Dahme Kahrehda Kitail En poakohng Sises?

MEDEWEHLA me ke mi nan pwoht pwoat me kikihrla. Ke pahn men emen en sewese iuk?— Ia duwen ma emen tounmeteikihla eh mour pwehn sewese iuk?— Ih me Sises Krais ketin wia. Duwehte me kitail sukuhlki nan Irelaud 37, e ketikihda sapwellime mour nin duwen tomw ehu pwehn komourkitailla.

Mehlel me Sises sohte ketin kapitkitailla sang duhla. Ke taman dahme e ketin kapitkitailsang loale?— Sang dihp oh mehla me kitail koaros sohsohki sang rehn Adam. Mendahki ekei aramas wiahda soahng kan me inenen suwed, Sises pil pwoukinirailla. Ia duwe, ke pahn kak tounmeteikihla ahmw mour pwehn sewese soangen aramaso?—

Paipel mahsanih: “Wiewia apwal ehu aramas en mehkihla aramas pwung men. A mweinele mie me pahn mehkihla aramas mwahu men.” Ahpw Paipel mahsanih me Sises ketin pwoukihla “aramas suwed kan.” Met pil iangahki aramas akan me sohte kin papah Koht! Paipel pil mahsanih: “Ni ahnsou me kitail mihmi nan dihp [wiewiahte me suwed], Krais ketin pwoukinkitailla.”​—Rom 5:6-8.

Ke kak tamanda emen wahnpoaron me kin wiahda me suwed mahso?— Wahnpoaron menet ntingihedi: “Krais Sises ketido nin sampah pwe en komourala me dipan akan. I suwedsang irail koaros.” Wahnpoaron me koasoia met iei Pohl. E koasoia me mahso e “pweipwei” oh e kin wiewiahte dahme suwed.​—1 Timoty 1:15; Taitus 3:3.

Medewe uwen limpoak me Koht sapwellimanki ni eh ketikihdo sapwellime Ohl pwehn pwoukihla aramas me kin wia me suwed! Menlau ale noumw Paipel oh wadek duwen met nan Sohn irelaud 3 iretikitik 16. E mahsanih: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.”

Sises ketin kadehde me e ahneki soangen limpoakohte me Semeo sapwellimanki. Mwein ke tamataman nan Irelaud 30 en pwuhk wet, kitail wadek duwen ekei lokolok kan me Sises lelohng pwohng me e selidio. E wisikla ni imwen Samworo Lapalap Kaiapas, wasa me irail kopwung ie. Sounkadehde likamw kan wisikdo oh wiahda likamw kei duwen Sises oh aramas ako pohr ih. Ih ahnsowo me Piter kahmahmkihla Sises. Nna kita pahn mwomwehda me kita iang mi wasao pwongo oh kilang soahng kan me wiawi.

Sises ketin pepehd pwongo pwon lao wasa rahnpeseng. Pwehki e sapwung en wia kopwung nipwong, samworo ko mwadangete likwerihpene Tohn Mwoalen Kopwung Lapalap en Mehn Suhs ko pwe ren pil wia ehu kopwung. Irail pwurehng karaunehki Sises me e ketin wiahda dihp ong Koht.

Mwuri, samworo ko salihedi Sises, oh wahla rehn Pailet iei kepina en Rom. Irail eri ndaiong Pailet: ‘Sises kin uhwong atail koperment. E anahne kamakamala.’ Ahpw Pailet wehwehki me samworo ako likamw. Pailet eri ndaiong irail: ‘I sohte diar mehkot sapwung rehn ohl menet. I pahn kasaledekala.’ Ahpw samworo ko oh meteikan werda oh nda: ‘Soh! Kemehla ih!’

Mwuri, Pailet pil song en ndaiong aramas ako me e pahn kasaledekihala Sises. Ahpw samworo ko kahrehiong pokono ren werda oh nda: ‘Ma ke pahn mweidala ih, ke pil iang uhwong atail koperment! Kemehla ih!’ Pokono ahpw mwoarongada laud. Ke ese dahme Pailet wia?—

E wia dahme aramas ako nda. Keieu, e mweidohng Sises en wokiwok. Eri mwuri, e ahpw kihong sounpei ko Sises pwe ren kemehla. Irail kihong elen tek ehu pohn moangen Sises oh kepitki ih ni arail kin poaridi mwowe. Irail eri kihong Sises lapalahn tuhke pwoat pwehn wahda oh re kahrehla ih likin kahnimwo nan wasa ehu me adaneki Wasahn Tihn Moang. Irail ahpw poasurdi peh ko oh neh ko nin tuhkeo wasao. Irail eri kauwada tuhkeo pwe Sises en langalang ie. Nta kereker sang Sises. E uhdahn weirek laud.

Sises sohte pwoula ni ahnsowohte. E ketin langalangte pohn tuhkeo. Kaunen samworo ko kapailoke ih. Oh aramas akan me keid wasao kin nda: ‘Ma Sapwellimen Koht komwi, komw keredihsang nin tuhken!’ Ahpw Sises mwahngih dahme Semeo ketin kadarodo pwehn wia. E mwahngih me e anahne ketikihda sapwellime mour unsek pwe kitail en kak ahneki koapworopwor en mour soutuk. Eri mpen kuloak siluh mwurin souwaso, Sises ahpw ketin ngihlaudida likweriong Semeo ih eri pwoula.​—Madiu 26:36–27:50; Mark 15:1; Luk 22:39–23:46; Sohn 18:1–19:30.

Ia uwen Sises eh ketin weksang Adam! Adam sohte kasalehda limpoak ong Koht. E sapeikiong Koht. Adam pil sohte kasalehda limpoak ong kitail. Pwehki e dipada, kitail koaros pil ipwidi nan dihp. Ahpw Sises ketin kasalehda limpoak ong Koht oh pil kitail. E kin ketin peikiong Koht ahnsou koaros. Oh e ketikihda sapwellime mour pwehn kak ketikihsang kahpwal me Adam wiahiong kitail.

Ke kin kalahnganki mehkot kaselel me Sises ketin wiahdahro?— Ni ahmw kin kapakap ong Koht, ke kin kalahnganki eh ketikihdo sapwellime Ohlo?— Wahnpoaron Pohl kin kalahnganki dahme Krais ketin wiahiong ih. Pohl ntingihdi me sapwellimen Koht Ohlo ‘ketin poakohng ie oh meirongkihong Koht pein ih pwehki ngehi.’ (Kalesia 2:20) Sises pil ketin pwoukihla kowe oh ngehi. E ketikihda sapwellime mour unsek pwe kitail en kak ahneki mour soutuk! Met wia kahrepe kesempwal ehu ong kitail en poakohng Sises.

Wahnpoaron Pohl ntinglahng Kristian akan nan kahnimw en Korint: “Limpoak en Krais me kamwakamwakid kiht.” Dahme limpoak en Krais anahne kamwakid kitail en wia? Dahme ke medewe?— Tehk dahme Pohl nda: “E ketin pwoukihla aramas koaros, pwe irail kan me momour, re dehr kin mourki pein ihr, ahpw re en kin mourkihte ih me pwoukinirailla.”​—2 Korint 5:14, 15.

Ke kak medewehda ekei ahl kan me ke kak kasalehda me ke kin momour pwehn kaperenda Krais?— Ehu ahl iei en padahkihong meteikan dahme ke sukuhlkier duwen ih. De medewe duwen met: Mwein ke kelekelehpw oh ahmw pahpa oh nohno de pil meteikan sohte kak kilang dahme ke wiewia. Ke pahn kilang kasdo kan de wia soahng kan me sohte pahn kaperenda Sises?— Tamataman me Sises ketin momour ahnsou wet oh e kak ketin kilang soahng koaros me kitail kin wia!

Pil ehu kahrepen atail pahn anahne poakohng Sises iei pwehki kitail men kahlemengih Siohwa. Sises mahsanih: “Semei kin poakohng ie.” Ke ese dahme kahrehda Siohwa ketin poakohng Sises oh dahme kahrehda kitail pil anahne poakohng Sises?— Pwehki Sises kupwurki en pwoula pwe kupwuren Koht en kak pweida. (Sohn 10:17) Eri, kitail wia dahme Paipel mahsanihong kitail en wia: “Nan amwail wialahr sapwellimen Koht seri kompoak kei, kumwail song en kahlemengih ih. Nan amwail mour kumwail weweidki limpoak, duwehte Krais eh ketin limpoak ong kitail oh ketin meirongkihla pein ih pwehki kitail.”​—Episos 5:1, 2.