Kitail En Iang Siohwa Koht Kekeidwei
“Kitail pahn iang Siohwa Koht kekeidwei kohkohlahte.”—MAIKA 4:5.
1. Me pid duwen tiahk mwakelekel, ia mwomwen nan mwehin Noha, oh iaduwen Noha ah weksang aramas teikan?
TEPIN aramas me Paipel mahsanih me iang Koht kekeidwei iei Enok. Keriemen iei Noha. Pwuhk Sarawi kasalehda: “Ohl lelepek men Noha, oh ihete me keniken rehn Koht ahnsowo. E kin iang Koht mehlel kekeidwei.” (Senesis 6:9) Ni mwehin Noha, tohnsampah salongasang kaudok mehlel. Irair en ahnsowo suwedla mehlel pwehki tohnleng me salelepeklahr akan pwoudkihda lih akan en sampah oh naitikihda seri kei me adaneki Nephilim, “aramas kodon kan” de “ohl ndand kan” en nan ahnsowo. Ihme kahrehda sampah en ahnsowo direkihla wiewia lemei! (Senesis 6:2, 4, 11) Ahpw, Noha kin wia dahme pwung oh e kin wia “sounpadahk en pwungen Koht.” (2 Piter 2:5) Ni ahnsou me Koht pahngokihong ih en kauwada warihmw pwe en doarekihla mour, Noha kasalehda peik oh “kapwaiada mehkoaros me Koht ketin mahsanih.” (Senesis 6:22) Mehlel, Noha kin iang Koht kekeidwei.
2, 3. Soangen mehn kahlemeng mwahu dah me Noha wiahiong kitail?
2 Ni ahnsou me Pohl kileledi eden irail sounkadehde lelepek oh pwoson akan, Noha iang ntingdi loale: “Pwoson me kahrehiong Noha eh rong oh peikiong sapwellimen Koht mahsen duwen mehkan me pahn kohdo, me e sohte kak kilangki mese. E peikiong Koht oh wiahda warihmw ehu me kapitala ih oh eh peneinei. Ih met me sampah pakadeingkihda, oh Noha alehsang rehn Koht pwung me pwilisang ni pwoson.” (Ipru 11:7) Noha wia mehn kahlemeng mwahu ong kitail! Noha kihda ah ahnsou, ah kehl oh ah pai koaros pwe en kapwaiada sapwellimen Koht kehkehlik kan pwehki e kamehlele me sapwellimen Siohwa mahsen akan uhdahn pahn pweida. Nan soangen ahlohte, aramas tohto rahnwet kin doadoahngki arail ahnsou kan me irail kak wiahda pai en sampah, oh irail kin doadoahngki arail ahnsou, arail kehl oh neirail mwohni oh dipwisou kan ong peikiong sapwellimen Siohwa kehkehlik kan. Arail pwoson kin kehlail, oh met pahn wahdo komour ong irail oh pil ohng aramas teikan.—Luk 16:9; 1 Timoty 4:16.
3 Mehlel, ahneki pwoson kehlail kin wia mehkot apwal ong Noha oh ah peneinei duwehte e kin apwal ong Enok, en Noha pahpa kahlap, ohl me pwarada nan artikel en mwohn met. Nan mwehin Noha pil duwehte nan mwehin Enok, irail tohnkaudok mehlel akan me malaulau—irail mehte welimen me pwoson oh eri mourla nan Nohliko. Noha kalohki duwen pwungen Koht nan wasa ieu me direki lemei oh tiahk samin. Oh pil, ih oh ah peneinei wie kakau warihmw tuhke laud ieu pwehn kaunopadahng Nohlik ehu me pahn kipe sampah pwon, mendahte aramas arail saikinte kilang lapake wiawi mwohn Nohliko. Arail mwekid wia mehkot me aramas en ahnsowo sohte kak wehwehki.
4. Soangen sapwung dah me Sises kasalehda me pid aramas akan me iang momour ni mwehin Noha?
4 Kitail en tehk me ahnsou me Sises kasalehda duwen mwehin Noha, e sohte kasalehda duwen wiewia lemei, de kaudok likamw, de tiahk suwed en ahnsowo—edetehn wiewia suwed pwukat rek nan mwehio. Sapwung me Sises kasalehda iei me aramas akan sohte men tehk kehkehlik me kohwong irail. E kasalehda me aramas en ahnsowo wie “pereperen kamakamadipw ni rahn ako mwohn nohlik lapalapo, ohl oh lih akan wiewia pwopwoud lao lel rahn me Noha pedolong nan warihmwo.” Mwengemwenge, niminim, wie pwopwoud—mehpwukat sapwung? Irail wiewia dahme aramas uhdahn kin wia! Ahpw, aramas en ahnsowo anahne tehk, pwe nohlik kohkohdohng irail, oh Noha kin kalohkiseli duwen wiewia pwung. Ah mahsen kan oh ah wiewia kan konehng en wia mehn kapehm ong irail. Ahpw, irail “sasairki nohliko, e lao komwopwirailla koaruhsie.”—Madiu 24:38, 39.
5. Soangen irair dah kan me Noha oh ah peneinei anahne ahneki?
5 Ni atail tehk sapahl duwen ahnsowo, kitail kak kilang me en Noha elen mour me kasalehda erpit. Ahpw, mwohn Nohlik wiawi, e sansal me aramas emen anahne lamalam kehlail ma e men weksang aramas teikan. E wia elen koasoandi kehlail ieu ong Noha oh ah peneinei en kauwada lapalahn warihmwo oh audehkihla soangsoangen mahn akan. Iaduwen—ekei pak, irail me lelepek ko kin medewehda en dehr nohn nannanti oh mour “nin duwen me aramas teikan” kin momourki? Mendahte ma irail mwuhr lemehda soahng wet, met sohte kin kauwehla arail lelepek. Mwurin sounpahr tohto—reirei sang erein ahnsou ieu me kitail koaros pahn kak momour nan koasoandi suwed wet—en Noha pwoson kin teng oh kahrehong en mourla oh pitsang Nohliko. Ahpw, Siohwa ketin kaloke irail koaros me kin “wiewia dahme aramas uhdahn kin wia” oh irail sohte kin men tehk soangen ahnsou dah me re mihmi loale.
Wiewia Lemei Pil Pwurehng Kauwehla Aramas
6. Mwurin Nohliko, tohnsampah kin kasalehda soangen irair dah kan?
6 Mwurin pilen Nohliko ah pwuredi, tohnsampah tepida ehu mour kapw. Ahpw, tohnsampah wiewiahte aramas soh unsek, oh “sang ni ar tikitik ar lamalam akan kin uhwongete ni me suwed.” (Senesis 8:21) Oh pil, mendahte ngehn saut akan ahr solahr kak wia aramasala, irail kin wiewiahte arail doadoahk laud en pitih aramas. E sansal me aramas soh pwoson akan en ahnsowo kin “mi pahn manaman en Me Suwedo,” oh pil duwehte nan rahnwet, tohnkaudok mehlel kan anahne peiong “en Tepil eh widing suwed kan.”—1 Sohn 5:19; Episos 6:11, 12.
7. Ia mwomwen irair en loallap ah susuwedla nan sampah mwurin Nohliko?
7 Sangehr ni mwehin Nimrod, mwurin Nohlik wiawi, sampah pil pwurehng wiahla wasahn aramas lemei. Pwehki aramas tohtohla oh wiepen dipwisou kan mwamwahula, irair en loallap susuwedla mwadang. Mahs, aramas kin doadoahngki kedlahs, ketieu oh kuruma. Ni ahnsou kerendo kan, miehier kesik, kesik lapalap, kesik reirei, oh soangsoangen dipwisou en mahwen akan me wiawihda nan senturi kerieisek. Mahwen Keieu en Sampah kahrehda wiawihdahn dipwisou en mahwen kamasepwehk kan, me duwehte sompihr, dangku, sopidu, oh kahs poisin. Nan mahweno, dipwisou en mahwen pwukat kemehla aramas rar rar kei. Met mehkot me sohte kasikpe? Soh.
8. Iaduwen Kaudiahl 6:1-4 pweida?
8 Nan pahr 1914, Sises wiahlahr Nanmwarki en Wehin Koht nanleng, oh “Rahnen Kauno” tepidahr. (Kaudiahl 1:10) Sang nan kasansal ieu me pwarada nan pwuhken Kaudiahl, Sises wie ketiket kohwei pohn dakepe oahs pwetepwet oh kalowehdi wasa. Soundake oahs teikan tangodo mwuri, oh emen emen irail kin wia kilelepen soangsoangen apwal me pahn lelohng tohnsampah. Emen irail dake oahs weitahta, oh manaman kohwong ih en “kamwakid mahwen nin sampah pwe aramas akan en pakamakampene nanpwungahr. Kedlahs reirei pwoat pil kohieng.” (Kaudiahl 6:1-4) Oahs menet oh me dakeo kin wia kilelepen mahwen, oh kedlahs reirei kin wia kilelepen dipwisou en mahwen keper en mwehiet me sohte mehkot pahrekiong. Mehpwukat iei me iangahki kinsi pakudang me kemehla aramas lopw kei, oh rocket kan me kak pihrih oh kauwehla imwintihti me mihmi mwail kei wasa doh, oh pil wini en mwahs akan me kin wiahkintehieu kemehla aramas tohto.
Kitail Rong Kanahieng Kehkehlik en Siohwa kan
9. Ia mwomwen sampahn rahnwet ni atail pahn karasahiong mwohn Nohliko?
9 Ni mwehin Noha, Siohwa ketikihdohng kamwomwpen tohnsampah pwehki wiewiahn loallap daulihala kan me aramas suwed akan wiewia oh met Nephilim me kin kaweidada. Ah iaduwen nan rahnwet? Sampah wet mwahu sangehr ni ahnsowo? Uhdahn soh! Me rasehng ni mwehin Noha, aramas en rahn pwukat wiewiaseli pein arail, songosong arail mour “duwen me kin wiawi” oh sohte men rong kehkehlik kan me wiewiawi. (Luk 17:26, 27) Mie kahrepe me kitail pahn lemehkiong me Siohwa sohte pahn pwurehng ketikihdo kamwomwpen tohnsampah? Soh.
10. (a) Dahme kokohp en Paipel kin kasalehda pahn wiawi ni ahnsou kohkohdo? (b) Dahme kitail pahn wia rahnwet me pahn kasalehda atail ahneki erpit?
10 Sounpahr epwiki mwohn Nohliko, Enok kohpadahr kamwomwpen tohnsampah nan atail ahnsou. (Sud 14, 15) Sises pil mahsanih duwen “kahn kamakam kowahlap” me pahn leledo. (Madiu 24:21) Soukohp teikan pil kohpada duwen ahnsowo. (Esekiel 38:18-23; Daniel 12:1; Soel 2:31, 32) Oh pil nan pwuhken Kaudiahl, kitail kilang kawehwehpen kamwomwpen imwin ahnsou. (Kaudiahl 19:11-21) Emen emen kitail men kahlemengih Noha oh nannanti ni atail wia sounkalohkpen wiewia pwung. Kitail kin rong oh kapwaiada kehkehlik en Siohwa kan oh kitail kin sewese mehn mpatail kan en pil wia duwehte. Kahrehda, duwehte Noha, kitail kin iang Koht kekeidwei. E uhdahn kesempwal me aramas me men ale mour soutuk en iang Koht kekeidwei. Iaduwen atail kak wia met ni atail kin lelohng kasongosong oh kahpwal tohto rahnwet? Kitail anahne kakairada pwoson kehlail me kupwuren Siohwa pahn pweida.—Ipru 11:6.
Iangete Koht Kekeidwei ni Ahnsou Apwal akan
11. Ni ahl dah me kitail kin kahlemengih Kristian akan nan senturi keieu?
11 Nan senturi keieu, Kristian me keidi kan kin idawehn “Ahl en Kauno.” (Wiewia 9:2) Arail mour unsek kin poahsoankihda arail pwoson Siohwa oh Sises Krais. Irail kin keidwei nan elen arail Soumaso. Nan rahnwet, Kristian lelepek kan kin wia duwehte.
12. Dahme wiawi mwurin Sises eh wiahda manaman oh kamwenge pokono?
12 Kitail kin kilang kesempwalpen pwoson sang ni irair me pwarada ni ahnsou Sises ketiket nin sampah. Ehu pako, Sises wiahda manaman oh kamwenge aramas 5,000 samwa. Aramas pwukat pwuriamweikihla oh perenkihda. Ahpw, tehk dahme wiawi mwurin met. Kitail wadek: “Ni aramas ako me mi wasao ar kilangehr kilel wet me Sises ketin wiadahr, re ahpw nda, ‘Mehlel, ohl menet iei ih Soukohpo me pahn pwarodohng sampah!’ Ni Sises eh ketin mwahngihada me irail pahn kodohng ale, pwe re en kasapwiladahng nanmwarki, e ahpw kelepw ketila sang rehrail oh ketidalahng pohn nahnao.” (Sohn 6:10-15) Ni pwongo, e ketidalahng ehu wasa tohrohr. Sises sohte kupwurki wiahla nanmwarki oh met kapahtouwihala me tohto. Irail kilangehr me nin duwen me e ketin kasalehdahr, e sapwellimaniki erpit oh kak wia nanmwarki oh e sapwellimaniki manaman me kak kaitarala en aramas anahn en war kan. Ahpw, e saikinte lel sapwellimen Siohwa ahnsou en kasapwilada ih en wiahla Nanmwarki. Oh pil ehu, Sises pahn kaunda wehin Koht sang nanleng, kaidehn sampah.
13, 14. Soangen madamadau dah me aramas tohto kasalehda me irail ahneki, oh iaduwen mwomwen kasongepen arail pwoson?
13 Nin duwen Sohn ah kasalehda, pokono pil nannantihte oh idawehnla mwuri oh diar ih “palio sehdo.” Dahme kahrehda irail pwakipwakih Sises ni ah soikehr en wiahla nanmwarki men? Irail meh tohto kasalehda arail nsenohki mehkan ni pali uduk, oh irail kasalehda met ni arail koasoia duwen kapai en war akan me Siohwa ketin wiahda nan sapwtehn ni mwehin Moses. Irail lemeleme me Sises pahn ketikihong irail arail anahn en war kan. Sises kilang arail madamadau sapwung kan oh tapihada padahkiong irail padahk ngenin akan me kak sewese irail en kapwungala arail madamadau kan. (Sohn 6:17, 24, 25, 30, 31, 35-40) Ekei kin kauwe ih, ni mehlel, ahnsou me e wia karasaras me mahsanih: “I ndaiong kumwail ni mehlel: ma kumwail sohte pahn tungoale uduk en Nein-Aramas, oh nim nta, nahn, mour soutuk sohte pahn mi loalamwail. Mehmen me kin tungoale udukei oh nim ntahi, iei ih me ahneki mour soutuk, oh I pahn komourada ni imwilahn rahn.”—Sohn 6:53, 54.
14 Sapwellimen Sises karasaras kan kin kalap kasalehda ma mehlel aramas akan kin men iang Koht kekeidwei de soh. Kahrehda, karasaras me e wia ahnsowo pil duwehte. E kamwekidada laud madamadau kan. Kitail wadek: “Eri, me tohto sang nanpwungen sapwellime tohnpadahk ko lao rongada mepwukat, re ahpw nda, ‘Padahk pwoatet meid nohn apwal! Ihs me kak rong?’ ” Sises eri doula oh kawehwehda me irail en rapahki wehwe ngenen kan en sapwellime mahsen ko. E mahsanih: “Ngenen Koht me kin kihong mour; paliwar en aramas sohte kak wia met. Mahsen kan me I kin padahkiong kumwail kin manaman oh mour.” Ahpw, pil irail me tohto sohte men rong ih, oh ihme e ntingkihdi: “Pwehki padahk wet, me tohto sang nanpwungen irail kan me ideidawehn Sises mweikihsangehr oh solahr men idawehn.”—Sohn 6:66.
15. Madamadau pwung dah me irail sapwellimen Sises tohnpadahk lelepek kan ahneki?
15 Ahpw, kaidehn sapwellimen Sises tohnpadahk kan koaros ahneki madamadau wet. Mehlel, sapwellime tohnpadahk lelepek kan kasalehda me re sohte nohn wehwehki mwahu dahme Sises ketin padahki. Ahpw, arail likih oh koapworopworki Sises me inenen kehlail. Emen sapwellimen Sises me lelepek ko, me iei Piter, kasalehda pepehm akan en irail oko koaros me luhluhwe kan ni ah nda: “Maing, ihs me se pahn patohla reh? Sapwellimomwi mahsen kan, iei mahsen en mour soutuk.” (Sohn 6:68) Ia uwen madamadau wet ah nohn kaselel, oh wia mehn kahlemeng mwahu ong kitail!
16. Ia mwomwen atail pahn kak ale kasongepen atail pwoson, oh soangen madamadau pwung dah me kitail en kakairada nan loaletail?
16 Pil kitail akan en rahnwet kak ale kasongepen atail pwoson duwehte me wiawihiong sapwellimen Sises tohnpadahk kan en mahs. Mwein ong ekei kitail, kitail pahn pwandikihdahr sapwellimen Siohwa inou kan arail saikinte pweida nin duwen atail anahne en wiawi. Kitail ele kin pepehm me kawehwehn iren Paipel kan nan neitail pwuhk kan me kin kawehwe duwen Paipel kin apwal en wehwehki. De pil mwein wiewiahn iengetail Kristian men me kin kansensuwedih nan kapehdatail. E pahn pwung kitail en uhdi sang atail iang Koht kekeidwei pwehki kahrepe pwukat de pil kahrepe teikan me rasehng mehpwukat? Uhdahn soh! Tohnpadahk ko me kohkohsang Sises kasalehda me re kin medemedewehte mehkan en uduk. Kitail en dehr alasang irail.
“Kaidehn Kitail Soangen Aramas me Kin Kesehla Atail Pwoson”
17. Dahme kak sewese kitail en iang Koht kekeidwei?
17 Wahnpoaron Pohl ntingihdi: “Audepen Pwuhk Sarawi unsek pwilisang rehn Koht.” (2 Timoty 3:16) Nan Pwuhk Sarawi, Siohwa mahsanih ong kitail ni sansal: “Iet ahlo, kumwail idawehn.” (Aiseia 30:21) Atail peikiong Mahsen en Koht kin sewese kitail en “kanahieng duwen atail mour me kitail weweidki.” (Episos 5:15) Atail onop Paipel oh doudouloale dahme kitail sukuhliki kin sewese kitail en “weweidweite nan elen padahk mehlel.” (3 Sohn 3) E mehlel me Sises mahsanih, “Ngenen Koht me kin kihong mour; paliwar en aramas sohte kak wia met.” Ihte elen kaweid me kitail kak koapworopworki en kahluwa atail mour iei kaweid me kin kohsang sapwellimen Siohwa Mahsen, sapwellime ngehn sarawi oh sapwellime pwihn.
18. (a) Soangen elen mour pweipwei dah me ekei aramas kin mourki? (b) Soangen pwoson dah me kitail en kakairada?
18 Rahnwet, irail oko me solahr iang padahk mehlel pwehki madamadau sapwung kan de pwehki dahme re kasik sohte kin pweida kin kalap rapahkihla pai en sampah kan. Irail solahr ahneki pepehm en karuwaru, kahrehda irail sohte kilang anahnepen irail en “wie mwasamwasahn” oh irail pilada en idawehn elen roporop ong pein irail oh sohte kin rapahki mahs Wehin Koht. (Madiu 24:42) Soangen elen mour wet me nohn pweipwei. Menlau tehk mahsen en wahnpoaron Pohl: “Eri, kaidehk kitail kisehn irail kan me kin kesehla ar pwoson, re ahpw kin lekdekla. Pwe mie atail pwoson oh kitail aleier komourpatail.” (Ipru 10:39) Duwehte Enok oh Noha, kitail mihmi nan ahnsou apwal, oh pil duwehte ira, kitail pil ahneki ahnsou mwahu en iang Koht kekeidwei. Ni atail pahn wia met, kitail kak koapworopworki me kitail pahn kilang pweidahn sapwellimen Koht inou kan, oh kitail pahn kilang me suwed akan pahn sohrala, oh sampah kapw me aramas pwung kan pahn mih loale pahn kohdo. Ia uwen kapai laud!
19. Iaduwen Maika a kin kawehwe duwen tohnkaudok mehlel kan arail elen mour?
19 Sang ni kaweid en ngehn sarawi, soukohp Maika mahsanihki duwen irail wehin sampah kan oh mahsanih me irail en “alialuhki eden ah koht.” Oh ih eri mahsanihki duwen pein ih oh tohnkaudok lelepek teikan oh nda: “Kitail pahn iang Siohwa koht kekeidwei kohkohlahte.” (Maika 4:5) Ma ahmw inou iei en duwehte ahn Maika, eri nannanti karanih Siohwa Koht mendahki ahnsou apwal akan me kitail mihmi loale ahnsouwet. (Seims 4:8) Kitail koaros en koasoanehdi nan kapehdatail en iang Siohwa Koht kekeidwei ahnsouwet oh pil kohkohlahte!
Iaduwen Ahmw Pahn Sapeng?
• Dahme duwepenehte nan mwehin Noha oh nan atail ahnsou?
• Dahme Noha oh ah peneinei pilada en wia, oh iaduwen kitail kak kahlemengih arail mehn kahlemeng mwahu en pwoson?
• Soangen madamadau sapwung dah me ekei sapwellimen Sises tohnpadahk kan ahneki?
• Dahme Kristian mehlel akan pahn koasoanehdi nan kapehdarail ren wia?
[Kilel nan Pali 26]
Duwehte ni mwehin Noha, aramas akan kin kedirepwkihla arail wiewiahn ehuehu rahn akan
[Kilel nan Pali 27]
Nin duwen sounkalohk en Wehio kan, “kaidehn kitail soangen aramas me kin kesehla atail pwoson”