Pelien Lamalam Likamw Sohte Kin Kasalehda Dahme Mehlel Duwen Koht

Koht iei limpoak. Ahpw pelien lamalam kan me kin nda me re kin koasoi oh mwekid ni mwaren Koht kin wiahda soahng suwed tohto. Dahme kahrehda met kin wiawi? Pelien lamalam pwukat likamw. Dahme re kin nda oh wia kin kahrehiong aramas akan ren kamehlele soahng likamw kan duwen Koht. Ia duwen ar kin wia met? Ia sapwellimen Koht pepehm ong met? Oh dahme e pahn ketin wiahiong met?

1. Ia duwen pelien lamalam likamw kan ar kin wiahda soahng likamw kan duwen Koht sang nan ar padahk?

Pelien lamalam likamw kin ‘kawiliankihda dahme mehlel duwen Koht ong likamw.’ (Rom 1:25) Karasepe, pali laud en pelien lamalam kan sohte kin padahkihong iangarail tohn sarawi kan mwaren Koht. Ahpw, Paipel mahsanih me aramas akan anahne doadoahngki mwaren Koht. (Rom 10:​13, 14) Ekei kaunen pelien lamalam kan kin nda me ni mehkot suwed eh kin wiawi, met iei kupwuren Koht. Ahpw met likamw. Koht sohte mwahn kin ketin kahrehda soahng suwed kan en wiawi. (Wadek Seims 1:13.) E kansensuwed me soahng likamw kan me pelien lamalam kan wiahda, kahrehiongehr aramas akan ren apwalki poakohng Koht.

2. Ia duwen pelien lamalam likamw kan ar sohte kin kahlemengih Koht sang ni ar wiewia kan?

En pelien lamalam kan wiewia ong aramas sohte duwehte sapwellimen Siohwa wiewia. Paipel mahsanih me dipen pelien lamalam likamw kan “koasoakoasoakdahr oh leldalahngehr nanleng.” (Kaudiahl 18:5) Erein sounpar epwiki kei, pelien lamalam kan kin iang pidada palien politik, utung mahwen kan oh kin kahrehda de pwungki mehlahn aramas tohtohie. Ekei kaunen pelien lamalam kan kin men kepwehpwehla oh re kin peki iangarail tohn sarawi kan ren kihong irail mwohni. Wiewia pwukat kadehdehda me re sehse Koht, kahrehda sohte arail pwuhng en padahngki duwen Koht.​—Wadek 1 Sohn 4:8.

3. Ia sapwellimen Koht pepehm duwen pelien lamalam likamw kan?

Ma ke kin lingeringerki dahme pelien lamalam likamw kan kin wia, ia omw madamadau duwen sapwellimen Siohwa pepehm? E kin ketin poakohng aramas akan, ahpw e kin ketin engiengda pahn kaunen pelien lamalam kan me kin wiahda soahng likamw kan duwen ih oh wiakauwe iangarail tohn sarawi kan. E ketin inoukihda me pelien lamalam likamw kan pahn kasohrala oh sohte “pahn pwurehng dierekda.” (Kaudiahl 18:21) Ni ahnsou keren, Koht pahn ketin kasohrehla pelien lamalam likamw koaros.​—Kaudiahl 18:8.

KALAUDEHLA OMW ESE MET

4. Kaidehn pelien lamalam koaros me Koht kin ketin kupwurki

Aramas tohto kamehlele me pelien lamalam kan duwehte soangsoangen ahl akan me kin kolahng rehn Koht. Ahpw met mehlel? Wadek Madiu 7:13, 14, oh mwuri koasoiapene peidek wet:

• Dahme Paipel mahsaniheki duwen ahl me kolahng mour?

Kilang KISIN KASDO, oh mwuri koasoiapene peidek wet.

KISIN KASDO: Koht Ketin Kupwurki Soangen Kaudok Koaros?​—Excerpt (3:22)

• Ia duwe, Paipel mahsanih me mie pelien lamalam tohto me Koht ketin kupwurki?

5. Pelien lamalam likamw sohte kin kahlemengih sapwellimen Koht limpoak

Pelien lamalam kan sohte kin kahlemengih Koht ni ahl tohto. Ahl me keieu suwed iei ar kin iang utung mahwen. Ehu karasepe, kilang KISIN KASDO. Mwuri koasoiapene peidek pwukat.

KISIN KASDO: The Churches’ Role in World War II (2:22)

• Dahme pelien lamalam tohto kin wia erein Mahwen Keriau en Sampah?

• Ia omw pepehm duwen dahme re wiao?

Wadek Sohn 13:34, 35 oh 17:16. Mwuri koasoiapene peidek pwukat:

• Ia sapwellimen Siohwa pepehm ni pelien lamalam kan ar kin utung mahwen?

• Pelien lamalam likamw kan kin pwukoahki soahng suwed tohto. Ni soangen ahl dah kan me ke kin kilang, me pelien lamalam kan sohte kin kahlemengih sapwellimen Koht limpoak?

6. Koht ketin kupwurki kasaledekihala aramas akan sang pelien lamalam likamw

Wadek Kaudiahl 18:4,a oh mwuri koasoiapene peidek wet:

• Ia omw pepehm ni omw ese me Koht ketin kupwurki doarehla aramas akan me pelien lamalam likamw kan kin pitihdi?

7. Pousehlahte sukuhlki duwen Koht mehlelo

Ia duwe, soahng suwed kan me pelien lamalam likamw kan kin nda oh wia pahn kamwakid omw madamadau duwen Koht? Medewehla pwutak emen me soikala kaweid loalokong me eh pahpao kihong. Pwutako kohkohsang imwarailo oh wiahda soahng kan me uhdahn suwed. Pahpao sohte pwungki en pwutako wiewia kan. Ia duwe, e pwung en kapwukoahki pahpao mouren nah pwutak sapeiko?

• Ia duwe, e pwung en kapwukoahki Siohwa oh sohla sukuhlki duwen ih pwehki wiewiahn pelien lamalam likamw kan?

DAHME KE SUKUHLKIER

Pelien lamalam likamw kan sohte kin kasalehda dahme mehlel duwen Koht sang ni ar padahk likamw oh wiewia suwed kan. Koht pahn ketin kasohrehla pelien lamalam likamw kan.

Kousapahl

• Ia omw pepehm ong dahme pelien lamalam kan kin padahngki oh duwen ar mwekid kan?

• Ia sapwellimen Siohwa pepehm duwen pelien lamalam likamw kan?

• Dahme Koht pahn ketin wiahiong pelien lamalam likamw kan?

PIL TEHK

Tehk soahng riau me pali laud en pelien lamalam kan kin kansensuwedihkihda Koht.

“Are All Religions the Same? Do They All Lead to God?” (Web article)

Dahme kahrehda Siohwa ketin kupwurki kitail en iang meteikan kaudokiong ih?

“Is It Necessary to Belong to an Organized Religion?” (Web article)

Padre men pwunodki duwen eh pelien lamalamo. Ahpw met sohte kauhdihsang eh sukuhlki padahk mehlel duwen Koht.

“Why a Priest Left His Church” (Awake!, February 2015)

Sounpar epwiki kei, pelien lamalam kan kin padahngki soahng likamw kan duwen Koht me kahrehiong aramas ren kamehlele me Koht sohte ketin nsenohkin kitail oh me e lemei. Sukuhlki me mehlel duwen soahng likamw siluh.

“Likamw kan Me Kahrehda E Apwal en Poakohng Koht” (Kahn Iroir, November 1, 2013)