“Karanih Koht, Oh E Pahn Ketin Karanih Iuk”
Mwowe Oh Mwuri Ah Mour Wiliakapwada
IA uwen kansensuwed oh mwahl mour kin wia ong Matsepang! Ih serepein pwulopwul men me kin mih Lesotho, wehi ieu me mih nan South Africa. Matsepang tikida wia Kadolik men. Ahpw, sohte sawas kohwong ih en ese karanih Koht, ahpw erein pahr ngeder “lih kadek kan” kin pwain ih pwehn wia tiahk suwed (nenek).
Kahrehda, Matsepang sohla kamehlele pelien lamalam oh kahrehiong en sohte kak ahneki pwoson me mie Sounkapikada limpoak emen me kin inenen nsenohki apwalih sapwellime aramas akan me e ketin kapikada. Pwehki irair suwed me e lelohng nan ah mour, Matsepang ahneki kahpwal en palien madamadau oh pepehm oh kin pehm me ih mehkot mwahl. E keirada oh wia aramas lemei oh lipepei. Met kahrehong ah kin wia aramas mour keper.
Matsepang eri iangala pwihn suwed ehu (gang) oh kin kauhdi kisa oh pirapahsang ahn aramas akan arail kepwe kesempwal kan. E poaridihier oh kalokepe kohieng en selidi nan imweteng nan South Africa. Mwuri, e sellahng nan pein wasa me e kohsang ie, Lesotho; ahpw wasao e wiewiahte ah mour suwed, sakau, pei oh mour en tiahk suwed.
E lel ahnsou ieu nan ah mour me e keieu nsensuwed, Matsepang inengkihda laud en kapakap ohng Koht en ketin sewese ih. E inoukihda me: “Koht, ma I momourete, I pahn wia dahme I pahn kak en wia pwe ien papah komwi.”
Ahnsou mwadang, misineri kei en Sounkadehdehn Siohwa kan eri tuhwong Matsepang. Irail idek reh ma e men onop Paipel. Sang ni eh onop Paipel, e diarada me Koht sohte kin kailongki aramas de pil soh nsenoh. E diarada me Sehdan, “semen likamw,” kin doadoahngki likamw oh mwersuwed pwe aramas en pehm me irail sohte katepe oh wiahiong irail en kamehlele me Siohwa sohte kak poakohng irail.—Sohn 8:44; Episos 6:11.
Matsepang diarada nsenamwahu ni ah wehwehkihda me kitail kak ahneki wahu ong pein kitail ma kitail pahn koluhla mehlel sang dipatail oh rapahki mahk en Koht, oh nantihong kaperenda Ih! Sawas kohwong ih en wehwehkihda me “Koht lapalapasang mohngiongatail akan” oh sapwellime kupwur ong kitail kin weksang duwen atail kin kilang pein kitail.—1 Sohn 3:19, 20.
Matsepang inenen peren ni ah wadekada mahsen pwukat en sounmelkahka Depit: “Siohwa kin ketin karanih irail me kin loalohla; oh irail me pahtoulahr akan, e kin doareirailla.” (Melkahka 34:18, NW) Nin duwen ih emen me “pahtoulahr,” e diarada me Siohwa sohte kin likidmeliehla sapwellime ladu kan, mendahte ma ekei irail kin pahtoula oh pepehm me irail sohte katepe. E kansenamwahwihala kapehde ni ah esehda me Koht kin ketin kupwure sapwellime sihpw akan koaros oh kin kakehlaka irail nan ahnsou apwal akan. (Melkahka 55:22; 1 Piter 5:6, 7) Ahpw, me keieu kamwekid kapehde iei mahsen pwukat: “Karanih Koht, oh E pahn ketin karanih iuk.”—Seims 4:8.
Kehl en Mahsen en Koht, Paipel, mwadangete wekid mour en Matsepang. E tepiada kaukaule towehda mihding en Kristian akan oh e kesehla ah tiahk kan me kin uhwong Pwuhk Sarawi. Ia imwilahn a wia met? E solahr pehm me e sohte warohng ale sapwellimen Koht limpoak oh kupwur mwahu. Sangete ahnsou me e papidaisla oh wiahla emen Sounkadehdehn Siohwa kan, e kalohk awa kid kei oh kin kalohki duwen Wehin Koht. Edetehn mie mohn ohlahn ah madamadau pwehki wiewiahn mahs akan, Matsepang ahnsou wet ahneki mour peren oh katapan. Ia uwen met ah wia kadehde mwahu me manaman en Paipel kak kamwahuwihala mour en aramas akan!—Ipru 4:12.
[Blurb nan Pali 31]
“Koht, ma I momourete, I pahn wia dahme I pahn kak wia pwe ien papah komwi”
[Kaokon nan Pali 31]
Kaweid en Paipel Kin Doadoahk
Kaweid en Paipel me kin kamweitala loalen aramas me alehdi epwel suwed kin iangahki mehpwukat:
“Ni ahnsou me I kin pwunodada oh pahtoula, komw kin ketin kansenamwahuwihiehla oh kapereniehda.” (Melkahka 94:19) Sapwellimen Siohwa “kamweit akan” kin dierek nan sapwellime Mahsen oh kin wia mehn kameleilei laud. Ni atail pahn kin kousapahlih nan atail madamadau oh kapakapki mahsen ko, e pahn sewese kitail en powehdi atail madamadau suwed akan oh kakairada atail likih Koht me iei Ih kompoakpatail me kin wehwehkin kitail.
“E [Siohwa] kin kamwahuwihalahr me nan kapehd ohlahr akan oh ketin kidimpenehr ar ohla kan.” (Melkahka 147:3) Ma kitail kin kalahnganki sapwellimen Siohwa mahk oh pil sapwellime kisakis en pwainda dipatail ki meirong en Sises, eri kitail kak pwarodohng Koht ni soh peikasal oh sohte ahneki pepehm en souwar. Met pahn wahdo nsenamwahu oh meleilei en madamadau me sohte mehkot kak pahrekiong.
“Sohte emen me pahn kak kohdo rehi, ma Semei me ketin kadariehdo sohte kainangihedo rehi; oh I pahn kamourada ni imwilahn rahn.” (Sohn 6:44) Sang ni sapwellime ngehn sarawi oh sang ni doadoahk en kalohki Wehio, Siohwa kin pein kakaranih kitaildohng rehn sapwellime ohlo oh ketikihong kitail koapworopwor en mour soutuk.