Dahme Pahn Wiawihong Pelien Lamalam kan?

1. Pelien lamalam koaros mwahu?

E kin mie aramas me ahneki mohngiong mehlel nan pelien lamalam koaros. E wia rohng mwahu me Koht kin ketin mwahngih soangen aramas pwukat oh kin ketin nsenohki irail. Ahpw e kin kansensuwed pwehki wiewia suwed tohto kin wiawi pwehki pelien lamalam. (2 Korint 4:3, 4; 11:13-15) Nuhs kan kin kasalehda me ekei pelien lamalam kin iang pidada kemehla aramas pwehn kapwaiada arail mehn akadei nan palien politik, kemehla tohn keinek kan, mahwen, oh wia me suwed ong seri kan. Met kin uhdahn kansensuwedihala irail kan me kin ahneki mohngiong mehlel oh kamehlele Koht.​—Wadek Madiu 24:3-5, 11, 12.

Pelien lamalam mehlel kin kalinganahla Koht ahpw pelien lamalam likamw kin kansensuwedih. Pelien lamalam likamw kin padahngki madamadau me sohte mi nan Paipel, iangahki padahk likamw kan duwen Koht oh duwen me melahr akan. Ahpw Siohwa kin ketin kupwurki aramas akan ren esehla dahme mehlel duwen ih.​—Wadek Eklesiasdes 9:5, 6, 10; 1 Timoty 2:3-5.

2. Dahme pahn wiawihong pelien lamalam kan?

E kaperen en ese me pelien lamalam kan me dene re poakohng Koht ahpw ni mehlel re kin poakohng ahn Sehdan sampah sohte kak pitih Koht. (Seims 4:4) Mahsen en Koht kin kahdaneki pelien lamalam likamw koaros “Papilon Lapalap.” Papilon iei kahnimw en mahs ehu, wasa me pelien lamalam likamw tepisang ie mwurin Nohliko. Kereniong Koht pahn ketin mwadang kasohrehla pelien lamalam me kin pitih oh kaloke aramas akan.​—Wadek Kaudiahl 17:1, 2, 5, 16, 17; 18:8.

Ahpw Siohwa sohte kin ketin likidmeliehla irail kan me ahneki mohngiong mehlel me mi nan pelien lamalam likamw kan nan sampah pwon. E kin ketikieisang soangen aramas pwukat nan pelien lamalam likamw ni eh kin ketin padahkihong irail padahk mehlel.​—Wadek Maika 4:2, 5.

3. Dahme irail kan me mohngiong mehlel anahne wia?

Siohwa kin ketin nsenohki aramas akan me kin poakohng dahme mehlel oh mwahu. E kin ketin padahkihong irail en pedoisang nan pelien lamalam likamw kan. Aramas akan me poakohng Koht kin men wiahda wekidekla kan pwehn kaperenda ih.​—Wadek Kaudiahl 18:4.

Ni mwehin wahnpoaron ko, irail kan me ahneki mohngiong mehlel perenkihda arail rongada rohng mwahu sang wahnpoaron ko. Re sukuhlki elen mour kapw sang rehn Siohwa, elen mour ehu me kihong irail nsenamwahu, kahrepen mour oh koapworopwor. Irail wia mehn kahlemeng mwahu ong kitail rahnwet pwehki re mwekidki rohng mwahwo sang arail kin mwohneki Siohwa nan arail mour.​—Wadek 1 Deselonika 1:8, 9; 2:13.

Siohwa kin ketin kasamwolong nan sapwellime peneinei en tohnkaudok kan irail kan me pedoisang nan pelien lamalam likamw kan. Ma ke alehdi sapwellimen Siohwa luhk kadek wet, ke pahn wiahla kompoakepah, tepida iang kisehn sapwellime peneinei en tohnkaudok limpoak kan oh pil ahneki mour soutuk.​—Wadek Mark 10:29, 30; 2 Korint 6:17, 18.

4. Ia duwen Koht eh pahn ketikihdo peren wasa koaros?

Kadeikpen pelien lamalam likamw me kohkohdo kin wia rohng mwahu. E pahn kasaledekihsang tohnsampah dahme kin kaloke irail. Pelien lamalam likamw kan solahr pahn pwurehng pitih oh katohre aramas. Irail koaros me momour pahn miniminpene ni arail kaudokiong Koht mehlelo kelehpw.​—Wadek Kaudiahl 18:20, 21; 21:3, 4.