Semwehmwe Kak Sohla?

“ME milahr nan apwal akan kin wie sengiseng, oh sohte me kin sewese irail. Sohte me kin sewese irail pwehki me kahpwalihirailla kan me ahneki manaman pohrail,” iei me Nanmwarki Solomon en Israel en kawao mahsanih. (Eklesiasdes 4:1) Ni mehlel, aramas tohto me kin pahtoulahr akan me Solomon kin medemedewe duwen irail pil kin mih nan irair en semwehmwe.

Semwehmwe sohte kin pidete uwen mwohni me aramas kin naineki. Sang ni roporop akan me kohsang World Bank nan June 2002, “mwelekpe mie me nan 1998, aramas lik (billion) pak 1.2 nan sampah pwon, emen emen kin mouriki tikitik sang $1 nan ehu rahn . . . oh aramas lik (billion) pak 2.8 kin mouriki tikitik sang $2 nan ehu rahn.” E sansal me edetehn nempehn aramas nan pwihn riau wet kin tikitik sang mahso, kitail kak nda me “e wie tohtohte ni atail pahn medewehla uwen aramas me mihmihte nan irair en paisuwed leledo met.”

Iaduwen​—⁠semwehmwe pahn sohte imwi? Sises Krais mahsanih ong sapwellime tohnpadahk ko: “Me semwehmwe kan pahn mihmihte rehmwail ahnsou koaros.” (Sohn 12:8) Ahpw, met kin wehwehki me semwehmwe oh kasuwed akan me e kin wiahda pahn mihmihte kohkohlahte? Soh, pwe mendahte Sises ah sohte ketin inoukihong sapwellime tohnpadahk kan me irail koaros pahn kepwehpwehki paien sampah, kitail sohte pahn nda me sohte koapworopwor en irail me semwehmwe kan.

Sohte katepen ia uwen nanti me aramas akan pahn wia oh pwehki inou tohto wiawihier me pahn solahr semwehmwe ahpw wia inou soupwei kei, Sapwellimen Koht Mahsen, iei Paipel, kamehlelehiong kitail me ahnsou keren solahr aramas akan me pahn mih pahn apwal en dipwisou. Ni mehlel, Sises pakairki “Rongamwahu ong me semwehmwe kan.” (Luk 4:18) Rongamwahu wet pid inou me semwehmwe pahn kohsang douluhl. Met pahn wiawi ni ahnsou me Wehin Koht pahn ketikihdo irair en pwung pohn sampah.

Sampah wet pahn wekila! Nanmwarki en lahng, Sises Krais, “pahn poakehla me tikitik oh semwehmwe kan, oh mour en irail me semwehmwe kan e pahn doarehla.” Ni mehlel, “E pahn ketin kapitasang arail mour sang pahn kanaudok oh irair en lemei.”​—Melkahka 72:13, 14.

Wehin Koht pahn kamwahuwih kahpwal akan koaros me kahpwala mour en aramas, oh pil iangahki kihsang soumwahu oh pil mehla. Ke kak likih inou pwukat pwehki irail pwilidohsang rehn Koht. Ke soh kasawih mehn kadehde kan pwe ken kamehlelehda me kokohp en Paipel kan kin pweida ahnsou koaros?

[Kilel Credit Line nan Pali 32]

FAO photo/M. Marzot