Dehr Saminkihla Kaudok Likamw!
Siohwa mahsanih,“Kumwail uhdahn pahn pweieksang rehrail, oh tohrohreweisang irail. Kumwail dehr sair mehkot samin rehrail.”—2 KORINT 6:17.
1. Soangen irair dah kan me irail aramas lamalam mehlel tohto kin mihla loale me pid duwen pali ngehn?
ARAMAS lamalam mehlel tohto sohte ese padahk mehlel me pid Koht oh imwilahn tohnsampah. Pwehki arail sohte kak diar pasapeng kan ong arail madamadau loal akan me pid pali ngehn, irail kin pingada oh ahr kin ahneki lamalam en peikasal. Aramas rar kei kin kamehlele kaweid en kilinwo, tiahk kan, oh wia kasarawi kan me atail Sounkapikada kin kalahdeki. Mwein ele mie ahmw peneinei de mehn mpomw kan me kin kamehlele duwen kisiniei nan ehl, oh padahk en Trinity, oh pil kamehlele me mie ngenin aramas me sohte kak mehla, de pil ekei padahk likamw teikan.
2. Dahme kaunen pelien lamalam akan wiadahr, oh ia imwilahn met?
2 Dahme kahrehong rotorot en pali ngehn ah nohn rek rahnwet? E inenen kapwuriamwei pwe met kin kohsang palien sarawi—ahpw mehlel pwihn en sarawi oh arail kaun akan me kin kakehla madamadau kan me uhwong kupwuren Koht. (Mark 7:7, 8) Met kin imwikihla aramas tohto en alehdi kaweid likamw oh kamehlele me irail kin kaudokiong Koht mehlelo, ahpw ni mehlel re kin kansensuwedihala Ih. Sarawi likamw me pwukoahki soangen irair kansensuwed wet.
3. Ihs me wia poahsoanpen oh utupen kaudok likamw, oh iaduwen Paipel ah kawehwehda duwen ih?
3 Mie emen me sohte sansal me kin utungada sarawi likamw. Pohl mahsanih met duwen ih: “Re sohte kin pwoson, pwehki nan kapehdirail kan rotorotkilahr koht suwed en sampah wet. Koht menet kin karotongeirailla pwe re dehr kilang marain me dakedaker irail, marain en Rongamwahu duwen lingan en Krais, me uhdahn duwehte mwomwen Koht.” (2 Korint 4:4) “Koht suwed en sampah wet” iei Sehdan me Tepil. Ih me wia poahsoanpen oh utupen kaudok likamw. Pohl ntingihdi, “Eri, kaidehk mehkot kapwuriamwei ehu met. Pwe Sehdan pil kak kawekala pein ih, oh mwomwehda tohnleng en marain! Eri, iei me kaidehk mehkot kapwuriamwei ehu ma eh lidu kan pahn pil kawekala pein ihr, pwehn mwomwehda lidun me pwung. Ahpw, ni imwilah re pahn ale pwaisarail duwen ar wiewia kan.” (2 Korint 11:14, 15) Sehdan kin wiahda pwe mehkan me suwed en kin mwomwen wia mehkot mwahu, oh e kin pitihdi aramas akan en kamehlele mehkan me likamw.
4. Dahme sapwellimen Koht Kosonned ong mehn Israel en kawao mahsanih duwen soukohp likamw akan?
4 Ihme kahrehda, e sohte kapwuriamweiki Paipel ah nohn kadeikada kaudok likamw! Karasepe, Kosonned en Moses kehkehlikiong sapwellimen Koht aramas pilipil akan en dehr rong soukohp likamw akan. Aramas emen me pahn utungada padahk likamw akan oh sarawi en koht likamw akan pahn ‘kamala pwehki arail koasoi uhwongada Siohwa!’ Pahngok kohwong mehn Israel akan en ‘kamwakelehsang dahme suwed sang nanpwungarail.’ (Deuderonomi 13:1-5) Ei, Siohwa kin wiahki kaudok likamw mehkot suwed.—Esekiel 13:3.
5. Mehnia kehkehlik kan me kitail en tehk oh kapwaiada nan rahnwet?
5 Sises oh sapwellime wahnpoaron akan kin kasalehda duwen sapwellimen Siohwa kupwur kehlail akan me pid sarawi likamw. Sises kehkehlikiong sapwellime tohnpadahk kan: “Kumwail kalekeikumwailsang soukohp likamw akan, me kin pwarodohng kumwail ni mwomwen sihpw, a loalarail re uhdahn rasehng kidien wel kan.” (Madiu 7:15; Mark 13:22, 23) Pohl ntingihdi me “engieng en Koht kin sansalda sang nanleng pwehki soangen dihp oh pil soangen suwed koaros en aramas akan, me arail wiewia suwed kan kin keremwpwehsang aramas akan en esehla me mehlelo.” (Rom 1:18) Ia uwen ah nohn kesempwal me Kristian mehlel akan en kapwaiada kehkehlik pwukat oh dehr patehng aramas emen me kin kamwamwahlihala padahk mehlel duwen sapwellimen Koht Mahsen de pil kin iang kihseli padahk sapwung!—1 Sohn 4:1.
Tangasang “Papilon Lapalap”
6. Iaduwen Paipel kin kawehwehda duwen “Papilon Lapalap”?
6 Tehk duwen Paipel pwuhken Kaudiahl a kawehwehda duwen sarawi likamw. E kin duwehte lihen netiki paliwar me sakaulahr oh kin ahneki manaman pohn wehi tohto oh neirail aramas akan. Lih karasaras menet kin wia nenek rehn nanmwarki tohto oh sakaukihla ntahn sapwellimen Koht tohnkaudok mehlel akan. (Kaudiahl 17:1, 2, 6, 18) Mie ede me nting nin temweo, oh ahd wet kin pahrekiong ah wiewia suwed oh kasaut kan. Ahdo iei “Papilon Lapalap, inen lihen netiki paliwere koaros oh wiewia samin suwed koaros en sampah.”—Kaudiahl 17:5.
7, 8. Iaduwen sarawi likamw ah kin netiki paliwere, oh ia imwilahn met?
7 Kawehwehn iren Pwuhk Sarawi duwen Papilon Lapalap pahrekiong minimin en kaudok likamw kan. Mendahte soangsoangen sarawi kid kei sohte mwomwen me re patpene wia pwihn tehieu, irail kolokolpene teng ni koasoandi oh wiewia. Nin duwen ah wia mwomwen lih suwed emen nan pwuhken Kaudiahl, sarawi likamw kan kin ahneki manaman laud pohn koperment kan. Duwehte lih pwopwoud salelepek men, sarawi likamw kin netiki paliwere ni ah kin ehuiong oh patehng ehu ehu palien politik kehlail akan. Tohnpadahk Seims ntingihdi, “Soaloalopwoat amwailen! Kumwail sehse me amwail limpoakohng sampah wet wehwehki imwintihti ong Koht? Mehmen me kin inengieng kompoakepahnki sampah wet, iei ih imwintihti en Koht.”—Seims 4:4.
8 Wiewiahn ehupenehn sarawi likamw oh koperment kin imwikihla lokolok ong tohnsampah. Semen en tetehk palien politik Dr. Xolela Mangcu tehkada me “poadoapoad en sampah direkihla mehn kadehde kan me kemehla pwihn en aramas akan kin wiawi ni ahnsou me palien sarawi oh politik kin ehupene.” Ehu nuhspepa nan ahnsouwet koasoia: “Kakerehdi nta me keieu laud oh akamai keper kan rahnwet kin pwarada nan pelien sarawi.” Aramas rar kei kin kamala pwehki pingiping kan me sarawi kin utungada. Papilon Lapalap kin kaloke oh kemehla sapwellimen Koht ladu mehlel akan, oh ni karasaras, irail kin sakaukihla ntahrail kan.—Kaudiahl 18:24.
9. Iaduwen Siohwa ah ketin kalahdeki kaudok likamw a sansalada nan pwuhken Kaudiahl?
9 Sang ni dahme wiawihong Papilon Lapalap, e sansal me Siohwa ketin kalahdeki sarawi likamw. Kaudiahl 17:16 mahsanih: “Kode eisek me ke kilangehr oh mahn kamasepwehko pahn kailongkihla lih suwedo. Re pahn kihsang mehkoaros me e ahneki oh kakilisawihada. Mwuhr, re ahpw pahn kangala uduke oh kamwomwkihla kisiniei.” Keieu, mahn lawalo men ilahseli ih oh kemehla oh kangasang uduke kan. Mwuri, dahme luwehdi ni paliwero eri isihsla nek. Ni mwohmw wet, ahnsou keren, koperment en sampah kan pahn wia met ong sarawi likamw kan. Koht me pahn kamwekid met en wiawi. (Kaudiahl 17:17) Papilon Lapalap, me iei minimin en kaudok likamw koaros, pahn ohla. “Ih duwen kahnimw lapalap Papilon eh pahn lekdekla, oh sohla me pahn kilang mwomwe.”—Kaudiahl 18:21.
10. Ia pahn mwomwen atail madamadau ong sarawi likamw?
10 Ia mwomwen pahn madamadau en tohnkaudok mehlel akan me pid Papilon Lapalap? Pahngok en Paipel sansal mwahu ni ah mahsanih: “I ahpw rongada pil ehu ngihl sang nanleng me mahsanih, “Kumwail, nei aramas akan, kumwail tang! Kumwail tangasang! Kumwail dehr iang wia dipe kan, pwe kumwail en dehr iang lokolongki!” (Kaudiahl 18:4) Aramas akan me men mourla uhdahn pahn pedoisang kaudok likamw mwohn ah pahn pwandala. Ni ahnsou me Sises ketiket nin sampah, e ketin kohpada me, ni imwin rahn akan, aramas tohto pahn ndahte me re kin idawehn ih. (Madiu 24:3-5) Ong soangen aramas pwukat, Sises mahsanih: “A ngehi I ahpw pahn ndahng irail, ‘I sohte mwahn esei kumwail. Kumwail kohkohweisang ie, pwe I sehse kumwail, kumwail me mouren tiahk suwed kan!’” (Madiu 7:23) Sises Krais, me ahnsouwet mwoaledier mwoalen Nanmwarki, sohte kupwurki sarawi likamw.
En Soikala—Iaduwe?
11. Dahme kitail en wia pwehn soikala kaudok likamw?
11 Kristian mehlel akan kin soikala kaudok likamw, oh irail sohte kin iang wia padahk kan en sarawi likamw. Met wehwehki me kitail sohte pahn kilang oh rong prokram en sarawi kan nan TV oh radio oh kitail sohte pahn pil wadek pwuhken sarawi kan me kin koasoia koasoi likamw akan duwen Koht oh sapwellime Mahsen. (Melkahka 119:37) E pahn mwahu ma kitail sohte pahn iang kapokon akan oh mwadong kan me mie utuht sang kaudok likamw. Patehng met, kitail sohte pahn utungada sarawi likamw ni soangen ahl soh lipilipil. (1 Korint 10:21) Kapwaiada soahng pwukat kin pere kitail sang irail me kin “pitihdi aramas ni arail doadoahngki loalokong widing mwahl en aramas akan, me re kin alehdi sang ni padahk kodoudou en mehn kawa ko, oh sang rehn ngehn suwed akan me kin kakaun wasa nin sampah, a kaidehn sang rehn Krais.”—Kolose 2:8.
12. Iaduwen aramas men ah kak katohrohrsang pwihn en sarawi likamw ehu?
12 Iaduwen ma aramas emen men wiahla emen Sounkadehdehn Siohwa kan ahpw ni ahnsouwet ede ntinting nan pelien sarawi likamw ieu? Pali laud en ahnsou, kisinlikou en katohrohrsang kaudok likamwo pahn kadehde me emen solahr men wia tohnkaudok en sarawi likamwo. E inenen kesempwal aramaso en wia mwekid me dehde mwahu pwehn kadohwaneweisang ih douluhl saminkihla kaudok likamw. Mwekid kan en emen me men wiahla Sounkadehde pahn sansal mwahu ong pelien lamalamo oh aramas koaros me ese ih pahn wehwehki me e solahr patehng sarawio.
13. Kaweid dahieu Paipel kin ketikihda me pid duwen liksang kaudok likamw?
13 Wahnpoaron Pohl ntingihdi: “Eri, kumwail dehr kapahrek kumwail ong me seupwoson akan ni amwail doadoahk kan, pwe met sohte kak wiawi. Pwe ia duwen me pwung eh kak miniminiong me sapwung? Ia duwen marain eh kak ehuong rotorot? Eri, Siohwa ketin mahsanih, ‘Kumwail uhdahn pahn pweieksang rehrail, oh tohrohreweisang irail. Kumwail dehr sair mehkot samin rehrail, I ahpw pahn apwalih kumwail.’” (2 Korint 6:14-17) Kitail pahn kin kak kapwaiada kehkehlik wet ma kitail kin pedoisang sarawi likamw oh sohte pwurehng patehng. Iaduwen, sapwellimen Pohl kaweid kin wehwehki me kitail en dehr patehng tohnkaudok likamw akan?
“Kekeid ni Erpit”
14. Kitail en kauhdi douluhl atail patehng irail oko me wia tohn kaudok likamw? Kawehwe.
14 Iaduwen, tohnkaudok mehlel akan en ireirailsang patehng aramas akan me wia tohn sarawi likamw? Kitail en pohnsehse irail oko me sohte iang ahneki atail pwoson? Pasapeng iei soh. Keriau en kosonned riau me keieu kesempwal ko mahsanih: “Ke pahn poakohng mehn mpomw duwen omw kin poakohng pein uhk.” (Madiu 22:39) Ni mehlel, kitail kin kasalehong mehn mpatail kan limpoak ni atail kin ehukihong irail mahsen en Rongamwahu en Wehio. Kitail pil kasalehda atail limpoak ong irail ni atail kin onop Paipel rehrail oh kehsehkin irail anahnepen irail en pedoi sang nan kaudok likamw.
15. Ia wehwehn en “dehr kisehn sampah”?
15 Mendahte atail kin kalohki Rongamwahu ong mehn mpatail kan, nin duwen atail wia iengen Sises kitail en “dehr kisehn sampah.” (Sohn 15:19) Lepin mahsen “sampah” wasaht kin wehwehki tohn sampah me mihla likin koasoandi en Koht. (Episos 4:17-19; 1 Sohn 5:19) Kitail kin tohrohrweisang sampah pwehki atail sohte kin wia ah madamadau, lokaia, oh wiewia me kin kansensuwedihala Siohwa. (1 Sohn 2:15-17) Laudsang met, pwehn pahrekiong mouren koasoio me mahsanih “werekiong aramas suwed kan e kin kauwehla tiahk mwahu,” kitail en kaleke nohn karanihala irail oko me sohte kin mourki irair en Kristian akan. (1 Korint 15:33) Sohte wia kisehn sampah iei en kolokol “irair en dehr saminkihla sampah.” (Seims 1:27) Kahrehda, katohreweisang uhk sampah sohte kin wehwehki me paliwaratail kan pahn tohrohrweisang aramas teikan.—Sohn 17:15, 16; 1 Korint 5:9, 10.
16, 17. Iaduwen mwomwen Kristian akan ong irail akan me sehse padahk mehlel akan en Paipel?
16 Eri, ia mwomwen atail wiewia ong irail oko me sehse padahk mehlel akan en Paipel? Pohl ntinglahng mwomwohdiso en Kolose mahsanih: “Kumwail kanahieng amwail wiewia kan mwohn irail kan me seupwoson, oh isaneki doadoahngki amwail ahnsou mwahu kan. Amwail koasoi mwohn aramas en katapan oh kansenamwahu; oh kumwail uhdahn pahn ese duwen amwail pahn sapeng koaros ni pwung.” (Kolose 4:5, 6) Wahnpoaron Piter ntingihdi: “Kumwail lemmwiki Krais nan kapehdomwail kan, oh wiahki amwail Kaun. Onopada ahnsou koaros pwe kumwail en kak sapeng mehmen me peki rehmwail kumwail en kawehwehiong koapworopwor me mi rehmwail.” (1 Piter 3:15) Pohl kaweidki Kristian kan “re en dehr kauwe emen, ahpw re en kin meleilei oh kadek, oh ahnsou koaros re en kin kasalehda saramwahu ong aramas koaros.”—Taitus 3:2.
17 Nin duwen atail wia Sounkadehdehn Siohwa kan, kitail en liksang mwomwen lemei de aklapalap ong meteikan. Kitail en dehpa doadoahngki lokaia kamedek pwehn koasoiahki tohn sarawi teikan. Weksang met, kitail en koasoi ni lamalam, mendahte ma tohn ihmw akan, de mehn mpatail de tohn atail wasahn doadoahk kin sar suwed de doadoahngki lokaia samin.—Kolose 4:6; 2 Timoty 2:24.
“Katengeiukediong ni Mahsen Mehlel kan”
18. Soangen pai ohlahn pali ngehn dah me pahn lelong irail oko me pwuralahng kaudok likamw?
18 Ia uwen suwed ma mwurin aramas emen ah sukuhlkiher padahk mehlel en Paipel akan, e uhd pwuralahng kaudok likamw! Pwuhk Sarawi mahsanih duwen imwilahn kapahtou en songen mwekid wet ni ah mahsanih: “Pwe ma aramas akan pitlahsangehr manaman kehlail en sampah wet pwehki ar marainkilahr atail Kaun oh Sounkomour Sises Krais, re ahpw pwurehng liselipingkihla oh lohdiong pahn manaman pwukat, iren soangen aramas pwukat pahn suwed mehlel ni imwilah sang nin tapio. . . . Dahme pweida rehrail kadehdehda duwen pwung en lepin kahs ko: ‘Kidi men kin pwurehng kang eh mwus, oh pwihk men me duhduhwer, kin pwurehng tapwur nan pwelmatak.’”—2 Piter 2:20-22.
19. Dahme kahrehda e kesempwal en pehmtikiong mehkan sohte lipilipil me kak wia keper ong atail pali ngehn?
19 Kitail en uhdahn pehmtikiong mehkan soh lipilipil, me kak keper ong atail pali ngehn. Keper pwukat uhdahn mie! Wahnpoaron Pohl kalekehki: “Ngehno ketin mahsanih ni sansal me ekei aramas pahn kesehla arail pwoson ni imwin ahnsou kan; irail pahn peikiong ngehn likamw akan oh idawehn padahk en ngehn suwed kan.” (1 Timoty 4:1) Kitail mihmihier nan “imwin ahnsou.” Irail oko me sohte pahn liksang douluhl kaudok likamw pahn kakete duwehte “mwomwen seri wekiwekin, me kin wekiwekidengkiseli angin padahk en aramas widingan akan me kin pitihediong aramas teikan nan ar padahk likamw.”—Episos 4:13, 14.
20. Iaduwen atail kak pere kitail sang kaweid sapwung en sarawi likamw?
20 Iaduwen atail pahn kak pere kitail sang widing keper kan en sarawi likamw? Tehk kanahieng soahng koaros me Siohwa kin ketikihda. Mie rehtail Mahsen en Koht, iei Paipel. (2 Timoty 3:16, 17) Siohwa pil kin ketikihda diren mwengehn ngehn sang rehn irail pwihn en “ladu lelepek oh loalokong.” (Madiu 24:45) Ni atail pahn wie kekeirada nan padahk mehlel, kitail soh pahn kin kaiahnehda atail men alehda ‘mwenge kekeluwak me ong aramas mahlahr akan’ oh ahneki ineng en patehng irail oko wasa me kitail kin sukuhliki padahk mehlel ngenin akan? (Ipru 5:13, 14; Melkahka 26:8) Kitail en ahneki lamalam kehlail en isaneki ahnsouwet en iang paiekihda sapwellimen Siohwa kisakis sapan akan oh koasoandi kan me e ketikihda pwe kitail en kak “katengeiukediong ni mahsen mehlel kan” me kitail rongehr. (2 Timoty 1:13) Eri, kitail ahpw pahn katohre kitail douluhl sang kaudok likamw.
Dahme Ke Sukuhliki?
• Dahkot “Papilon Lapalap”?
• Dahme kitail uhdahn pahn wia pwe kitail en liksang sarawi likamw?
• Soangen keper dah kan en pali ngehn me kitail en kalekekin kitail?
[Kawehwehpen kilel kan nan ehu ehu pali 4]
Ke ese dahme kahrehda “Papilon Lapalap” wiahki lih suwed emen me kin netiki paliwere?
[Kawehwehpen kilel kan nan ehu ehu pali 5]
“Papilon Lapalap” pahn kereniong ohla
[Kawehwehpen kilel kan nan ehu ehu pali 7]
Kitail kasalehda “lamalam karakarahk oh kasalehda wahu” ong irail akan me sohte iang ahneki atail pwoson