Ripoht En Sounkalohk Kan En Wehio
Metel en Kaping ong Kingdom Hall Ieu
PALIEN mwakelekel nan Finland piladahr pahr 2000 en wia “Pahr en Kalinganahda Pohn Pwehlen Wasahn Kousoan.” Emen lih me kin iang koasoakoasoane mwekid wet koasoia me “kahrepen arail pilada oaralap me pid kalinganahda pwehlen wasahn kousoan en wia oaralap en pahro, pwe en katamankin kitail koaros me poh molomol en mehkan me pidakihkitailpene kin wia kamwahu ohng atail mour en rahn koaros oh pil atail nsenamwahu en rahn koaros.”
Ni January 12, 2001, kisinlikou ieu sang pwihn en aramas ieu nan Finland adaneki “Finnish Association of Landscape Industries” lelohngehr Branch Ohpis en Sounkadehdehn Siohwa kan nan Finland. Kisinlikouwo kawehwehda me Kingdom Hall en Sounkadehdehn Siohwa nan Tikkurila alehier kisinlikou en kaping oh alehdi metel en keieu mwahu nan pahro ong lingan en likin ihmw (landscaping) pwehki ah mwet ahnsou koaros oh koasoandi en likin ihmwo ah nohn lingan oh sonamwahu. Kisinlikouwo doula oh koasoia me “mwomwen koasoandi en likin ihmwo inenen kansenamwahu ong nan mesen aramas nan ahnsou en karakar oh pil nan ahnsou en lemwulemwur, ni lingan oh mwohmw.”
Metel wet kohda ong Sounkadehdehn Siohwa kan nan Rosendahl Hotel nan Tampere, Finland, nan wiepen kawahu ehu me aramas semen oh aramas en pisnis tohto sang 400 towehda. Pwihn en “Finnish Association of Landscape Industries” pil kihong nan nuhs oh koasoia: “Nan wasakis nan wehi wet, Kingdom Hall kan en Sounkadehdehn Siohwa kan kin inenen koasoandi mwahu oh lingan mehlel. Arail apwalih wasa pwukat kin kahrehong aramas akan me kin alu limwahr kan kin kapinga mehlel. Kingdom Hall me mih Tikkurila iei ehu mehn karasepe en mwetuwel en rohs me inenen kapwuriamwei. Paliweren ihmwo oh doadoahk me wiawihong soandi en likin ihmwo oh maledek en likin ihmwo kin kameleilei oh kaitarala loalen aramas.”
Nan Finland, mie Kingdom Hall 233, oh me tohto kin mie mwetuwel en rohs kapilpene. Ahpw, dahme uhdahn wiahiong soangen wasa pwukat ahr nohn lingan iei met: me wasa pwukat wia poahsoan en wasahn kaudok mehlel oh kasukuhl en Paipel. Ong irail Sounkadehdehn Siohwa kan me mih pohnangin aramas wenerar nan sampah pwon, arail Kingdom Hall kan me kin soandi mwahu oh mwakelekel kin wia wasahkis me irail kin poakohng. Iei me kahrehda irail kin nsenohki oh apwahpwalih kanahieng. Wenihmw en Kingdom Hall koaros kin ritingdahng tohn ahmw wasahn kousoan koaros!