Ke Onopadahng Komourala?

“Pedolong nan warihmwen, iangahki omw peneinei koaros; pwe kowehte rehn aramas pwukat me I diarada me kin wia dahme pwung.”—SENESIS 7:1.

1. Soangen koasoandi dah me Siohwa ketin wia pwe en mie me kamourala ni mwein Noha?

SIOHWA “ketikihdiong pohn tohnsampah suwed ko Nohlik Lapalapo” ni mwein Noha, ahpw e ketin koasoanehdi pwe en mie me komourala. (2 Piter 2:5) Koht mehlelo ketikihong Noha, me wia aramas pwung emen, kaweid oaritik duwen mwomwen eh pahn wiahda warihmw ehu me pahn kak doarehla mour sang nohliko me pahn leledohng sampah pwon. (Senesis 6:14-16) Pahrekiong dahme kitail kak kasik sang emen me kin lelepek ong Siohwa, “Noha eri ahpw kapwaiada mehkoaros me Koht ketin mahsanih.” Pwehki Noha peik, ih pil ehu kahrepen atail momour ahnsou wet.—Senesis 6:22.

2, 3. (a) Iaduwen irail akan ni mwehin Noha mwekidki doadoahk me Noha kin wia? (b) Soangen koapworopwor dah me Noha ahneki ni eh pidelong nan warihmwo?

² Kauwada warihmwo sohte wia doadoahk tikitik ehu. Mwein ele aramas tohto pwuriamweikihla en Noha oh eh peneinei arail kauwada warihmwo. Ahpw, met sohte kamwekid irail en kamehlele me irail anahne pidelong nan warihmwo pwehn komourala. Koht solahr kak kanengamahiong sampah suwed wet.—Senesis 6:3; 1 Piter 3:20.

³ Mwurin Noha oh eh peneinei kin wiahier doadoahk laud erein sounpar tohto kei, Siohwa mahsanihong Noha: “Pedolong nan warihmwen, iangahki omw peneinei koaros; pwe kowehte rehn aramas pwukat me I diarada me kin wia dahme pwung.” Ki likilik oh pwoson mahsen en Siohwa, “Noha, eh pwoudo, nah pwutak ko, oh ar pwoud kan eri pedolong nan warihmwo.” Siohwa eri ketin ritingedi wenihmwen warihmwo pwehn pere irail akan me kin kaudokiong ih. Ni ahnsou me nohliko leledo, e sansalda mwahu me Koht ketikihda warihmwo pwehn doarehla mour.—Senesis 7:1, 7, 10, 16.

Irair en ni Mwehin Noha Pahrekiong Irair en Atail Ahnsou

4, 5. (a) Ahnsou dah me Sises karasahiong rahn me e ketiket pohn mwoale nanleng? (b) Ni ahl dah me mwehin Noha oh atail ahnsou duwehkihpene?

⁴ “Ketidohn Nein-Aramas pahn duwehte me wiawiher ni mwehin Nohao.” (Madiu 24:37) Ki mahsen pwukat, Sises mahsanih me ahnsou me e pahn ketiket pohn mwoale nanleng pahn pahrekiong ni mwehin Noha, oh met inenen mehlel. Eri, ni mehlel sangehr pahr 1919, kehkehlik ehu me pahrekiong kehkehlik en ni mwehin Noha kin wie lohkseli ohng aramas akan en wehi koaros. Ni oaralap, aramas en nan rahnpwukat kin mwekidki iren kehkehlik wet ni soangen ahlohte me irail ni mwehin Noha ko kin mwekidki duwen met.

⁵ Siohwa ketin doadoahngki Nohliko pwehn kamwomwala sampah ehu me “direkilahr arail wiewia suwed kan.” (Senesis 6:13) Irail akan koaros me kin kilang Noha oh eh peneinei kan kin pohnese duwen arail sohte kin iang pidada soangen wiewia suwed kan ahpw kin ni meleilei wiewia ahr pwukoahn wiahda warihmw. Met pil kin pahrekiong atail ahnsou. Aramas akan me loal mehlel kin kak “kilang wekpeseng en aramas pwung kan oh aramas suwed kan, me kin papah ie oh me sohte kin papah ie.” (Malakai 3:18) Aramas me sohte poupali kan kin pohnese oh mwekidki duwen mehlel, kadek, meleilei, oh ngoang me Sounkadehdehn Siohwa kan kin kasalehda oh aramas kak ese ihs me sapwellimen Koht aramas oh ihs me kisehn sampah pwehki sapwellimen Koht aramas akan kin kasalehda irair mwahu pwukat. Sounkadehde kan kin liksang soangen tiahk lemei koaros oh kin mweidohng sapwellimen Siohwa ngehn sarawi en kahluwa irail. Ihme kahrehda, irail kin ahneki meleilei oh kin keid nan ahl me pwung.—Aiseia 60:17.

6, 7. (a) Dahme irail akan en ni mwehin Noha sohte kin kalahnganki, oh iaduwen met pahrekiong nan rahnpwukat? (b) Soangen mehn karasepe dah kan me kin kasalehda me Sounkadehdehn Siohwa kan weksang meteikan?

⁶ Irail akan en ni mwehin Noha kin sohte pohnese me Koht me kin ketin utung oh kahluwa Noha. Kahrehda, irail sohte kin nsenohki en Noha kin kalohk ohng irail oh kihong irail mahsen en kehkehlik kan. Ah iaduwen nan rahnwet? Mendahki tohto kin kapingahki Sounkadehdehn Siohwa duwen arail doadoahk oh tiahk mwahu, irail sohte kin nsenohki doadoahk en kalohk oh kehkehlik kan en Paipel. Mehn mparail, ahr tohn doadoahk, oh ahr peneinei kan kin kapingki duwen ahr irair mehlel en Kristian kan ahpw irail kin koasoia, “Ahpw ihte ma irail kaidehn Sounkadehdehn Siohwa!” Ahpw dahme irail pwukat sohte kin wehwehki iei me irail Sounkadehde pwukat kin kasalehda soangen irair akan me duwehte limpoak, popohl, kadek, loalopwoat, opampap oh liksang me suwed pwehki ngehn sarawi en Koht me kin kahluwa irail. (Kalesia 5:22-25) Met konehng en kamwakid irail en kamehlele mahsen kan me irail Sounkadehdehn Siohwa kan kin kalohki.

⁷ Karasepe ehu, nan Russia, irail Sounkadehdehn Siohwa kan kin wie kokou ehu Kingdom Hall. Emen ohl eri uhdi pwehn koasoi ohng emen tohn doadoahk ko oh nda: “Uhdahn ehu soahng wasahn doadoahk wet—sohte me kin simoak, lokaia suwed, oh sohte me pil kin sakau! Kaidehn kumwail Sounkadehdehn Siohwa kei? Tohn doadoahko eri idek rehn ohlo, “Ma I nda me soh, ke pahn kamehlele ie?” Ohlo mwadangete sapeng, “I sohte pahn nohn kamehlele.” Nan ehu kahnimw nan Russia, mayor en wasao kapingki eh kilang duwen Sounkadehde kan ahr pein tapihada oh kanekehla arail Kingdom Hall kapw. E koasoia me mahs e kin kilangwohng sarawi koaros me dene irail duwepenehte, ahpw mwurin eh kilang duwen irair en soh roporop me Sounkadehdehn Siohwa kan kin kasalehda, e solahr kin ahneki soangen madamadau wet. Met wia mehn karasepe riaute me kin kasalehda me sapwellimen Siohwa aramas akan kin weksang irail kan me sohte kin kapwaiada koasoandi kan en Paipel.

8. Atail pitsang sampah suwed wet kin pidada dah?

⁸ Ni imwin rahn akan en “mehn kawa ko” me sohrala nan Nohliko, Noha wia emen me kin lelepekihong doadoahk en “lohkiseli duwen mour pwung pahn kupwuren Koht.” (2 Piter 2:5) Ni imwin koasoandi suwed wet, sapwellimen Siohwa aramas akan kin kalohkiseli duwen sapwellimen Koht irair pwung kan oh pil rongamwahuo me aramas kak mour nan sampah kapw ehu. (2 Piter 3:9-13) Duwehte Noha oh eh peneinei ahr komourala pwehki warihmwo, kamourala en irail akan nan rahnpwukat pahn pil pidada ahr pwoson oh ahr kin werekiong oh loalopwoat ong sapwellimen Siohwa pwihn me mih wasa koaros nan sampah.

Pwoson Anahn Pwehn Komourala

9, 10. Dahme kahrehda pwoson inenen kesempwal ma kitail men pitsang koasoandi suwed wet en Sehdan?

⁹ Dahme emen anahne wia pwehn pitsang sampah wet me mih pahn manaman en Sehdan me nektehn kasohrala? (1 Sohn 5:19) E anahne pohnese me mie anahnepen mehn perepe. E anahne mweidohng pein ih en kak ale soangen mehn perepe wet. Irail ako en ni mwein Noha kin doula nan ahr pwukoah kan en ehuehu rahn oh sohte kin kilang anahnepen ale pereparail sang apwal laud me nektehn pwarada. Mie mehkot me irail sohte pil ahneki—pwoson Koht.

¹⁰ Ni pali teio, Noha oh eh peneinei kin pohnese anahnepen irail en rapahki mehn pereparail oh me pahn kapitirailla. Irail kin pwoson Kaun Wasa Lapalahpie, Siohwa Koht. “Eri, sohte me kak kenikenla pahn kupwur en Koht ma sohte eh pwoson. Pwe mehmen me men kowohng rehn Koht uhdahn pahn kamehlele me Koht ketin mie, oh me Koht kin ketin katingih irail kan me kin raparapahki.” Pohl kapatahiong: “Pwoson me kahrehiong Noha eh rong oh peikiong sapwellimen Koht mahsen duwen mehkan me pahn kohdo, me e sohte kak kilangki mese. E peikiong Koht oh wiahda warihmw ehu me kapitala ih oh eh peneinei. Ih met me sampah pakadeingkihda, oh Noha alehsang rehn Koht pwung me pwilisang ni pwoson.”—Ipru 11:6, 7.

11. Dahme kitail kak sukuhliki sang duwen mehn perepe kan me Siohwa kin ketikihda mahs?

¹¹ Pwehn pitila sang imwin koasoandi suwed wet, kitail anahne wia laudsang ihte kamehlele me koasoandi wet pahn sohrala. Kitail anahne kasalehda pwoson, oh nantihong alehdi mehn sawas kan me Koht kin ketikihong kitail pwe kitail en kak kamourala. Ehi, mehlel me kitail anahne pwoson meirong tomw en Sapwellimen Koht Ohl, Sises Krais. (Sohn 3:16, 36) Ahpw e pahn mwahu ma kitail kin tamataman me ihte irail kan me pitsang Nohliko iei irail akan me mih nan warihmw me Noha wiahda. Duwehte met, kahnimw en rukula kan nan Israel en mahs kin wiawihda pwehn wia perehpen irail akan me depweila oh kemehla aramas. Irail pahn mihmihte nan kahnimw pwukat lao samworo lapalapo pahn mehla. (Nempe 35:11-32) Nan kalokolok kaeisek me lelohng wehin Isip ni mwein Moses, mesenih en Isip ko kamakamala, ahpw nein mehn Israel kan pitila. Pwekida? Siohwa kaweidki Moses: “Irail [mehn Israel kan] pahn ale ekis nta [en sihmpwul en Pahsohpa] oh iriski uhr en wenihmw kan oh nan temwen ihmw kan me re pahn tungoale ie mahno. . . . Sohte emen kumwail pahn pedoisang nan imwe lao lel nimenseng.” (Eksodus 12:7, 22) Ihs rehn nein mehn Israel mesenih kan me pahn song sapeikiong mahsen en kaweid me Koht ketikihda ni eh pahn pedoisang ihmw ehu me towe kan iriski nta uhr rioapwoat en wenihmw oh nan temwen ihmwo?

12. Soangen peidek dah me emenemen kitail en kin pein idek rehtail, oh pwekida?

¹² Ihme kahrehda uhdahn mie kahrepen kitail en kin medewe kanahieng duwen atail irair akan. Iaduwen, kitail iang mih nan koasoandi en perepe ngenin kan me Siohwa kin ketikihda? Ahnsou me kahn kamakam kowahlap pahn leledo, pilen mesen irail akan me kin rapahki soangen mehn perepe pwukat pahn kerkihdi ahr peren oh ahr kalahnganki soangen perepe pwukat. Ah ohng meteikan, pilen masarail pahn kerkihdi ahr nsensuwed oh koluhla.

Ekis Ekis Kaiahne Kitail Pahn Kaunopada Kitail

13. (a) Ia kahrepen kaiahn ohng soangen koasoandi kapw akan kin anahn?(b) Kawehwehda ekei soangen wekideklahn koasoandi kan me kin ekis ekis wiawi.

¹³ Siohwa kin ekis ekis ketikihong sapwellime pwihn pohn sampah soangen koasoandi kan. Koasoandi pwukat kin wiawihda pwehn kalinganahda, katengehdi, oh kakehlakahda sapwellime koasoandi kan me pahn wia perehpen atail pali ngehn. Sang pahr 1870 lel pahr 1932, irail kisehn mwomwohdiso kan kin usada elder kan oh dihken kan. Nan pahr 1932, service committee ehu me pilipilda pwehn wia sawasepen service director oh uhd wiliandi pwihn en elder pilipilda kan. Nan pahr 1938, sapwellimen Siohwa pwihn uhd wiahda koasoandi me ladu en mwomwohdiso koaros en kin pilipilda ni ahl ehu me pahrekiong koasoandi en Koht. Sangehr pahr 1972, pahn epwel en irail Governing Body en Sounkadehdehn Siohwa kan, mwomwohdiso kan kin alehdi kisinlikou kan me kin kasalehda duwen irail akan me warohng oh pilipildahier pwehn wia elder oh ministerial servant kei. Nan pahr kan me dower powe, pwukoah en Governing Body kin wie lalaudla oh mie soangen wekidekla kan me kin wiawi pwehn sewese arail pwukoa doadoahk.

14. Soangen prokram en kasukuhl dah me tepidahr nan pahr 1959?

¹⁴ Nan pahr 1950, petehk keneinei wiawiher ohng iren Melkahka 45:16 oh met imwikihla prokram en kaiahn ehu me kin wiawi kaukaule. Iren Paipel wet mahsanih: “Komw pahn ketin sapwellimankihla pwutak tohto me pahn wiliandi omwi pahpa kahlap ako nin duwen nanmwarki kei, oh komw pahn kasapwilirailda pwe re en kaunda sampah pwon.” Elder kan me kin kahluwa mwomwohdiso kin ale kaiahn ohng arail pwukoa kan en nan rahnpwukat oh pil mwurin Armakedon. (Kaudiahl 16:14, 16) Kingdom Ministry School tepida nan 1959. Nan ahnsowo, mehn kasukuhl ehu me reireiki sounpwong ehu kohda ohng irail ladu en mwomwohdiso kan, nin duwen me irail presiding overseer kan kin kahdaneki mahs. Mehn kasukuhl wet uhd pil kohwongehr overseer oh ministerial servant koaros nan rahnwet. Irail brother pwukat uhd kin kaiahne emenemen Sounkadehdehn Siohwa kan nan mwomwohdiso kan me re kin wia kiseh. Kahrehda, koaros kin ale mehn sawas ngenin kan oh kin ale sawas duwen mwomwen ahr pahn kak kalaudehla ahr doadoahk nin duwen sounkalohk kei en rongamwahu en Wehio ni ahl me lipwalipw.—Mark 13:10.

15. Soangen ahl riau dah me Kristian kan kin doadoahngki pwehn kak pere mwakelekel en mwomwohdiso?

¹⁵ Irail akan me men wia kisehn mwomwohdiso en Kristian anahne en kapwaiada soangen irair kei. E sansal me irail akan nan rahnpwukat me kin kouruhrki de kapailoke sapwellimen Siohwa pwihn sohte kak wiahla kisehn Kristian, duwehte irail akan me sohte mweimweiong irail en iang pidelong nan warihmw me Noha wiahda. (2 Piter 3:3-7) Eri, sangehr pahr 1952, Sounkadehdehn Siohwa kan kin kalaudehla arail utuht ohng koasoandi kan me kin sewese pere mwomwohdiso ni arail kin pisikensang mwomwohdiso irail me kin wiahda dihp ahpw sohte koluhla. Ehi, irail akan me kin wiahda sapwung ahpw koluhla mehlel kin ale sawas akan me kin kohda ni elen limpoak irail en ‘ahpw weweidwei nan ahl inen.’—Ipru 12:12, 13; Lepin Padahk 28:13; Kalesia 6:1.

16. Ia irair en pali ngehn en sapwellimen Siohwa aramas?

¹⁶ Keirdahn pali ngehn en sapwellimen Siohwa aramas akan sohte wia mehn kapwuriamwei ehu de mehkot me depweila oh wiawi. Siohwa doadoahngki soukohp Aiseia oh mahsanih: “Eri, I mahsanihong kumwail me irail kan me kin pwongih ie oh peikiong ie pahn paieki kisin tungoal oh pihl tohto, a kumwail pahn duhpekla oh men nimpilda. Re pahn pereperen, a kumwail pahn sarohdi. Re pahn kokoulki ar peren, a kumwail pahn sengiseng kowahlap.” (Aiseia 65:13, 14) Siohwa kin ahnsou koaros ketikihong kitail mwengehn ngehn kan me pahn kahrehiong kitail en kin kehlail ni pali ngehn.—Madiu 24:45.

Onopadahng Komourala

17. Dahme pahn sewese kitail en kaunopada pwe en komourala?

¹⁷ Weksang mahs, met iei ahnsou en “nsenoh sawaspene ni kasalepen atail limpoak oh atail wiewia mwahu kan. Kitail dehr tokedihsang atail tiahk en pokonpene, duwen ekei ar kin epwehnki wia. A kitail nantihong kakehlaka nan kapehd en emenemen.” (Ipru 10:23-25) Atail kin werekiong kisehn tohn mwomwohdiso en Sounkadehdehn Siohwa kan me tohtohsang mwomwohdiso 98,000 oh kitail kin kehkehlailte ni pali ngehn pahn sewese kaunopkitaildahng komourala. Kitail pahn kin ale sawas sang riatail kan ni pali ngehn ni atail kin nantihong wia “aramas kapw” oh wia wen atail kak koaros sang nan mohngiongatail kitail en sewese meteikan sukuhliki duwen kupwur en Siohwa me pid kamourala.—Episos 4:22-24; Kolose 3:9, 10; 1 Timoty 4:16.

18. Dahme kahrehda kitail koasoanehdier teng nan atail lamalam kitail en kin karanih mwomwohdiso en Kristian?

¹⁸ Sehdan oh ah sampah suwed wet kin men kasonge kitail pwehn kahrekitailweisang mwomwohdiso en Kristian. Ahpw, mendahki met, kitail kak kin karanih mwomwohdiso en Kristian oh pitsang koasoandi suwed wet. Eri, atail limpoak ohng Siohwa oh atail kalahnganki sapwellime koasoandi kan en kin kamwekid kitail en men wia uwen atail kak koaros pwehn pelianda koasoandi en Sehdan kan. Atail kin doudouloale kapai kan me kitail kin ale nan rahn pwukat pwehki atail wia Kristian kei pahn kin kakehle atail koasoandi teng me kitail wiahda. Kitail pahn koasoia ekei kisehn kapai pwukat nan artikel en mwurin met.

Ia Ahmw Pasapeng?

• Iaduwen atail ahnsou pahrekiong mwein Noha?

• Soangen irair dah kan me anahn pwehn kak komourala?

• Soangen wekidekla dah kan me kin ekis ekis wiawi pwehn kakehle sapwellimen Siohwa koasoandi kan me kin wia perepatail?

• Iaduwen atail kak pein kaunopkitaildahng komourala?

[Kawehwehpen kilel kan nan ehu ehu pali 18]

Irail kan ni mwehin Noha sohte nsenohki dahme Noha padahkihong irail

[Kawehwehpen kilel kan nan ehu ehu pali 19]

E uhdahn kesempwal kitail en kin nsenohki sapwellimen Koht kehkehlik kan

[Kawehwehpen kilel kan nan ehu ehu pali 20]

Ia kahrepen Kingdom Ministry School kin wiawi?

[Kawehwehpen kilel kan nan ehu ehu pali 21]

Met iei ahnsou en karanih mwomwohdiso en Kristian