Iren Mehn Kasukuhl 6
Dahkot Wehin Koht?
Ia wasa Wehin Koht kin mih ia? (1)
Ihs Nahnmwarkio? (2)
Mehteikan kin iang Nanmwarkio kakaun? Ma ehi, meh depe? (3)
Dahme kasansalehda me kitail wie memour ni imwin rahn akan? (4)
Dahme Wehin Koht pahn wiaiong aramas akan ni ahnsou kohkohdo? (5-7)
1. Ahnsou e ketiket nin sampah, Sises padahkiong sapwellime tohnpadahk kan en kapakapki Wehin Koht. Wehi, iei koperment ehu me nanmwarki men kin wia kakaun. Wehin Koht koperment tohrohr ehu. E kokouda nanleng, oh pahn kaunda sampah. E pahn kasarawihala, mwaren Koht. E pahn kahreong sapwellimen Koht kupwur en pweida nin sampah duwen eh kin wiawi nanleng.—Madiu 6:9, 10.
2. Koht inoukihda, me Sises pahn wiahla Nanmwarki nan Sapwellime Wehio. (Luk 1:30-33) Ahnsou Sises ketiket sampah, e kasalehda me e pahn wiahla Kaun unsek men, me kadek oh kopwungpwung. Ahnsou me e pwurdahla nanleng, e sohte wiahla Nanmwarki en Wehin Koht ni ahnsowohte. (Ipru 10:12, 13) Nan 1914, Siohwa ketikiong Sises manaman me E inoukihong ih. Sang ni ahnsowo lel met, Sises kakaun sang nanleng nin duwen Sapwellimen Siohwa Nanmwarki idihda men.—Daniel 7:13, 14.
3. Siohwa pil pilada ekei ohl oh lih lelepek kan sang sampah en kohdahla nanleng. Irail pahn mih pahn kaweid en Sises oh kakaun sampah nin duwen nanmwarki kan, sounkopwung kan, oh samworo kan. (Luk 22:28-30; Kaudiahl 5:9, 10) Sises kadaneki ienge kaun akan nan sapwellime Wehio “pwihn tikitiko.” Irail meh 144,000.—Luk 12:32; Kaudiahl 14:1-3.
4. Ni ahnsowohte me Sises wiahla Nanmwarki, e kausesang Sehdan oh nah tohnleng suwed kei sang nanleng, irail pisikendilahng sampah. Ih kahrepen sampah wet ah inenen suwedlahr tepidahsang nan pahr 1914. (Kaudiahl 12:9, 12) Mahwen kan, lehk, soumwahu lusulus, kekeiradahn dihp—mehpwukat koaros iei kisehn “kilelo” me kin kasalehda me Sises wia kakaun oh me koasondi wet mihlahr ni imwin rahn akan.—Madiu 24:3, 7, 8, 12; Luke 21:10, 11; 2 Timoty 3:1-5.
5. Ni ahnsou keren, Sises pahn kadeik aramas akan, katohrohrpeseng sihpw kan sang kuht kan nin duwen silipen sihpw men kin wia. “Sihpw kan” iei irail kan me kasalehdahr me re kin uhpaiong ih ni lelepek. Irail pahn ale mour soutuk nin sampah. “Kuht kan” iei irail kan me soikala Wehin Koht. (Madiu 25:31-34, 46) Ni ahnsou keren, Sises pahn kasohrehla irail kan koaros me kin rasehng kuht kan. (2 Deselonika 1:6-9) Ma ke men wiahla sapwellimen Sises “sihpw,” ke anahne rong rongamwahu en Wehio oh kapwaida dahme ke kin sukuhliki.—Madiu 24:14.
6. Sampah nan ahnsouwet kin katohrorpeseng ni wehi tohto. Ehu ehu wehi kin mih pahn pein eh koperment. Wehi pwukat kin kalapw mahwinpene. Ahpw Wehin Koht pahn wiliandi koperment en aramas koaros. E pahn wia koperment ehute oh kaunda sampah pwon. (Daniel 2:44) Eri, mahwin oh mwersuwed sohlahr pahn wiawi. Aramas koaros pahn kousoanpene ni limpoak oh minimin.—Maika 4:3, 4.
7. Erein Kaundahn Sises Pahr Kido, aramas lelepek kan pahn unsekla, oh sampah pwon pahn wiahla paradais. Oh ni imwin pahr kido, Sises pahn wiahdahr soahng koaros me Koht padahkiong ih en wia. Eri, e pahn kapwurehla Wehio rehn Seme. (1 Korint 15:24) Dahme ke soh padahkiong koampoakpomw kan oh kisehmw kan duwen dahme Wehin Koht pahn wia?
[Kilel nan pali 13]
Pahnangin kaundahn Sises, sohlahr kailok de lipilipilki aramas