Katamanpen Sounkadehdehn Siohwa Kan Me Kamakamala
NAN March 7, 2002, Kataman ieu wiawi nan kahnimw en Körmend nan pali kapi en wehin Hungary. E wia kawahupen mehlahn Sounkadehdehn Siohwa silimen me Nazi kan kemehla nan pahr 1945, oh irail kihsang likou me kidim lepin takai me nting mih powe.
Lepin takai wet kodahng ni dihd en ihmw me rahnwet wia poasen kaun en pali en kakun kisiniei nan Hunyadi Road, wasa me irail kamakamala ie. Kataman wet kohwong ‘Kristian akan me kamakamala pwehki arail pilada en sohte peikiong kosonned en Nazi me uhwong kosonned en Koht nan March 1945. Antal Hőnisch (1911-1945), Bertalan Szabó (1921-1945), János Zsondor (1923-1945), 2002, Sounkadehdehn Siohwa kan.’
Kamakamalahn irail pwukat wiawi sounpwong riaute mwohn Mahwen Keriau en Sampah. Dahme kahrehda Kristian pwukat kamakamala? Nuhspepa en wehin Hungary me ede Vas Népe kawehwehda: “Mwurin Hitler ah kehl laudla nan Germany, kaidehnte mehn Suhs akan ahpw pil irail Sounkadehdehn Siohwa kan me lelepek kin ale kalokolok, oh pil kin kohwong wasahn selidi oh kamala ma re sohte kin kamahmkihla arail pwoson. . . . Nan March 1945, kaunda kamasepwehk milahr nan pali kapi en wehin Hungary. . . . Ehu kisehn kaunda suwed wet iei en kalipada oh kemehla Sounkadehdehn Siohwa kan.”
Nan prokram en kasarawi en Katamano, mie pali riau. Keieuo wiawi ni wasahn kasansal nan Batthyány Castle, oh wasao irail aramas ekei kapahrek, iangahki Professor Szabolcs Szita, kaun en pwihn en Holocaust Documentation Center nan Budapest; László Donáth, me iang towe Parliament’s Committee for Human Rights, Minority and Religious Affairs; oh pil Kálmán Komjáthy, emen me iang kilang kamakamala oh kahnimwo wiahkihla ih arail soupoad. Aramas pohnangin 500 pil uhd aluhda ni pali keriau en kasarawio—wasa me re kilang Mayor József Honfi en Körmend kihsang likou me kidim lepin takai me wia mehn katamanpen Sounkadehdehn Siohwa silimen pwuko.
Nan nein Ján Žondor (János Zsondor) kisinlikou en kamwurumwur, e kangoange ienge Kristian brother oh sister akan en dehr pahtou. E ntingihdi: “I kin tamatamante mahsen akan en Sohn me dierek nan Kaudiahl 2:10: ‘Kumwail lelepek lel mehla.’ . . . Padahkiong irail akan nan ahi wasa, ren dehr nsensuwed, pwe I mehkihla pwoson oh kaidehn ni ei wia aramas suwed de soun kauwehla kosonned emen.”
[Kilel nan Pali 32]
Bertalan Szabó
[Kilel nan Pali 32]
Antal Hőnisch
[Kilel nan Pali 32]
Ján Žondor