Soikeweisang Uhk Kaudok Likamw!

Sehdan oh nah ngehn saut akan sohte men ken papah Koht. Re men kahrehong aramas koaros en sohpeisang Koht. Iaduwen re kin song en wia met? Ehu ahl iei kaudok likamw. (2 Korint 11:13-15) Kaudok ehu kin likamw ma e sohte kin padahki padahk mehlel kan en Paipel. Kaudok likamw kin rasehng mwohni likamw​—e duwehte mwomwen mwohni mehlel, ahpw sohte kesempwalpe. E kak kahrehong iuk nan apwal tohto.

Kaudok likamw akan sohte kak kaperenda Siohwa, Koht en me mehlelo. Ni ahnsou me Sises ketiket sampah, mie pwihn ehu me kisehn pelien lamalam ehu me kin song en kemehla Sises. Re lemeleme me ahr kaudok me pwung. Re koasoia: “Samat mehtehmen, Koht kelehpw.” Sises pwungki ahr koasoi? Soh! E mahsanihong irail: “Kumwail kadaudok en Tepil, pwehki iei ih samamwail.” (Sohn 8:41, 44) Rahnwet, aramas tohto kin lemeleme me re kaudokiong Koht, ahpw, ni mehlel, re papah Sehdan oh nah ngehn saut akan!​—1 Korint 10:20.

Duwehte tuhke sakanakan kin wa suwed, kaudok likamw kin wiahda aramas akan me kin wia tiahk suwed. Sampah wet dirkihla kahpwal akan pwehki aramas akan kin wia tiahk suwed. Aramas kin wia dipen nenek, pei, pirap, kaloke meteikan, kamaramas, oh ahngkehlail. Aramas tohto me kin wia dihp pwukat kin mie ahr pelien lamalam, ahpw, ahr pelien lamalam sohte kin kahrehong irail en wia dahme pwung. Re sohte kak kompoakepahnki Koht lao re uhdi sang arail wiewia suwed akan.​—Madiu 7:17, 18.

Kaudok likamw kin padahkiong aramas akan en kapakap ong dikedik en eni kan oh sansal kan. Koht mahsanih en dehr kapakap ong dikedik en eni kan oh sansal kan. Met inenen pwung oh konehng. Ke pahn perenki ma emen sohte kin koasoiong iuk ahpw kin koasoiongte kilelomw? Aramas menet kin wia kompoakepahmw mehlel? Soh, e sohte kin. Siohwa kupwurki aramas akan en koasoiong ih, kaidehn koasoiong dikedik en eni ehu de sansal ehu de kilel ehu me sohte mour.​—Eksodus 20:4, 5.

Kaudok likamw kin padahkiong aramas akan me re kak kemehla aramas teikan ni ahnsoun mahwen. Sises mahsanih me kompoakepahn Koht akan kin limpoakpene nanpwungarail. Kitail sohte kak kemehla aramas akan me kitail kin poakohng. (Sohn 13:35) E pil sapwung en kemehla aramas suwed akan. Ni ahnsou me irail imwintihti kan en Sises parokedi ih, e sohte mweidohng sapwellime tohnpadahk kan en pei ong irail pwehn perehla ih.​—Madiu 26:51, 52.

Kaudok likamw akan kin padahkiong aramas akan me aramas suwed akan pahn lokolok nan kisiniei. Ahpw, Paipel kin padahkiong kitail me pweinen dihp iei mehla. (Rom 6:23) Siohwa iei Koht en limpoak. Koht limpoak men pahn kak kaloke aramas akan ahnsou kohkohlahte? Uhdahn soh! Nan Paradais, pelien lamalam ehute pahn mihmi, iei me Siohwa kin ketin kupwurki. (Kaudiahl 15:4) Pelien lamalam koaros me kin poahsoankihda padahk likamw akan en Sehdan pahn sohrala.