E Kin Poakong Kisin Seri Kan

KILANG Sises wasaht poaloapene kisin pwutako. Ke kak ese me Sises uhdahn poakong me tikitik kan. Ohl kan me kilikilang iei sapwellime wahnpoaron kan. Dahme Sises mahmahsanih ong irail? Kitail pahn kilang.

Sises oh sapwellime wahnpoaron kan ahpwtehn pwurasang ehu sapsapal reirei. Ni arail kohkohdo pohn ahlo wahnpoaron kan akamaipene nanpwungarail. Eri mwehrin arail lel wasao Sises idek rehrail: ‘Dahme kumwail akamaiki pohn ahlo?’ Ni mehlel, Sises wehwehki dahme irail akamaiki. Ahpw e men idek peidek wet pwen kilang ma wahnpoaron kan pahn pein wehkada ong ih.

Wahnpoaron ko sohte sapeng, pwehki pohn ahlo irail akamaiki ihs me pahn keieu lapalap nanpwungarail. Ekei wahnpoaron ko mwahuki lapalap oh kesempwal sang mehteiko. Iaduen Sises pahn padahkiong irail me sapwung arail lamalam ong men keieu lapalap?

E alehda emen kisin pwutak, oh kauwada mworail koaros. Ih eri indaiong tohnpadahk kan: ‘I men kumwail en ese ire mehlel wet, Ma kumwail sohte pahn wekila oh wiahla duwehte kisin seri, kumwail sohte kak lelohng nan wehin Koht. Me keieu lapalap nan wehio pahn wiahla duwehte kisin seri menet.’ Kumwail ese dahme kahrehda Sises mahsanihki met?

Pwehki kisin seri tikitik sohte kin insenohki ma irail lapalap de kesempwal sang mehteikan. Ihme wahnpoaron kan en sukuhliki pwe arail lamalam en duwehla kisin seri oh ieremen akamaiki ihs me pahn keieu lapalap de kesempwal.

Pil mie ansou kan me Sises kasansalehda duen ah kesempwaliki kisin seri. Sounpahr kei mwuhri ekei aramas akan wahdo neirail seri kan pwen kilang Sises. Wahnpoaron kan song en irehdi met. Ahpw Sises padahkiong wahnpoaron ko: ‘Mweidong seri ko en kohdohng ie, oh dehr katokiedi irail, pwehki wehin Koht ahn me duwehte irail.’ Sises eri poaloapene seri ko, oh kapaiirailda. Kaidehn keieu mwahu en ese me Sises kin poakong kisin seri kan?