Kaukaule Kapwaiada Dahme Ke Sukuhlikier
“Kumwail doadoahngki dahme kumwail sukuhlikier oh ale sang rehi, sang ni ei lokaia oh pil ei wiewia kan. Eri, Koht, me kin ketikihong kitail popohl, en ketin ieiang kumwail.”—PILIPAI 4:9.
1, 2. Paipel kin kamwekidada mouren aramas akan me dene irail kin kamehlele pelien lamalam akan? Kawewehda?
“PELIAN Lamalam Kin Kamwekid Aramas Tohto, ahpw Aramas Malaulau kin Tiahk Mwakelekel.” Oaralap wet me mih nan nuhspepa ehu, Emerging Trends, me koasoiada duwen roporop ieu me wiawihda nan Wehin United States pwon. E sansal me nan wehiet aramas tohtohla kin iang towehda sarawi oh nda me pelien lamalam iei mehkot kesempwal nan arail mour. Ahpw, ripoht kin kasalehda met: “Edetehn nempe en aramas me kin ndinda met kin tohtohla, mehn Amerika tohto sohte kin lemeleme me pelien lamalam akan kin wia mehkot mwahu ong mour en emen emen aramas akan oh aramas koaros kin sampah.”
2 Ahpw, irair wet sohte kin ihte wiawi nan ehute wehi. Nin sampah pwon, aramas tohto me kin nda me re kin kamehlele Paipel oh pelien lamalam, ahpw irail sohte kin mweidong Pwuhk Sarawi en ni mehlel kamwekid arail mour. (2 Timoty 3:5) Ohl emen me kin kaun en pwihn roporop ieu nda met, “Kitail kin kesempwaliki Pwuhk Sarawi, ahpw en uhdahn wadek, onop oh kapwaiada—met mehkot me aramas kin wiahda mahs.”
3. (a) Iaduwen Pwuhk Sarawi kin kamwekid mouren en aramas akan me kin wiahla Kristian mehlel akan? (b) Iaduwen sapwellimen Sises tohnpadahk kan kin kapwaiada kaweid en Pohl me ntingihdi nan pwuhken Pilipai 4:9?
3 Ahpw, ong irail Kristian mehlel akan, irairo kin weksang sampah wet. Pwehki irail kin kapwaiada kaweid me kin kohsang Mahsen en Koht, arail madamadau kan oh tiahk kan kin wekila. Oh mengei en aramas teikan en kilang duwen arail mour kapw. (Kolose 3:5-10) Ong aramas akan me kin idawehnla Sises, Pwuhk Sarawi kaidehn ehu pwuhk me kin ihte mih nan deuen pwuhk kan pwe pwelpar kin mihmi powe oh sohte me kin wadek. Ahpw weksang met, wahnpoaron Pohl padahkiong Kristian akan nan Pilipai: “Kumwail doadoahngki dahme kumwail sukuhlikier oh ale sang rehi, sang ni ei lokaia oh pil ei wiewia kan. Eri, Koht, me kin ketikihong kitail popohl, en ketin ieiang kumwail.” (Pilipai 4:9) Kristian akan kin wia laudsang ihte kamehlele padahk mehlel kan en Mahsen en Koht. Irail kin kapwaiada dahme irail kin sukuhliki, oh kaukaule kapwaiada kaweid me kin kohsang rehn Pwuhk Sarawi—nan arail mour en peneinei, nan arail wasahn doadoahk kan, nan mwomwohdiso, oh wasa teikan nan arail mour.
4. Dahme kahrehda e sohte mengei en kapwaiada sapwellimen Koht kosonned akan?
4 Kapwaiada sapwellimen Koht kosonned akan oh mouren kaweid akan kaidehn mehkot mengei ieu. Pwe kitail kin mih nan sampah wet me mih pahn manaman en Sehdan me Tepil, me Pwuhk Sarawi kin kahdaneki “koht en koasoandi suwed wet.” (2 Korint 4:4; 1 Sohn 5:19) Ihme kahrehda, e wia mehkot kesempwal ieu, kitail en liksang mehkan me pahn wia mehn kerempwa ieu ong kitail pwe kitail kak kolokolte atail lelepek ong Siohwa Koht. Iaduwen kitail kak kolokolete atail lelepek ong Koht?
Katengediong “ni Koasoandi en Mahsen Mehlel akan”
5. Ia wehwehn mahsen en Sises: “Idawehniehte”?
5 Ehu ahl me kitail kak kasalehda me kitail kin kapwaiada dahme kitail sukuhlikier, ma kitail pahn ni lelepek utungada kaudok mehlel, edetehn kitail kin lelong kalokolok sang rehn aramas soh-pwoson akan. Irairen dadaur kin wehwehki me emen anahne en nannanti. Sises mahsanih, “Mehmen me men idawehniehdo, en tounmeteikihla pein ih, kapaikada eh [tuhke en kalokolok] oh idawehniehte.” (Madiu 16:24) Sises sohte mahsanih me kitail anahne idawehnla ih ni erein wihk ehute, de sounpwong ehute, de sounpar ehute. Ahpw, e mahsanih: “Idawehniehte.” Sapwellime mahsan ako kin kasalehda me atail kin wiahla sapwellime tohnpadahk kan sohte kak wia met ni ahnsoukis nan atail mour, de atail lelepek pahn kehlail rahnwet ahpw lakapw pahn sohlahr lelepek. Ni lelepek kapwaiada kaudok mehlel kin wehwehki me kitail pahn ni lelepek dadaurete dahme kitail pein pilada, sohte lipilipil dahme pahn wiawi. Iaduwen kitail kak wia met?
6. Ia wehwehn koasoandi en mahsen mehlel akan me Kristian akan nan keieun senturi sukuhlikier sang rehn Pohl?
6 Pohl kin kangoange ienge tohndoadoahk Timoty: “Eri, katengeiukediong ni [koasondi en] mahsen mehlel kan me I padahkihonguhkehr, pwe en wiahla mehn kahlemengih ehu ong kowe pwe ke en idawehn. Oh pil katengeiukediong nan pwoson oh limpoak me kitail ahnekipene ni atail miniminiong Krais Sises.” (2 Timoty 1:13) Ia wehwehn mahsen en Pohl? Lepin lokaia wet ni lokaiahn Krihk, “koasondi” kin uhdahn wehwehki doadoahk en sounmahlen emen me wia mahlen ehu ahpw saikinte wiawihda ni oaretik. Edetehn mahleno saikinte wiawihda ni oaretik, ahpw mwomwen mahleno sansalehr, eri aramas teikan kakehr ese ia mwomwen mahleno ahnsou e pahn nek. Duwehte met, koasoandi en padahk mehlel me Pohl padahkiong Timoty oh aramas teikan sohte wiawihda pwen sapengki peidek kan koaros ni oaretik. Ahpw, koasoandi en padahk pwukat kin kihda kaweid me pahn itar ong kitail—mwomwen mahlen ieu ahpw saikinte wiawihda ni oaretik—pwe aramas mehlel akan pahn kak dehdehki dahme Siohwa kupwurki irail en wia. Pwen kaperenda Koht, irail pahn anahne en katengediong koasondi en padahk mehlel ki arail kin kapwaiada dahme re kin sukuhlikier.
7. Iaduwen Kristian akan pahn kak katengediong mahsen mehlel kan?
7 Nan keieun senturi, aramas pwukat duwehte Imenius, Aleksander, oh Pailihdus kin utungada madamadau kan me sohte kin pahrekiong “koasoandi en mahsen mehlel akan.” (1 Timoty 1:18-20; 2 Timoty 2:16, 17) Iaduwen irail tepin Kristian akan kak perehla pein irail sang aramas pwukat me kin lahlahwe padahk mehlel. Sang ni arail pahn nantihong onop Pwuhk Sarawi oh kapwaiada. Irail akan me kin idawehnla mehn kahlemeng en Pohl oh aramas lelepek teikan kin kak pohnese oh soikala mehkan me sohte kin pahrekiong koasoandi en padahk mehlel me re padahngkier. (Pilipai 3:17; Ipru 5:14) Irail sohte kin “ahneki ineng suwed en akpwung oh akamaiki duwen lepin lokaia kan,” ahpw irail kin pousehla kekeid ni ahl pwung en lelepek ong Koht. (1 Timoty 6:3-6) Kitail pil kak wia met ni ahnsou me kitail kin kapwaiada padahk mehlel kan me kitail kin sukuhlikier. E kin kakehlahda atail pwoson en kilang aramas rar kei me kin papah Siohwa nin sampah pwon oh katengediong koasoandi en padahk mehlel en Pwuhk Sarawi me irail sukuhlikier.—1 Deselonika 1:2-5.
Pohnsehse “Koasoi Likamw akan”
8. (a) Rahnwet, iaduwen Sehdan kin song en kauwehla atail pwoson? (b) Mehnia kaweid Pohl kihda me dierkda nan 2 Timoty 4:3, 4?
8 Sehdan kin song en kauwehla atail lelepek ni ah kin kahrehong kitail en tepida peikasalki dahme kitail sukuhlikier. Rahnwet, duwehte nan keieun senturi, mie aramas akan me kin lahlahwe padahk mehlel oh pil aramas teikan me kin nantihong kauwehla pwoson en aramas pwung kan. (Kalesia 2:4; 5:7, 8) Ekei ahnsou irail kin doadoahngki TV de radio oh nuhspepa en pakairseli nuhs kan me sohte pwung de wiahda koasoi likamw duwen koasoandi kan oh pepehm akan en sapwellimen Siohwa aramas akan. Pohl kin nda me ekei aramas pahn sohpeiweisang padahk mehlelo. E ntingihdi, “Pwe ahnsou ehu pahn leledo me aramas akan sohla pahn men rong padahk mehlel, ahpw re pahn idawehnla pein nsenarail; oh re pahn piladahng pein irail sounpadahk tohto me pahn kin koasoiaiong irail soahng kan me re kin men rong. Re pahn sohpeiweisang ni ar rongorong me mehlelo, oh mweidohng ar ahnsou koasoi likamw akan.”—2 Timoty 4:3, 4, NW.
9. Ele mwein dahme Pohl kin medemedewe ni ahnsou me e koasoia duwen “koasoi likamw akan”?
9 Ekei aramas sohte kin katengediong irail koasoandi en mahsen mehlel akan, ahpw re kin perenkihda “koasoi likamw akan.” Ia wehwehn koasoi likamw akan? Mwein Pohl kin medemedewe duwen koasoi likamw akan me duwehte poadopoad akan me kin dierekda nan pwuhken Tobit.a Koasoi likamw akan mwein kin pil pid koasoi me kin kalaudehla dahme uhdahn wiawi. Oh pil ekei aramas—“re idawehnla pein nsenarail”—ele mwein aramas teikan me sohte kin nohn kesempwaliki sapwellimen Koht koasoandi kan de irail akan kin kauwe aramas akan me kin apwalih mwomwohdiso oh dene me re kin pitihdi irail. (3 Sohn 9, 10; Sud 4) Sohte lipilipil mehn kerempwa dah kei kin kohda, e sansal me ekei aramas kin pwungki padahk likamw akan sang padahk mehlel akan en Mahsen en Koht. Irail uhd sohlahr kapwaiada dahme re sukuhlikier, oh met kin imwikihla suwed ni pali ngehn ong irail.—2 Piter 3:15, 16.
10. Ia ekei koasoi likamw akan me kin wiawi nan rahnpwukat, oh iaduwen Sohn kasansalehda kesempwalpen kitail en kanahieng?
10 Rahnwet, kitail kak liksang poadopoad mwahl akan ma kitail pahn tehk oh pilada mwahu dahme kitail kin rongorong oh wadek. Karasepe ieu, pelian nuhs kan kin kalapw utungada dipen nenek. Aramas tohto kin kangoange padahk me aramas akan sohte kin nohn wehwehki ma mie Koht de soh de ehu lamalam me aramas kin lemeleme me sohte Koht. Aramas akan me kin kasawihada Pwuhk Sarawi pwehn kauwe oh nda me Pwuhk Sarawi sohte kin kohsang rehn Koht. Aramas me kin lahlahwe padahk mehlel nan rahnpwukat kin nantihong kaluwetala Kristian akan pwe ren peikasalki arail pwoson. Wahnpoaron Sohn kaleke Kristian akan nan keieun senturi duwen keper ieu me irail soukohp likamw akan kak wiaiong irail: “Kompoakepahi kesempwal ko! Kumwail dehr kamehlele irail koaros me kin koasoia me ngehn sarawio kin ketiket rehrail, ahpw kumwail song irail pwe kumwail en wehwehki ma ngehn me mihmi rehrailo iei ngehno me ketido sang rehn Koht. Pwehki soukohp likamw tohto kin kohkohseli wasa koaros.” (1 Sohn 4:1) Eri, kitail anahne kanahieng.
11. Ia ehu ahl en song pein kitail pwen kilang ma kitail kin mih nan pwoson de soh?
11 Me pid ire wet, Pohl ntingihdi: “Kumwail kalelapak oh wia keseupen pein kumwail ma kumwail weweidki pwoson.” (2 Korint 13:5) Wahnpoarono kin kangoangehkin kitail en wia keseupen pein kitail ma kitail kin kapwaiada padahk en Kristian akan koaros. Ma kitail kin perenki rong de pwungki aramas akan me kin rapahki sapwung en mehteikan, eri, kitail anahne en wia keseupen pein kitail oh kapakap. (Melkahka 139:23, 24) Kitail kin ahnla rapahki sapwung kan en sapwellimen Siohwa aramas akan? Ma iei, eri dahme kahrehda kitail kin kalap wia met? Aramas emen me kansensuwedihala kitail sang eh lokaia kan de wiewia kan? Ma iei, kitail kin kilangwong irair wet ni ahl me pwung oh konehng? Kahpwal akan me kitail kin lelong nan koasoandi en ahnsouwet sohte pahn wiawi ni ahnsou kohkohlahte. (2 Korint 4:17) Edetehn kitail pahn lelohng kahpwal ieu nan mwomwohdiso, e konehng kitail en uhdi sang atail kin papah Koht? Ma kitail kin nsensuwed pahn emen, e soh pahn mwahu ma kitail en wia uwen atail kak en kapwungala kahpwalo oh mweidong Siohwa atail pwunod akan?—Melkahka 4:4; Lepin Padahk 3:5, 6; Episos 4:26.
12. Mehn kahlemeng dahieu me irail mehn Peria kan wia ong kitail?
12 Kitail en dehr kauwe aramas, ahpw kitail en kolokolete madamadau mwahu duwen ire kesempwal kan me kitail kin alehdi sang pein atail onop Paipel oh mihding en mwomwohdiso kan. (1 Korint 2:14, 15) Oh kitail en dehr peikasalki Mahsen en Koht, ahpw elen loalokong ieu en ahneki madamadau en mehn Peria kan nan keieun senturi me kin onop mwahu Pwuhk Sarawi! (Wiewia 17:10, 11) Eri, kitail en nantihong kapwaiada dahme kitail sukuhliki, pohnsehse koasoi likamw akan oh katengehdiong padahk mehlel.
13. Iaduwen kitail kak ehukihong meteikan koasoia likamw akan edetehn kitail sehse?
13 Pil mie ehu koasoi likamw me kitail anahne kaleke. Ekspiriens tohto oh koasoi tohto kin kohkohseli rehn aramas akan, keieu sang E-mail. Elen loalokong en kanahieng duwen koasoi pwukat, keieu ma kitail sehse ihs me tepin nda duwen koasoi pwukat. Mendahki ekspiriens de koasoi me kohsang rehn emen Kristian adamwahu, kitail en tehk mwahu pwehki mwein e sohte uhdahn pein rong oh kilang ekspiriens de koasoio. Ihme kahrehda e kesempwal en kanahieng en dehr koasoiong aramas teikan ekspiriens kan me kitail rongehr ma kitail sehse iawasa ekspirienso de koasoio kohsang ie. Kitail sohte men pwurehng koasoia duwen “poadopoad akan me kin uhwong Koht,” de “koasoi likamw akan me kin kauwehla dahme sarawi.” (1 Timoty 4:7; New International Version) Pwehki kitail pil kin pwukoahki en koasoi mehlel nanpwungatail, elen loalokong kitail en liksang mehkan me pahn kahrehong kitail en koasoiong meteikan likamw akan edetehn kitail sehse.—Episos 4:25.
Kapai Kan Sang Kapwaiada Padahk Mehlel
14. Kapai dah kei kin imwikihla sang atail kin kapwaiada dahme kitail sukuhlikier sang Mahsen en Koht?
14 Kapwaiada dahme kitail kin sukuhliki sang pein atail onop Paipel oh mihding en Kristian akan pahn imwikihla kapai tohto. Karasepe ieu, ele mwein kitail pahn kilang me atail nanpwungmwahu rehn irail akan me kin iang pwosono pahn mwahula. (Kalesia 6:10) Pein atail irair akan pahn wekidekla oh mwahula ni ahnsou me kitail kin kapwaiada kaweid akan en Paipel. (Melkahka 19:8) Oh pil, ma kitail pahn kapwaiada dahme kitail kin sukuhlikier, kitail kin ‘kalinganahda sapwellimen Koht padahk kan’ oh kitail kin kak kahrehong aramas teikan en pedolong nan kaudok mehlelo.—Taitus 2:6-10.
15. (a) Iaduwen emen pwulopwul kin ni eimah kalohk ong meteikan nan eh wasahn sukuhl? (b) Dahme ke sukuhliki sang ekspiriens wet?
15 Nanpwungen Sounkadehdehn Siohwa kan, me pwulopwul tohto me kin kapwaiada dahme re kin sukuhlikier sang pein arail onop Paipel oh sawaspen Paipel en Kristian oh ahr kin kaukaule iang towehda mihding en mwomwohdiso kan. Arail tiahk mwakelekel kin wia mehn kadehde kehlail ong arail sounpadahk kan oh iengarail tohnsukuhl akan. (1 Piter 2:12) Medemedewe duwen Leslie, emen serepein me sounpar 13 nan wehin United States. E wehkada me e kin apwaliki koasoiong ienge tohnsukuhl akan duwen eh pwoson, ahpw ehu rahn e wekila. “Nan ahi class, irail kin koasoia duwen aramas akan kin netikihong aramas mehkot. Emen serepein kihda peh oh koasoiada duwen Sounkadehdehn Siohwa kan.” Nin duwen emen Sounkadehde, iaduwen Leslie mwekidki dahme serepeino koasoiada? E nda, “I utungada ahi pwoson, oh I lemeleme me koaros pwuriamweikihla ahi wia met, pwehki I kin wia aramas nennen nan sukuhl ahnsou koaros.” Ia imwilahn ahn Leslie kasalehda eimah? Leslie koasoia, “Pwehki emen tohnsukuhl mie eh peidek kan, I kihong ih brochure oh tract ehu.” Ia uwen laud Siohwa kin peren ni ahnsou me irail me pwulopwul kan kin kapwaiada dahme re sukuhlkier oh ni eimah kadehde ong aramas teikan nan arail wasahn sukuhl!—Lepin Padahk 27:11; Ipru 6:10.
16. Iaduwen Theocratic Ministry School kapaiada Sounkadehde pwulopwul emen?
16 Pil ehu mehn kahlemeng mwahu iei emen me adaneki Elizabeth. Tepida sang ni ahnsou me e sounpar isuh oh erein e kin iang sukuhl en elementary, serepein pwulopwul menet kin luhke ah sounpadahk kan en kohla ni Kingdom Hall ni ahnsou e pahn wia padahk nan Theocratic Ministry School. Ma emen sounpadahk sohte kak iang towehda mihdingo, Elizabeth kin wia eh padahk ong sounpadahko mwurin sukuhl. Nan kaimwiseklahn pahr nan high school, Elizabeth ntingihdi ripoht ehu me reireiki pali eisek me pid duwen kapai kan en Theocratic Ministry School oh e wiahda eh padahk mwohn sounpadahk pahmeno. Sounpadahk kan pil luhke ih en wia ehu padahk en Theocratic Ministry School, oh e pilada oaralap wet “Dahme Kahrehda Koht kin Mweidong Suwed en Mihmihte?” Elizabeth kin paiekihda prokram en kasukuhl ieu me Sounkadehdehn Siohwa kan kin wia ong arail Theocratic Ministry School. Ih emen sang rehn me Kristian pwulopwul tohto me kin kapinga Siohwa ki arail kin kapwaiada dahme re kin sukuhliki sang sapwellime Mahsen.
17, 18. (a) Pwuhk Sarawi kin kihda mehnia kaweid me kin pid mehlel? (b) Iaduwen ohl emen mwekidkihda tiahk mehlel me emen Sounkadehdehn Siohwa kan kasalehong ih?
17 Pwuhk Sarawi kin kaweidih Kristian akan en mehlel ni arail wiewia kan koaros. (Ipru 13:18) Ma kitail sohte pahn mehlel, met pahn kak kauwehla atail nanpwung mwahu rehn aramas teikan oh me keieu kesempwal atail nanpwung mwahu rehn Siohwa Koht. (Lepin Padahk 12:22) Atail kin mehlel ahnsou koaros kin wia mehn kadehde ieu me kitail kin kapwaiada dahme kitail sukuhlikier, oh met kin kahrehong aramas tohto en wauneki Sounkadehdehn Siohwa kan.
18 Tehk duwen ekspiriens en ohl emen me iang sounpei, adaneki Phillip. Nah check me e sainihla salongala, ahpw e sehse me nah check salongala lao ni ahnsou emen kapwurehdo check nan mail. Emen Sounkadehdehn Siohwa me diarada check, oh e ntingihdi kisin note me nda me padahk kan en ah pelien lamalam kin kahrehong ih en kapwurehla checko. Phillip inenen pwuriamweikihla. “Irail kakete pirapasang ie $9,000!” Pwe ahnsou ehu mwowe, emen pirapasang ih ah lisoarop nan eh ihmw sarawi. E sansal me emen me ese ih me pirap ah lisoarop, ahpw emen me e sehse me kapwurehla reh check ehu me wehte toala kid kei! Ei, Kristian akan me kin mehlel kin kawahuwih Siohwa Koht!
Kaukaule Kapwaiada Dahme Ke Sukuhlikier
19, 20. Iaduwen kitail kak paiekihda sang atail kin kapwaiada dahme kitail padahngki sang Pwuhk Sarawi?
19 Irail akan me kin kapwaiada dahme irail kin sukuhliki sang Mahsen en Koht kin alehdi kapai tohto. Tohnpadahk Seims ntingihdi: “A me kin tehk mwahu kosonned unseko me kin kasaledekla aramas, me iei rongamwahu en Krais, oh kin dadaurete, sohte kin rongete oh manokehla, ahpw kapwaiada—iei aramas menet me Koht pahn ketin kapaiahda ni mehkoaros me e pahn kin wia.” (Seims 1:25) Ei, ma kitail kin kapwaiada iren Pwuhk Sarawi me kitail sukuhlikier, kitail pahn ale peren mehlel oh kitail pahn kak powehdi kapwal akan me kin pwarada nan atail mour. Keieu, kitail pahn ale sapwellimen Siohwa kapai kan oh koapworopwor en mour soutuk!—Lepin Padahk 10:22; 1 Timoty 6:6.
20 Eri, ken wia uwen me ke kak en kaukaule onop Mahsen en Koht. Kaukaule pokonpene rehn tohnkaudok kan en Siohwa, oh rong kanahieng audepen mihding en Kristian akan. Kapwaiada dahme ke sukuhlikier, oh kaukaule kapwaiada, oh “Koht me kin ketikihong kitail popohl, en ketin ieiang kumwail.”—Pilipai 4:9.
[Nting tikitik me mi pahs]
a Tobit, mwein ehu pwuhk me ntingihdi nan kasiluhn senturi B.C.E., audepe kin koasoiada duwen koasoi ieu me kin pid mehn Suhs emen me adaneki Tobias. E ahneki manaman en kamwahuwihala aramas akan oh manaman en kausesang ngehn saut akan ki doadoahngki mongiong, gall, oh eh en mwahmw kalaimwun ehu.
Ke Tamanda?
• Ia wehwehn “koasondi en mahsen mehlel akan,” oh iaduwen kitail kak katengehdiong mahsen pwukat?
• Mehnia “koasoi likamw akan” kitail anahne en soikala?
• Aramas akan me kin kapwaiada dahme re kin sukuhliki sang Mahsen en Koht kin ale soangen kapai dah kan?
[Kilel nan Pali 15]
Iaduwen irail tepin Kristian akan kak soikala aramas akan me kin lahlahwe padahk mehlel oh dehr lohdi pahrail?
[Kilels nan Pali 16]
Madamadau en peikasal pahn kakete kohsang nuhs kan, Internet, oh irail aramas akan en rahnwet me kin lahlahwe padahk mehlel
[Kilel nan Pali 17]
Sohte elen loalokong en kihseli ripoht de nuhs kan me ke sohte wehwehki ihs me uhdahn tepikihda koasoi pwukat
[Kilels nan Pali 18]
Nan wasahn doadoahk, sukuhl, oh wasa teikan, Sounkadehdehn Siohwa kan kin kapwaiada dahme irail kin wadek nan Mahsen en Koht