“Ke Pwung, Mour Wia Mehkot Lingan!”

KE men sukuhliki uhdahn wehwehn mour? Magdalena, emen Sounkadehdehn Siohwa me sounpahr eisek waluh oh me kin kousoan nan kahnimw Szczecin, nan wehin Poland sewesedahr ienge tohnsukuhl en high sukuhl, Katarzyna, en sukuhliki wehwehn mour. Katarzyna sohte kin kamehlele me mie Koht, ahpw ahnsou me Magdalena koasoiaiong ih duwen Paipel, e kasalehda me e men esehla Paipel.

Edetehn Katarzyna perenkihda dahme Magdalena padahkiong ih sang nan Paipel, e sohte kak uhdahn kamehlele audepe. Ni ah wie koasoakoasoiong Magdalena duwen kompoakepah mehlel kan, Katarzyna koasoia: “Mie noumw Paipel; oh ke koasoanehdi me ke pahn idawehn kaweid me mihmi loale oh kaweid wet pahn sewese iuk en diar kompoakepahmw kan. Ahpw, iaduwen irail akan me, ahnsou wet, sohte kak kamehlele kaweid sang Paipel?”

Wekidekla laud eri wiawi ahnsou me Katarzyna seiloakla London nan England. E mwemweitlahng Branch Ohpis en Sounkadehdehn Siohwa kan wasao, oh e inenen pwuriamweikihla uwen kadek me irail kasalehong ih. Soangen kisin mwekid tikitik duwehte: ritingadahng wenihmw ong ih oh irail kasalehda arail nsenohki rong mwahu dahme e kin koasoakoasoia wiahiong mohngiongi en mwekidkihda.

Ni ahnsou me sukuhl pwurehng tepida nan September 2001, Katarzyna medewehdahr en peki rehn Magdalena en onop Paipel reh. E tepidahr kekeirada nan ah perenki kaweid en Paipel kan oh tepida kapwaiada kaweid akan nan ah mour en ehuehu rahn. Ahnsou kerendo, e ndaiong Magdalena: “Likamwete I ahpwtehn tepida ehu mour kapw.” E doadoahngki nah cellular telephone oh ndaiong Magdalena: “Kalahnganki ata onop rahnwet! Ke pwung, mour wia mehkot lingan! E inenen mwahu en ese ihs me kitail en kapingkihong met.”