Kingdom News No. 37

Rohng Ehu Ong Sampah Pwon

Imwin Sarawi Lihamw Kerendohr!

▪ Dahkot sarawi likamw?

▪ Iaduwen ah pahn lelohng imwi?

▪ Iaduwen ah pahn sairada ahmw mour?

Dahkot Sarawi Likamw?

Ke kin iang pwunodikihdahr wiewiahn kauwehla kosonned akan me kin wiawi ni eden sarawi? Iaduwen—mahwen, palien terrorism oh elen tiahk lemei oh mwersuwed me kin wiawi rehn irail oko me kin nda me re papah Koht soh kin kansensuwed ong ahmw pepehm en tenek pahrek de kopwungpwung? Dahme likamwete pelien sarawi me kin wia poahsoanpen kahpwal tohto kan me kin pwarada?

Sapwung wet sohte mih rehn pelien sarawi koaros, ah e mih rehn sarawi likamw. Ohl en sarawi men me aramas tohto kin wauneki, iei Sises Krais, kasalehda me sarawi likamw kin wiahda doadoahk suwed akan, duwehte “tuhke suwed ah kin wiahda wa suwed.” (Madiu 7:15-17) Eri, soangen wa dah me sarawi likamw kihdahr?

Sarawi Likamw kin . . .

■ IANG PIDADA MAHWIN OH POLITIKS: Ehu doaropwehn nuhs me ede Asiaweek koasoia, “Nan Eisia pwon oh wasa teikan, kaun akan me kin men lapalap kin widinge aramas akan me kin kesempwaliki oh poadidi nan arail sarawi pwehn kaitar pein arail anahn akan.” Pwehki met, doaropwehn rohngo eri kalekehki aramas: “Sampah pahn suridiong nan liseliping.” Emen kaun en lamalam ndand nan United States koasoia: “Ma ke men mahwen en uhdi, ke anahne kemehla terrorist kan.” Ia ah kamwahuwihala kahpwalo? “Kaposei irailpeseng koaros ni mwaren Kauno.” Ahpw, met pahn uhwong dahme Paipel mahsanih: “Ma mehmen kin nda, ‘I poakohng Koht,’ ahpw kin kailongki rie, ih aramas likamw men.” (1 Sohn 4:20) Sises pil mahsanih: “Kumwail poakohng amwail imwintihti kan.” (Madiu 5:44) Pelien sarawi depe me ke ese me towe kan kin iang mahwen?

■ KAPARAPESENG PADAHK LIKAMW KAN: Pali tohto en sarawi kan kin padahki me soul de ngehn wia kisehn paliwar me sohte sansal ong masatail oh sohte kin iang mehla ahnsou me paliweren aramas emen ah mehla. Pwehki padahk wet, pelien lamalam tohto kin kahpwalihki tohn arail lamalam akan me kin pwainki mwohni pwe ren kapakapki ngenen irail oko me melahr. Ahpw, Paipel kin padahki ehu soahng tohrohr. “Mehmen (soul) me kin dipada iei ih me pahn mehla.” (Esekiel 18:4) “Ei, me momour kan ese me re pahn mehla, ahpw me melahr akan sohte ese mehkot. Solahr kating ehu pahn kohieng irail; re manokonoklahr douluhl.” (Eklesiasdes 9:5) Sises padahki me irail me melahr akan pahn iasada—mehkot me sohte pahn katepe ma tohnsampah kan mie ngenarail me sohte kak mehla. (Sohn 11:11-25) Ahmw sarawi kin padahki me ngehn me mehlahr akan (soul) sohte kak mehla?

■ SOHTE KAUTIHIONG DIPEN NENEK: Nan sarawi kan en pali kapi en sampah, pelien lamalam akan kin kasarawihala ohl mwahuki ohl oh lih mwahuki lih en iang ale pwukoa en wia kaun en lamalam oh kin kangoange palien koperment en kamanahla pwopwoud en ohl-ohl oh lih-lih. Pil sarawi kan me kin nda me suwed nenek kin sohte wia koasoandi kehlail ong irail kaunen lamalam akan me kin doadoahngki seri kan ong arail ineng suwed. Dahme Paipel mahsanih? E kasalehda ni sansal: “Kumwail dehr nan kapehd rotorot, pwe me kin nenek kan, me kin pwongih dikedik en eni kan, me kamwahl akan, me wia dipen Sodom kan, . . . re sohte pahn iang sohsohki Wehin Koht.” (1 Korint 6:9, 10) Mie pelien sarawi me ke ese me kin pohnsehse wiewiahn nenek en tohn arail sarawi kan?

Dahme pahn wiawihong sarawi kan me kin wiahda wa suwed ni ahnsou kohkohdo kan? Sises ketikihda mehn kataman: “Tuhke pwoat me sohte kin wa mwahu kin paldi oh lekidekiong nan kisiniei.” (Madiu 7:19) Ei, sarawi likamw pahn lopdihsang oh ohla! Ahpw, iaduwen oh iahd me met pahn wiawi? Kokohp kaudiahl ieu ntingdi nan Paipel pwuhken Kaudiahl, irelaud 17 oh 18, kihda pasapengpen met.

Ia Pahn Mwomwen Imwilahn Sarawi Likamw?

Nna, medewehla dahme pahn wiawi. Lihen netiki paliwar emen mwomwohd pohn tihnsewen mahn kamasepwehk men. Mahn lawalo moange meh isuh oh kode kan meh eisek. (Kaudiahl 17:1-4) Ihs me lih suwed menet kin karasahiong? Mie ah kehl “pohn nanmwarki kan en sampah.” E kapwatikihda likou poh ntahn mwehl, doadoahngki mehn kapwohmwahu oh inenen kepwehpwe mehlel. Patehng met, pwehki ah kin wia wunahni, e kin kaweid suwedihala ‘wehi kan koaros.’ (Kaudiahl 17:18; 18:12, 13, 23) Paipel sewese kitail en wehwehki me lih suwed menet iei kaudok likamw kan koaros nan sampah pwon. Liho kin karasahiong, kaidehn ehute pelien sarawi, ahpw pelien sarawi koaros me kin wa suwed.

Mahn lawalo me lih suwedo wie dakedakeo kin wia kilelepen palien politik kehlail kan en sampah.a (Kaudiahl 17:10-13) Kaudok likamw kin mwohd pohn tihnsewen mahn lawalo en politiko, nantihong kihong kaweid ong ah pilipil akan oh kaweid wasa e pahn kohla ie.

Ahnsou keren, wiewia kapwuriamwei ieu pahn wiawi. “Kode eisek me ke kilangehr oh mahn kamasepwehko pahn kailongkihla lih suwedo. Re pahn kihsang mehkoaros me e ahneki oh kakilisawihada. Mwuhr, re ahpw pahn kangala uduke oh kamwomwkihla kisiniei.” (Kaudiahl 17:16) Ni mwekid mwadang oh kamasepwehk, palien politik kehlail en sampah kan pahn uhwongada kaudok likamw oh kauwehla ih douluhl! Dahme pahn kamwekidada wiewia wet? Paipel nan pwuhken Kaudiahl sapengki: “Pwe Koht ketin audehkidahr kapehdirail kan dahme e ketin kupwukupwurehiong liho.” (Kaudiahl 17:17) Ei, Koht pahn kadeikada sarawi likamw pwehki wiewia kanamenek kan me e wiahdahr ni mware. Ni wiewiahn kopwung unsek ieu, Koht pahn ketin doadoahngki palien politik kehlail akan pwe en wia sapwellime kadeik.

Dahme ke pahn wia ma ke sohte men iang ale kadeik me pahn kohwong sarawi likamw? Sapwellimen Koht meninkedero ketikihda kangoang wet, “Kumwail, nei aramas akan, kumwail tang! Kumwail tangasang!” (Kaudiahl 18:4) Ni mehlel met iei ahnsou en tangeieisang sarawi likamw! Ahpw, iawasa ke kak tangalahng ie? Kaidehn nan irair en sohte kamehlele Koht, pwehki imwilah pahn suwed. (2 Deselonika 1:6-9) Ihte wasa mwahu iei nan sarawi mehlel. Iaduwen ahmw kak kasawihada sarawi mehlel?

Iaduwen Kasawihada Sarawi Mehlel

Wa mwahu dah me sarawi mehlel uhdahn pahn kihda?—Madiu 7:17.

Sarawi Mehlel kin . . .

◼ KASALEHDA LIMPOAK: Tohnkaudok mehlel “sohte kin wia kisehn sampah,” sohte kin katohre soangsoangen aramas de tiahk, oh kin kasalehda ‘limpoak nanpwungarail.’ (Sohn 13:35; 17:16; Wiewia 10:34, 35) Irail sohte kin kemehla emenemen ahpw re kin inengieng mehkihla emenemen.—1 Sohn 3:16.

◼ KOAPWOROPWORKI SAPWELLIMEN KOHT MAHSEN: Sarawi mehlel sohte kin padahki “tiahk” oh “kosonned en aramas dene e pwilisang rehn Koht,” ahpw re kin padahki mehkan me pwilisang sapwellimen Koht Mahsen, iei Paipel. (Madiu 15:6-9) Pwekihda? Pwehki “audepen Pwuhk Sarawi unsek pwilisang rehn Koht, oh e mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek.”—2 Timoty 3:16.

◼ KAKEHLAKA PENEINEI KAN OH UTUNGADA IRAIR EN TIAHK MWAKELEKEL: Sarawi mehlel kin kaiahnehda ohl pwopwoud en ‘limpoak ong arail pwoud akan duwehte pein paliwararail,’ oh sewese lih pwopwoud akan en ‘wauneki ahr pwoud ohl akan,’ oh padahkiong seri kan en ‘peikiong arail pahpa oh nohno kan.’ (Episos 5:28, 33; 6:1) Kapatahiong met, irail aramas likilik kan me ahneki pwukoahn apwalih tohnmwomwohdiso kan pahn wia mehn kahlemeng mwahu ong duwen mour mwakelekel.—1 Timoty 3:1-10.

Mie pelien sarawi me kin kapwaiada irair pwukat? Pwuhk me ede Holocaust Politics, me ntingda nan 2001, koasoia: “Ma tohto aramas me kin kapwaiada dahme Sounkadehdehn Siohwa kan kin padahki oh mourki, Holocaust kakete sohte wiawi oh kasohralahn keinek me kin wiawi nan sampah sohte pahn wiawi.”

Ni mehlel, nan sahpw 235, Sounkadehdehn Siohwa kan sohte kin padahk kihte sang nan Paipel duwen tiahk mwakelekel—irail kin mourki irair pwukat. Se men kangoange uhk en peki rehn Sounkadehdehn Siohwa kan en sewese iuk en sukuhliki dahme Koht ketin kupwurki ken wia pwe ken kak kaudokiong Ih ni ahl me E kupwurki. Met iei ahnsou en mwekid. Dehr pwapwand. Imwin sarawi likamw kerendohr!—Sepanaia 2:2, 3.

Ma ke men ese kalaudepen mahsen kan duwen Paipel me Sounkadehdehn Siohwa kan kin padahngki, menlau tuhwong irail ni address me sansal pah.

□ I peki ehu brochure me oaralap koasoia Dahme Koht Kupwurki Kitail en Wia?

□ Kalelei ie pwe I men onop Paipel ni soh pweine.

[Footnote]

[Kawehwehpen kilel kan nan ehu ehu pali 3]

Sarawi likamw kin ahneki kehl en kamwekid madamadau “en nanmwarki kan en sampah”

[Kawehwehpen kilel kan nan ehu ehu pali 3]

“Kumwail nei aramas, kumwail tangasang”