Sises Pwoula nan Kolkoda

Kaunen samworo ko eri wahla Sises ni imwen kepinao. Pailet eri idek rehrail: ‘Dahme kumwail uhkihong ohl menet?’ Irail eri nda: ‘E kose me ih nanmwarki men!’ Pailet eri idek rehn Sises: “Kowe me en mehn Suhs akan ar Nanmwarki?” Sises eri sapeng, mahsanih: “Ei Wehi kaidehn kisehn sampah wet.”

Pailet eri kadarala Sises rehn Erod, kaunen Kalili, pwehn kilang ma e kak diarada ma mie mehkot sapwung rehn Sises. Erod sohte kak diarada mehkot sapwung rehn Sises, ih eri kapwurelahng rehn Pailet. Pailet eri ndaiong aramas ako: ‘Erod oh ngehi sohte kak diarada mehkot sapwung rehn ohlet. I pahn kasaledekala.’ Pokono ahpw werkihda, ndinda: ‘Kemehla! Kemehla!’ Sounpei ko ahpw kemehki Sises sahl pwoat, kendipih, oh poakihseli. Irail eri kihdiong mwaramwar tekatek ehu pohn tapwio oh kin kepitki ndinda: ‘Rahn kaselel ong komwi Nanmwarki en mehn Suhs kan.’ Pailet pil pwurehng ndaiong pokono: ‘Sohte mehkot sapwung ehu I diarada rehn ohl menet.’ Ahpw irail werkihda nda: ‘En posda pohn tuhkeo!’ Pailet eri kihla Sises rehrail pwe en kamakamala.

Irail eri wahla Sises wasa me adaneki Kolkoda, pasurdiong pohn tuhkeo, oh kauwada tuhkeo. Sises ketin kapakapki: ‘Semei, komw mahkohng irail, pwe re sehse dahme irail wiewia.’ Aramas akan kin wiahki Sises mehn kemenkouruhr, ndinda: ‘Ma kowe sapwellimen Koht ohl a ke doudihsang pohn tuhkehn! Doarehla pein kowe.’

Emen nanpwungen aramas suwed riemeno me langalang limwahn Sises ahpw nda: ‘Komw tamataman ie ni ahnsou me komw pahn ketilong nan omwi Wehi.’ Sises ketin inoukihong ih: ‘Ke pahn iang ie mi nan Paradais.’ Mwurin souwaso, nan wehwe ahpw rotala oh sahpwo wie rotorotki erein awa siluh. Ekei tohnpadahk ko kesikesihnen limwahn tuhkeo, iangahki Mery inen Sises. Sises mahsanihong Sohn en apwalih Mery oh wiahki ih duwehte pein eh nohno.

Sises eri mahsanih: “E imwiseklahr!” Ih eri kamwatawihedi tapwio oh ketin kadarala kaimwiseklahn eh esingek. Ni ahnsowohte, lapalahn rerrer en sahpw ehu pa wiawi. Nan tehnpas sarawio, kahdeng toutou me mi nanpwungen wasa Sarawio oh Wasa Sarawiheo ahpw pwalpeseng. Kaunen sounpei men me mi mwo ahpw nda: ‘Mehlelete me Sapwellimen Koht Ohlo met.’