Sukuhlki Sang Mahsen En Koht

Dahme Pahn Wiawihong Pelien Lamalam akan?

Ire wet pahn koasoia peidek kan me ke kak ahneki oh e pahn kasalehda ia wasa nan Paipel me ke kak diarada pasapeng kan. Sounkadehdehn Siohwa kan pahn perenki iang uhk koasoiapene pasapeng pwukat.

1. Pelien Lamalam Koaros Mwahu?

Nan pelien lamalam tohto, mie aramas mohngiong mehlel me kin men kaperenda Koht. E kin ketin mwahngih aramas pwukat oh kin ketin nsenohki irail. E kansensuwed pwe ekei aramas kin doadoahngki pelien lamalam ong arail koasoandi suwed kan. Mahs, kaunen pelien lamalam akan kin kaloke me kin uhwong irail. (2 Korint 4:3, 4; 11:13-15) Rahnwet, palien rohng kin ripohtki me ekei kaunen pelien lamalam kin pwungki wiewiahn pwihn en mwersuwed kan de utungada mahwen de wia tiahk suwed ong seri.​—Wadek Madiu 24:3-5, 11, 12.

Paipel padahngki me mie soangen pelien lamalam riau​—me mehlel oh me likamw. Pelien lamalam likamw sohte kin padahngki me mehlel duwen Koht. Ahpw Siohwa Koht kin ketin kupwurki aramas akan en esehla me mehlel duwen Ih.​—Wadek 1 Timoty 2:3-5.

2. Dahme pahn wiawihong pelien lamalam akan?

Koht sohte ketin kupwurki pelien lamalam akan me kin pitihki aramas akan padahk likamw kan duwen Koht. Ni mehlel, irail akan me kin utungada pelien lamalam pwukat uhdahn men wia kompoakepahn sampah wet me mi pahn kaundahn Sehdan me Tepil. (Seims 4:4; 1 Sohn 5:19) Mahsen en Koht kin kawehwehda me pelien lamalam akan me kin utungada koperment en aramas a kaidehn Koht kin rasehng lih en netiki paliwere. Paipel kin kahdaneki lih menet “Papilon Lapalap,” pwehn duwehte eden kahnimwo me pelien lamalam likamw tepida ie mwurin Nohliko ni mwehin Noha. Ahnsou keren Koht pahn ketin mwadang kasohrehla pelien lamalam koaros me kin pitipitih oh wiakauwe tohnsampah.​—Wadek Kaudiahl 17:1, 2, 5, 17; 18:8, 23, 24.

3. Ia duwen Koht eh pahn ketikihdo peren ong aramas akan nin sampah pwon?

Kadeik me pahn wiawi ong pelien lamalam likamw kin wia rongamwahu. E pahn kihsang tiahk en limeidihd nan sampah pwon. Pelien lamalam kan solahr pahn pwurehng pitih oh katohrepeseng aramas akan. Aramas koaros me momour pahn miniminpene kaudokiongete Koht mehlelo.​—Wadek Aiseia 11:9; Kaudiahl 18:20, 21; 21:3, 4.

4. Dahme aramas mohngiong mehlel kan anahne wia?

Siohwa sohte kin ketin likidmeliehla aramas mohngiong mehlel kan me mi nan pelien lamalam likamw akan nan sampah pwon. E kin ketin kaminiminpene soangen aramas pwukat sang ni eh ketin padahkihong irail padahk mehlel.​—Wadek Maika 4:2, 5.

Siohwa kin ketin kasamwodohng nan sapwellime peneinei irail me kin men papah ih. Mehnda ma kompoakepatail kan oh kisehtail kan nsensuwedla ni atail tepida papah Siohwa, ahpw kitail kin paiekihda laudsang. Kitail kin kompoakepahnkihla Koht, ahneki peneinei kapw me limpoakpene, oh koapworopwor en ahneki mour soutuk.​—Wadek Mark 10:29, 30; 2 Korint 6:17, 18.

Pwehn kalaudehla omw wehwehki met, menlau kilang irelaud 15 oh 16 en pwuhk wet, Dahme Paipel Uhdahn Padahngki?, me Sounkadehdehn Siohwa kan wiahda.

[Kilel nan pali 26]

The Complete Encyclopedia of Illustration/J. G. Heck