Dahme Kahrehda Kitail en Mwohneki Mahs Papah Siohwa?

“I pahn lohkiseli sapwellimomwi kupwur mwahu; I pahn koasoia duwen sapwellimomwi manaman en komour sang nimenseng lel nipwong.”​—MEL. 71:15.

IA DUWEN OMW PAHN SAPENG?

Dahme kahrehda Noha, Moses, Seremaia oh Pohl arail mwohneki mahs Siohwa nan arail mour?

Dahme pahn sewese iuk ken pilada dahme ke pahn wiahiong omw mour?

Dahme kahrehda ke pahn mwohneki mahs sapwellimen Siohwa doadoahk?

1, 2. (a) Dahme emen kin kasalehda ni eh inoukihong Siohwa eh mour? (b) Ia duwen mehn kahlemeng en Noha, Moses, Seremaia oh Pohl ar sewese kitail?

NI OMW inoukihong Koht omw mour oh wiahla sapwellimen Sises tohnpadahk me papidaislahr men, ke wiadahr pilipil ehu me keieu kesempwal nan omw mour. E duwehte omw patohwanohng Siohwa: ‘I men komwi en ketin wiahla ei Kaun. Ngehi omw ladu. I men komwi en ketin padahkihong ie ia duwen ei pahn doadoahngki ei ahnsou, dahme I pahn keieu kesempwalki, oh ia duwen ei pahn doadoahngki ei koahiek kan oh dahme I ahneki.’

² Ma kowe Kristian papidaislahr men, ih met me ke inoukihong Siohwa. Ke wiahda pilipil ehu me uhdahn mwahu oh pwung. Ahpw met ni omw pwungkier me Siohwa iei omw Kaun, ia duwen omw pahn doadoahngki omw ahnsou? Mehn kahlemeng en Noha, Moses, Seremaia oh Pohl kak sewese kitail en kasawih atail irair kan. Ohl pwukat koaros wia uwen arail kak koaros nan arail papah Siohwa. Atail irair rahnwet duwehte arail ko. Pilipil kan me re wiahda kin kasalehda dahme re keieu kesempwalki oh met anahne kahrehiong kitail en men kasawih ia duwen atail kin doadoahngki atail ahnsou.​—Mad. 28:19, 20; 2 Tim. 3:1.

MWOHN NOHLIKO

3. Ia mwomwen ahnsou me kitail momour loale eh duwehte ahnsou me Noha wie momour?

³ Sises ketin karasahiong ahnsou me Noha wie momour ong atail ahnsou. E mahsanih me “ketidohn Nein-Aramas pahn duwehte me wiawiher ni mwehin Nohao.” Aramas akan “pereperen kamakamadipw ni rahn ako mwohn nohlik lapalapo, ohl oh lih akan wiewia pwopwoud lao lel rahn me Noha pedolong nan warihmwo; re ahpw sasairki nohliko, e lao komwopwirailla koaruhsie.” (Mad. 24:37-39) Rahnwet, pali laud en aramas akan sohte kin rong kaweid kan me sapwellimen Koht ladu kan kin kihong irail. Re sohte katapanki atail momour ni ahnsou en imwi. Duwehte irail me mour ni mwehin Nohao, me tohto rahnwet sohte kin kamehlele me Koht pahn ketin kasohrehla aramas suwed akan. Re pil kin kouruhrki. (2 Pit. 3:3-7) Ahpw ia duwen Noha eh doadoahngki eh ahnsou mendahki aramas ako sohte rong eh kaweid ko?

4. Mwurin Siohwa eh ketikihong Noha pwukoa tohrohr ehu, ia duwen Noha eh doadoahngki eh ahnsou? Dahme kahrehda e doadoahngki eh ahnsou ni ahl wet?

⁴ Koht ketin mahsanihong Noha me e pahn ketin kasohrehla aramas suwed koaros oh e ketikihong Noha pwukoa tohrohr ehu en wia. Noha wiahda warihmwo pwehn doarehla aramas oh mahn akan. (Sen. 6:13, 14, 22) E pil kaweidki dahme Siohwa pahn ketin wia. Wahnpoaron Piter koasoiahki Noha me “ih me lohkiseli duwen mour pwung pahn kupwur en Koht,” me kasalehda me Noha doadoahk laud pwehn sewese meteikan ren wehwehki uwen kesempwal oh karuwaru ren mwekid. (Wadek 2 Piter 2:5.) Ia duwe, ke medewe me e pahn wia elen loalokong ma Noha oh eh peneinei pahn doadoahngki arail ahnsou en tapiada arail pesines, wiahla aramas pweida sang meteikan de ahneki kepwe kaselel tohto? Uhdahn soh! Re soikala sohte lipilipil dahme pahn kerempwa arail doadoahk pwehki re ese me Siohwa pahn ketin kasohrehla sampah en ahnsowo.

PENEINEI EN PARAO MEN WIAHDA PILIPIL KAN

5, 6. (a) Dahme kahrehda Moses ale kasukuhl en “soangen loalokong koaros en mehn Isip”? (b) Dahme kahrehda Moses pilada en sohte iang wia kisehn peneinei en Parao?

⁵ Met kitail pahn sukuhlki mehn kahlemeng en Moses. Nein Parao serepeino pwekada ih oh e tikida nan tehnpas en nanmwarkien Isip. Moses ale kasukuhl oh “audaudkidahr soangen loalokong koaros en mehn Isip.” (Wiewia 7:22; Eks. 2:9, 10) Mehn Isip kan kasukuhlih pwehn kaunopada ong doadoahk en papah Parao. E kak wiahla aramas lapalap men nan koperment me keieu kehlail ni ahnsowo. Nan pwukoa wet, e kak ahneki soahng kaselel tohto oh wahu tohrohr. Ahpw ia duwe, Moses kesempwalki soahng pwukat?

⁶ Ni ahnsou me Moses wia seri men, uhdahn eh pahpa oh nohno kin padahkihong ih duwen Siohwa. Eri e ese dahme Siohwa ketin inoukihong Eipraam, Aisek oh Seikop. Moses kamehlele inou pwukat. E kin medemedewe laud dahme pahn wiawihong oh ia duwen eh pahn kin loalopwoat ong Siohwa. Ni eh lelehr ahnsou me Moses en pilada ma e pahn wia kisehn peneinei en Parao de en iang mehn Israel kan wia ladu, dahme e pilada? Moses pilada en “iang sapwellimen Koht aramas akan lokolok sang perenki dihp ahnsou mwotomwot.” (Wadek Ipru 11:24-26.) Mwuhr e doadoahngki eh mour ni ahl ehu me kin kaperenda Siohwa. (Eks. 3:2, 6-10) Dahme kahrehda Moses wia met? Pwehki e kamehlele dahme Siohwa ketin inoukihda oh e ese me sohte lipilipil soangen pweida me e pahn kak ahneki nan Isip, e sohte pahn mihmi kohkohlahte. Eh pilipilo pwung. Wehio mwadangete lelohng kalokolok eisek sang Koht. Sapwellimen Siohwa ladu inouda koaros kak sukuhlki mehn kahlemeng en Moses. Kitail anahne keieu kesempwalki Siohwa oh doadoahk en papah ih, a kaidehn en ahneki doadoahk de song en ahneki kepwe kaselel nan sampah wet.

SEREMAIA ESE DAHME PAHN WIAWI

7. Ia duwen ahn Seremaia irair eh duwehte atail?

⁷ Soukohp Seremaia pil kin mwohneki mahs sapwellimen Siohwa doadoahk nan eh mour. Siohwa ketin pilada Seremaia en wia sapwellime soukohp oh ketikihong pwukoa tohrohr ehu en wia. Seremaia anahne kalohngki duwen Siohwa eh pahn ketin kadeikada mehn Serusalem oh Suda pwehki re kin kaudokiong koht likamw kan. Ahn Seremaia irairo duwehte atail. E pil kin mour ni “kaimwiseklahn rahn akan.” (Ser. 23:19, 20, NW) E kamehlele me koasoandi en ahnsou me e momour loale sohte pahn mihmi kohkohlahte.

8, 9. (a) Dahme kahrehda Koht ketin anahne kapwungala en Paruk madamadau? (b) Dahme kitail anahne tamataman ni atail kin wiahda koasoandi kan?

⁸ Dahme Seremaia sohte wia pwehki dahme e kamehlele? E sohte song en akadeiong en ahneki mour mwahu nan koasoandi en ahnsowo me pahn ohla. E pahn wia elen pweipwei en wia met. Ahpw Paruk, me wia nein Seremaia sekteri, tepida ahneki madamadau me weksang. Ihme kahrehda Koht ketin mahseniong Seremaia en kapwungala Paruk ni eh mahsanih: “Ngehi, KAUN-O, pahn kauwehla dahme I kauwadahr oh usada dahme I padokedier. Ih met me I pahn wiahiong sampah pwon. Ia duwe, ke raparapahki ehu kamwahu ong pein kowe? Eri, ke dehr wia met. Pwe I pahn ketikihdo kahpwal pohn aramas koaros.” Siohwa eri ketin inoukihong Paruk me e pahn pitsang ohlahn Serusalem.​—Ser. 45:4, 5.

⁹ Kitail sohte uhdahn kak ese soangen “kamwahu” dah me Paruk raparapahki ong pein ih.a Kitail ese me soahng pwukat koaros sohte pahn mihmi kohkohlahte. Soahng pwukat pahn ohla ni mehn Papilon kan ar kalowehdi Serusalem nan pahr 607 mwohn Krais. Dahme kitail sukuhlki sang met? Kitail anahne wiahda atail koasoandi kan pwe kitail en kak ahneki dahme kitail anahne pwe kitail en kak mourki met. (Lep. Pad. 6:6-11) Ia duwe, e pahn wia elen loalokong kitail en doadoahngki laud atail ahnsou oh kehl ong soahng kan me sohte pahn mihmi kohkohlahte? E mehlel me sapwellimen Siohwa pwihn kin doulahte wiahda koasoandi kan ong Wasahn Kaudok kapw kan, ohpis kapw en Sounkadehdehn Siohwa kan oh pil soangen ihmw teikan. Ahpw koasoandi pwukat weksang koasoandi teikan pwehki re utungada Wehio. Eri ni ahnsou me sapwellimen Siohwa me inouda kan kin wiahda koasoandi kan, Wehin Koht anahne en keieu kesempwal nan arail mour. Ia duwe, ke kin rapahki mahs Wehio oh sapwellimen Siohwa koasoandi pwung kan?​—Mad. 6:33.

E MEDEWE ME “MEHN LEKDEKLA KEI”

10, 11. (a) Dahme Pohl kin kesempwalki mwohn eh wiahla Kristian? (b) Dahme kahrehda Pohl wekidala douluhl dahme e kin keieu kesempwalki?

¹⁰ Eri met, kitail pahn koasoiapene mehn kahlemeng en wahnpoaron Pohl. Mwohn eh wiahla Kristian men, koaros kin medewe me e pahn ahneki doadoahk me inenen mwahu. E kin sukuhlki kosonned en mehn Suhs kan rehn emen sounpadahk me inenen wadawad ni ahnsowo. Samworo lapalap en mehn Suhs ko kin koapworopworki oh kihong doadoahk kesempwal ehu. E tepidahr pweida mwahu nan pelien lamalam en mehn Suhs laudsang tohto me irail ehu dih. (Wiewia 9:1, 2; 22:3; 26:10; Kal. 1:13, 14) Ahpw ahn Pohl mour wekidekla douluhl ni ahnsou me e esehda me Siohwa ketin soikala mehn Suhs kan nin duwen wehi ehu.

¹¹ Pwehki kahrepe wet, Pohl ese me en ahneki doadoahk nan koasoandi en mehn Suhs kan sohte katepe ong Siohwa. Koasoandi en mehn Suhs kan solahr ar koapworopwor. (Mad. 24:2) Pohl wehwehki sapwellimen Koht koasoandi kan, oh e ese me e wia pwais kaselel ehu en wia doadoahk en kalohk. E pil koasoia me soahng kan me e kin kesempwalki mahs, met e wialahr “mehn lekdekla kei,” de kihd. Pohl sohla iang pelien lamalam en mehn Suhs oh uhd doadoahngki eh mour unsek nin sampah pwehn kalohki rongamwahwo.​—Wadek Pilipai 3:4-8, 15; Wiewia 9:15.

KASAWIH DAHME KE KIN KEIEU KESEMPWALKI

12. Dahme Sises kin ketin keieu kesempwalki mwurin eh ketin papidaisla?

¹² Noha, Moses, Seremaia, Pohl oh me tohto teikan doadoahngki pali laud en arail ahnsou oh kehl nan sapwellimen Siohwa doadoahk. Re wia mehn kahlemeng mwahu kei kitail en alasang. Ni mehlel, Sises ketin wia mehn kahlemeng me keieu mwahu ong sapwellimen Siohwa ladu inouda kan. (1 Pit. 2:21) Mwurin Sises eh ketin papidaisla, e ketin doadoahngki sapwellime mour unsek nin sampah pwehn kalohki rongamwahwo oh kawauwihala Siohwa. Kahrehda, papah Siohwa anahne en keieu kesempwal ong Kristian koaros me kin idawehn sapwellimen Sises mehn kahlemeng oh wiahkihla Siohwa arail Kaun. Ia duwe, en papah Siohwa kin keieu kesempwal ong uhk? Ia duwen atail kak kalaudehla atail papah Siohwa oh pil ni ahnsowohte kapwaiada atail pwukoa teikan?​—Wadek Melkahka 71:15; 145:2.

13, 14. (a) Mehn kangoang dah me kowohng Kristian koaros ren kapakapki? (b) Dahme pahn wiahiong sapwellimen Koht aramas akan ren peren?

¹³ Sounpar tohto, sapwellimen Siohwa pwihn kin kangoangehki Kristian kan ren kapakapki ma re kak pioneer. Irair en ekei sapwellimen Siohwa ladu loalopwoat kan sohte kin mweidohng ren kalohk lel awa 70 nan ehuehu sounpwong. Re sohte anahne nsensuwedkihla met. (1 Tim. 5:8) Ahpw ia mwomwen omw irair? Ke kak pioneer?

¹⁴ Medewehla duwen peren me sapwellimen Koht aramas tohto ahneki erein sounpwong en March Ih sounpwongo mwohn Katamano oh sawaspen pioneer kan ahneki ahnsou mwahu ren pilada ma re pahn kalohk awa 30 de 50. (Mel. 110:3) Riatail Kristian rar kei me iang wia sawasepen pioneer. Ke kak pehm uwen peren laud me mi nan mwomwohdiso kan. Ke kak wekidala mwomwen omw koasoandi pwe ken kalapw kak wia sawasepen pioneer? Ni Kristian papidais men eh kin pioneer, e kin uhdahn nsenamwahu ni imwin ehuehu rahn oh e kak nda: “Siohwa, I wiahier soahng koaros me I kak wia nan sapwellimomwi doadoahk.”

15. Mehn akadei dahieu Kristian pwulopwul me anahne ahneki ni eh ieiangete sukuhl?

¹⁵ Ma kowe emen Kristian pwulopwul men me kereniongehr kanekehla omw sukuhl, ke kakete ahneki roson mwahu oh malaulau omw pwukoa. Ke kin medewe mwahu ken pioneer? Omw sounpadahk kan pahn kamehlele me iang sukuhl laud me pahn keieu mwahu ken koasoanehdi omw mour ni ahnsou kohkohdo. Re kin koapworopworki pwihn en aramas akan oh mwohni. Ahpw sohte koapworopwor nan pwihn pwukat. Ma ke wiahki omw papah Siohwa omw doadoahk, ke pahn doadoahngki mwahu omw ahnsou oh ke pahn wia mehkot me pahn mihmi kohkohlahte. Ke pahn kahlemengih sapwellimen Sises mehn kahlemeng unsek. Met iei pilipil mwahu ehu me pahn kahrehiong uhk peren oh e pahn kin pere iuk. E pahn kasalehda me ke sohte pahn mweidohng mehkot en kauhdi omw inou en papah Siohwa.​—Mad. 6:19-21; 1 Tim. 6:9-12.

16, 17. Peidek dah kan Kristian kan anahne pein idek rehrail duwen arail papah Siohwa?

¹⁶ Rahnwet, tohto sapwellimen Koht ladu kan kin anahne doadoahk awa tohto pwe arail peneinei en kak ahneki dahme re uhdahn anahne. Ahpw mwein ekei kin doadoahk awa tohtohsang me re anahne. (1 Tim. 6:8) Sampah kin wia eh kak koaros en kamehlelehiong kitail me kitail anahne pwainda soahng kapw koaros pwe ma soh, kitail sohte kak mour mwahu. Ahpw Kristian mehlel kan sohte men Sehdan oh eh sampah en koasoanehdi dahme re keieu kesempwalki. (1 Sohn 2:15-17) Ahpw ia duwen irair en me lelehr sounpar en kommoal sang doadoahk? Me keieu mwahu me re kak wia iei doadoahngki arail ahnsou ren pioneer oh mwohneki mahs sapwellimen Siohwa doadoahk.

¹⁷ Sapwellimen Siohwa ladu inouda koaros anahne pein idek rehrail: Dahme keieu kesempwal nan ei mour? I kin mwohneki mahs sapwellimen Siohwa doadoahk? I kin kahlemengih Sises oh kasalehda me I men doadoahngki ei ahnsou oh kehl pwehn papah Koht? I kin rong Sises oh kin ideidawehnte? I kak wiahda wekidekla kan nan ei koasoandi pwe ien kak kalaudehla ei doadoahk en kalohk oh wiewia teikan nan sapwellimen Koht doadoahk? Mehnda ma I sohte kak kalaudehla dahme I kak wia met, I kin song rapahki ahl akan me I kak doadoahngki ei ahnsou oh kehl ong Siohwa?

KOASOANEHDI KEN “KAPWAIADA KUPWURE”

18, 19. Dahme ke kak kapakapki? Dahme kahrehda kapakap wet pahn kaperenda Siohwa?

¹⁸ E inenen kaselel en kilang ngoang en sapwellimen Koht aramas akan. Ahpw ekei me kak pioneer mwein sohte inangih de mwein re kin medewe me arail koahiek sohte itar. (Eks. 4:10; Ser. 1:6) Ia duwen ma ke ahneki soangen pepehm wet? Kapakap ong Siohwa oh peki sawas. Pohl koasoia me Siohwa ketin kupwurki sewese kitail en “kak kapwaiada kupwure.” (Pil. 2:13) Eri ma ke sohte ahneki ineng en kalaudehla omw doadoahk en kalohk, peki rehn Siohwa en ketikihong uhk ineng en men wia met oh koahiek.​—2 Pit. 3:9, 11.

¹⁹ Noha, Moses, Seremaia, Pohl oh Sises, irail koaros wia ohl lelepek kei. Re doadoahngki arail ahnsou oh kehl pwehn kalohki sapwellimen Siohwa iren kaweid kan. Re sohte mweidohng mehkot en kedirepwehla arail doadoahk. Imwin koasoandi suwed wet inenen kerendohr. Kahrehda kitail koaros me inoukihongehr Koht atail mour anahne tehk mwahu ma kitail kin wia soahng koaros me kitail kak pwehn alasang mehn kahlemeng inenen mwahu pwukat sang nan Paipel. (Mad. 24:42; 2 Tim. 2:15) Sang ni atail pahn idawehn mehn kahlemeng pwukat, kitail kak kaperenda Siohwa oh e pahn ketin kapaiakitaillda.​—Wadek Malakai 3:10.

[Nting tikitik me mi pah]

[Kilel nan pali 22]

Aramas ako sohte katapanki ahn Noha kaweid kan

[Kilel nan pali 25]

Miehier pak ke medemedewe mwahu iang pioneer?