwen me pwung.” (Aiseia 11:2-4) Ia duwe, ke pahn men omw nanmwarki en duwehte met?

8. Ia duwen atail ese me Sises sohte pahn ketin kelehpw kakaun?

⁸ Koht ketin pilada aramas ekei en iang Sises kakaun nan koperment en nanleng. Karasepe, wahnpoaron Pohl padahkihong Timoty: “Ma kitail pahn nantihong kanengamah ni mehkoaros, kitail pil pahn iang Krais kakaun.” (2 Timoty 2:12) Meh depe me pahn iang Sises kakaun nin duwen nanmwarki kei?

9. Meh depe me pahn iang Sises kakaun? Iahd me Koht ketin tepida pilada irail pwukat?

⁹ Nin duwen me kitail sukuhlkier nan Irelaud 7, wahnpoaron Sohn alehdier kaudiahl ehu me e kilangada Sises nin duwen Nanmwarki en nanleng oh iangahki nanmwarki 144,000 kei. Ihs irail 144,000? Sohn kawehwehda me “mwaren Sihmpwulo [Sises] oh mwaren Sahm ntinting ni temwarail kan.” Oh e pil kapatahiong: “Re kin idawehn Sihmpwulo [me iei Sises] wasa koaros me e pahn kin ketila ie; re kamaiaudahsangehr rehn aramas teikan.” (Wadek Kaudiahl 14:1, 4.) Irail 144,000 pwukat iei Kristian lelepek kei me Koht ketin piladahr en iang Sises kaunda sampah nin duwen nanmwarki kei. Ni ahnsou me re pahn mehla, re pahn iasadahng mour nanleng. (Kaudiahl 20:4, 6) Sangete ni mwehin wahnpoaron ako, Siohwa kin ketin pilada irail Kristian lelepek kan en iang kisehn pwihn en nanmwarki 144,000.

10. Dahme kahrehda e wia elen limpoak me Siohwa ketin pilada Sises oh 144,000 ko en kaunda aramas akan?

¹⁰ Siohwa uhdahn ketin nsenohkin kitail me kahrehda e ketin koasoanehdi aramas akan en iang Sises kakaun. Sises pahn ketin wia kaun mwahu men pwehki e ketin wehwehkin kitail. E ketin mwahngih mwomwen mour en aramas oh lokolok. Pohl koasoia me Sises sapwellimanki pepehm ong kitail, e kak ketin “pehmada atail tungoal luwet akan” oh e ketin “ale songosong ni soahng koaros duwehte kitail.” (Ipru 4:15; 5:8) Irail 144,000 ko pil ese mwomwen mour en aramas. Oh irail pil kin lelohng songosong en soh unsek oh soumwahu. Eri kitail kak kamehlele me Sises oh 144,000 ko pahn wehwehki atail pepehm kan oh pil kahpwal kan me kitail anahne dadaur pah.

DAHME WEHIN KOHT PAHN WIA?

11. Dahme kahrehda Sises ketin padahkihong sapwellime tohnpadahk ko en kapakapki kupwuren Koht en pweida nanleng?

¹¹ Sises ketin padahkihong sapwellime tohnpadahk ko en kapakapki kupwuren Koht en pweida nanleng. Dahme kahrehda? Kitail sukuhlkier nan Irelaud 3 me Sehdan me Tepil uhwongada Siohwa. Mwurin ahn Sehdan uhwongo, Siohwa ketin mweidohng ih oh tohnleng salelepek ko, de ngehn suwed ko, en mihmihte nanleng erein ahnsou kis. Ihme kahrehda kaidehn koaros me kin mihmi nanleng kin wia kupwuren Koht. Nan Irelaud 10, kitail pahn kalaudehla atail sukuhlki duwen Sehdan oh ngehn suwed ko.

12. Soangen mwekid kesempwal riau dah me Kaudiahl 12:10 kawehwehda?

¹² Paipel kawehwehda me mwurinte Sises eh pahn ketin wiahla Nanmwarki en Wehin Koht, e pahn ketila mahweniong Sehdan. (Wadek Kaudiahl 12:7-10.) Iretikitik 10 kawehwehda soangen mwekid kesempwal riau. Wehin Koht tepida kakaun rehn Sises Krais nin duwen Nanmwarki, oh Sehdan pisikensang nanleng kohdidohng sampah. Ni atail pahn sukuhlki, mwekid pwukat wiawiher.

13. Dahme wiawi nanleng ni ahnsou me Sehdan pisikensang nanleng?

¹³ Paipel kawehwehda peren me tohnleng lelepek kan ahneki mwurin Sehdan oh nah ngehn suwed kan pisikensang nanleng. Kitail wadek: “Kumwail nanleng kan, kumwail perenda, oh koaros me kin kousoan nanleng.” (Kaudiahl 12:12) Eri met popohl unsek oh miniminpene miehla nanleng pwehki koaros me mi mwo kin wia kupwuren Koht.

14. Dahme wiawi nin sampah pwehki Sehdan eh pisikensang nanleng?

¹⁴ Ahpw mour nin sampah uhdahn weksang mour en nanleng. Soahng suwed kan kin wiawihong aramas akan “pwe Tepilo leledohr” oh e “inenen lingeringer kowahlap pwehki eh ese me eh ahnsou mwotomwotalahr.” (Kaudiahl 12:12) Sehdan uhdahn lingeringer. E piskensang nanleng, oh e wehwehki me e pahn kereniongehr kasohrala. E kin wia uwen eh kak en kahrehda kahpwal, medek, oh lokolok nan sampah pwon.

15. Ia kupwuren Koht ong sampah?

¹⁵ Ahpw kupwuren Koht ong sampah sohte wekila. E ketin kupwurkihte aramas unsek kan en mour kohkohlahte nan paradais nin sampah. (Melkahka 37:29) Eri ia duwen Wehin Koht eh pahn kahrehiong met en pweida?

16, 17. Dahme Daniel 2:44 padahkihong kitail duwen Wehin Koht?

¹⁶ Kokohpo nan Daniel 2:44 koasoia: “Eri, ni ahnsou me nanmwarki ko pahn kakaun wasa, Koht en nanleng pahn ketin kauwada mwehi [“wehi,” NW] ehu me sohte imwi. Mwehi [“Wehi,” NW] wet sohte pahn kak lohdi, ahpw e pahn kauwehla mwehi teikan koaros, oh pahn mihmi kohkohlahte.” Dahme kokohp wet padahkihong kitail duwen Wehin Koht?

¹⁷ Keieu, e padahkihong kitail me Wehin Koht pahn tepida kakaun “ni ahnsou me nanmwarki ko pahn kakaun wasa.” Met wehwehki me koperment teikan pahn mihmihte nin sampah ni ahnsou me Wehi wet tepida kakaun. Keriau, e padahkihong kitail me Wehin Koht pahn mihmi kohkohlahte oh sohte ehu koperment pahn wiliandi. Oh kesiluh, mahwen pahn wiawi nanpwungen Wehin Koht oh koperment kan en sampah wet. Wehin Koht pahn kana oh ihte koperment me pahn kakaun sampah pwon. Eri aramas akan pahn ahneki koperment me keieu mwahu me re kak ahneki.

18. Ia eden kaimwiseklahn mahwen nanpwungen Wehin Koht oh koperment kan en sampah wet?

¹⁸ Ia duwen Wehin Koht eh pahn alehdi manaman en kaunda sampah wet? Mwohnte kaimwiseklahn mahwen me adaneki Armakedon, ngehn suwed kan pahn pitih “nanmwarki kan en sampah pwon, pwe en kaminiminirailpene ong ni mahwen me pahn wiawi ni Rahn Lapalap en Koht, Wasa Lapalahpie.” Ei, koperment en aramas akan pahn peiong Wehin Koht.​—Kaudiahl 16:14, 16; Menlau kilang Ire kan 10.

19, 20. Dahme kahrehda kitail anahne Wehin Koht en kaunda sampah?

¹⁹ Dahme kahrehda kitail anahne Wehin Koht? Mie kahrepe siluh. Keieu, kitail dipan, eri kitail kin soumwahuda oh mehla. Ahpw Paipel mahsanih me kitail pahn mour kohkohlahte pahn kaundahn Wehin Koht. Ni mehlel, Sohn 3:16 mahsanih: “Iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.”

²⁰ Keriaun kahrepe ong dahme kahrehda kitail anahnehki Wehin Koht iei kitail mihmi nanpwungen aramas suwed kei. Me tohto kin likamw oh mwersuwed oh tiahk samin. Sohte mehkot kitail kak wia pwehn kihsang mepwukat, ahpw Koht me pahn ketin wia met. Aramas akan me kin wiewia soahng suwed kan pahn kasohrala erein Armakedon. (Wadek Melkahka 37:10.) Kahrepe kesiluh ong dahme kahrehda kitail anahnehki Wehin Koht iei koperment en aramas akan kin luwet, lemei, de mwersuwed. Re sohte kin men sewese aramas akan en peikiong Koht. Paipel mahsanih me “ekei aramas ahneki manaman, a ekei kin wie lokolok pahn ar manaman.”​—Eklesiasdes 8:9.

21. Ia duwen Wehio eh uhdahn pahn kahrehiong kupwuren Koht en pweida nin sampah?

²¹ Mwurin Armakedon, Wehin Koht uhdahn pahn kahrehiong kupwuren Koht en pweida nin sampah. Karasepe, e pahn ketikihsang Sehdan oh nah ngehn suwed kan. (Kaudiahl 20:1-3) Oh kedekedeo, solahr me pahn soumwahuda de mehla. Pwehki pweinen pweipwei sapahlo, aramas lelepek koaros pahn kakehr mour kohkohlahte nan Paradais. (Kaudiahl 22:1-3) Wehio pahn kasarawihala mwaren Koht. Ia wehwehn met? E wehwehki me ni ahnsou me koperment en Koht pahn kaunda sampah, aramas koaros pahn kawauwih mwaren Siohwa.​—Menlau kilang Ire kan 21.

IAHD ME SISES WIAHLA NANMWARKI?

22. Ia duwen atail ese me Sises sohte ketin wiahla Nanmwarki ni ahnsou me e ketiket sampah de mwurinte eh ketin iasada?

²² Sises mahsanihong sapwellime tohnpadahk kan en kapakapki: “Mweimwi [“Wehiomwi,” NW] en pweida wasa koaros.” Eri e sansal me koperment en Koht pahn kohdo ni ahnsou kohkohdo. Keieu Siohwa pahn ketin koasoanehdi sapwellime koperment oh kasapwilada Sises en wia Nanmwarki. Ia duwe, Sises ketin wiahla Nanmwarki ni ahnsowohte me e ketin pwuradalahng nanleng? Soh, e pahn anahne awih. Ahnsou kei daulih mwurin Sises eh ketin iasada, Piter oh Pohl koaros kasansalehda mwahu duwen met ni ahnsou me ira kadokepene kokohp en Melkahka 110:1 me pid Sises. Nan kokohpo Siohwa ketin mahsanih: “Ketidi met ni palimauni, I lao pahn wiahkihla omwi imwintihti kan utupen aluweluwomwi kan.” (Wiewia 2:32-35; Ipru 10:12, 13) Ia uwen werei Sises ketin anahne awiawih mwohn Siohwa pahn ketin kasapwilada ih ong Nanmwarki?

23. (a) Iahd me Sises ketin tepida kakaun nin duwen Nanmwarki en koperment en Koht? (b) Dahme kitail pahn sukuhlki nan irelaud en mwurin met?

²³ Sounpar tohto mwohn pahr 1914, ehu pwihn en Kristian mehlel wehwehkidahr me pahr wet pahn wia pahr kesempwal ehu nan kokohp en Paipel. Mwekid kan en sampah sangete nan pahr 1914 kadehdehda me irail pwung. Sises ketin tepida kakaun nin duwen Nanmwarki nan pahro. (Melkahka 110:2) Mwurinte mwo, Sehdan piskendidohng sampah, oh met “eh ahnsou mwotomwotalahr.” (Kaudiahl 12:12) Nan irelaud en mwurin met, kitail pahn kilang ekei mehn kadehde me kitail wie momour nan ahnsowo. Kitail pil pahn sukuhlki me ni ahnsou keren Wehin Koht uhdahn pahn kahrehiong kupwuren Koht en pweida nin sampah.​—Menlau kilang Ire kan 22.