Pohn Ahlo Kohlahng Damaskus

KE ESE ihs ohlo me pwupwedihla nan pwel? Ede Saul. Tamataman, ih ohlo me apwahpwali sekid ko en ohl kan me kate Stepen. Kilang duen marain lingaling. Dahme wiawi?

Mwehrin Stepen kamakamala, Saul uhd tiehngala mwowe pwakihdi werek kan en Sises pwen kaloke irail. E pil kohieila nan ihmwen aramas pwukat oh waiksang irail nan ihmwarail oh kaseong nan imweteng. Irail tohnpadahk tohto tangalahng kahnihmw teikan oh tapiada kalohki “rohngamwahu” wasa ko. Ahpw Saul pil kohieilahng kahnihmw teikan pwen rapahkihda werek en Sises kan. Ansouwet e kohkohlahng Damaskus. Ahpw, ni arail kohkohwei, mehkot kapwuriamwei wiawi:

Wiahki tehieu marain sang nanleng sereda Saul. Ih eri pwupwedihla nan pwel, duen me kitail kilang wasaht. Ngihl ehu ahpw pwarada: ‘Saul, Saul! Dahme kahrehda ke wia me kamadak ong ie?’ Ohl kan me iang Saul kilang marain oh rong ngihlo, ahpw re sohte kak wehwehki dahme ngihlo koasoaia.

‘Ihs komwi, Maing?’ Saul patohan ong.

‘Ngehi Sises, me ke kin wiaiong me kamadak,’ ngihlo sapeng. Sises mahsanih met pwehki ni ansou me Saul kin kaloke ah werek kan, Sises kin wiahki met duwehte me wiawiong pein ih.

Saul eri idek: ‘Dahme I en wia, Kaun?’

‘Uhda oh kohla nan Damaskus,’ Sises mahsanih. ‘Wasao e pahn kohwong uhk dahme ken wia.’ Ni en Saul kesihnenda oh pehdpesang, e sohte kak kilang mehkot. E maskunlahr! Ohl kan me iang ih eri koledi peh oh kahluwa ih lahng Damaskus.

Sises eri mahsan ong emen sapwellime tohnpadahk ko nan Damaskus: ‘Uhda, Ananaias. Kohla nan ahl me adaneki Inen. Oh ni ihmwen Sudas idek emen ohl me adaneki Saul. I piladahr menet pwen wia ai ladu tohrohr.’

Ananaias peikiong. Ni ah tuhong Saul, e pwilikihdi peh pohn ih oh inda: ‘Kauno kadariehdo pwe ken pil pwurehng kilang wasa oh direkihla ngehn sarawi.’ Ansouohte mehkot duwehte wunen mwahmw pwupwedi sang ni mesen Saul, oh e kak pwurehng kilang wasa.

Saul kin doadoahk kehlail ni ah kalohk ong aramas kan en wehi tohto. Mwuhri aramas koaros esehla ih me iei wahnpoaron Paul, me kitail pil pahn sukuhliki soahng tohto duen ih. Ahpw mwohn met, kitail kilang dahme Koht poronehla Piter en wia.