Peidek kan Sang Sounwadawad kan

Dahme kahrehda Paipel mahsanih me aramas emen uhdahn pahn weriwer ma aramas angkehlailiong ih?

Aramas emen me saikinte lelohng irair kamasepwehk en lemei me soun angkehlail emen kin wia, sohte kak uhdahn wehwehki duwen ohla en mour me kin lelohng aramas me ale kahpwal en angkehlail. Irair wet nohn kamasepwehk me kahrehda lih emen me lelohng irairo kin pwunod erein ah mour.a Lih Kristian pwulopwul emen me aramas en angkehlail emen mwersuwedih ih sounpahr tohto samwalahr oko koasoia: “Sohte lokaia me kak kawehwehda uwen masepwehk me I ahnekihdi ni pwongo oh pil uwen ohlahn madamadau me I kin songosong en powehdi.” E wehwe mwahu dahme kahrehda ekei kin kahng koasoiahki ire wet. Ahpw, kamasepwehkpen angkehlail mehkot me mehlel nan sampah suwed wet.

Paipel sohte kin ekihla duwen koasoi kan me pid angkehlail oh songen angkehlail me kin wiwiawi mahso. (Senesis 19:4-​11; 34:1-7; 2 Samuel 13:1-​14) Ahpw, e pil kin ketikihda kaweid ong dahme aramas emen pahn wia ma e lelohng irair en angkehlail. Dahme Kosonnedo mahsanih duwen met kak dierek nan Deuderonomi 22:23-​27. Met kin pid irair riau. Nan irair keieuo, ohl emen diar serepein pwulopwul men nan kahnimw ehu oh ih eri wendi reh. Ahpw, serepeino sohte weriwer pwehn ale sawas. Kahrehda, kopwung koasoanehdi me serepeino dipada “pwehki e sohte weriwer nan kahnimwo.” Ma e weriwer, aramas akan me karanih wasao kak kohdo oh kapitala ih. Nan irair keriauo, ohl emen diar serepein pwulopwul emen likin kahnimw ehu, ih eri “parokedi serepeino oh wendi reh.” Ahpw, pwe en song en pitsang ohlo, serepeino “weriwer, ahpw sohte me kak rong ih pwehn kapitala ih.” Serepein menet weksang serepein en mwoweo, pwehki serepein menet kasalehda mwahu me e sohte mweidada paliwere ong me angkehlailo. E song a kak koaros pwe en pitsang ohlo, weriwer pwehn repen sawas, ahpw ohlo kehlail sang ih. Ah weriwer kasalehda me e sohte pwungki; e sohte dipkihda wiewia sapwungo.

Mendahte Kristian kan nan rahnwet solahr mihmi pahn Kosonned en Moses, mouren kaweid me pwarada nan Kosonnedo kin kihong irail mehn kaweid mwahu. Dahme kitail wadek nan Deuderonomi 22:23-27 kin kasalehda kesempwalpen pelian oh weriwer ong repen sawas. Ken weriwer ma emen songen angkehlailihiuk kin wia kaweid mwahu ehu. Emen ohl semen ohng palien irehdi kauwehla kosonned koasoia: “Ma aramas emen parokedi lih emen, a mehn pei keieu mwahu iei ngolungolih kan (me wehwehki weriwer ngihl laud).” Lih emen a kin weriwer kin kahrehda meteikan en tehkada, oh kak sewese ih, de e kak kahrehong aramaso en masepwehkada, kadarala liho oh kohkohsang ih. Serepein Kristian men me aramas en angkehlail me parokedi ih koasoia: “I weriwer uwen ahi kak koaros oh ih kadarie oh kohkohsang ie. Ni ah pwurehng pwurodohng ie, I wer ngehi tang. Mahs I kin kalap medewe, ‘Iaduwen weriwer a pahn sewese ie ni ahnsou me ohl emen me kehlail parokiehdi oh mehkotetehieu me mih nan ah madamadau?’ Ahpw, I diarada me met mehkot me mwahu en wia!”

Pil ni irair paisuwed me lih emen aramas idangidi oh angkehlailih, ni a pahn pwururseli oh weriwer en ale sawas kaidehn mehkot me sohte katepe. Ni mehlel, e kin kasansalehda me e wia soahng koaros me e kak wia pwe en pelianda aramas me angkehlailiong ih. (Deuderonomi 22:26) Mendahte ma angkehlailo pweida, ahn liho nsen mwakelekel mihmihte, ah wahu oh e ese me e mwakelekel mwohn silangin Koht. Ele irair kamasepwehko kak kauwehla ah irair en pepehm, ahpw ah ese me e wia uwen ah kak koaros pwe en pelian me angkehlailo, met pahn sewese ih en mwadang powehda ah medek en madamadau.

Lih Kristian akan me ahnsou wet kin nantihong powehdi medek en tamanda wiewiahn soun angkehlail emen kak koapworopworki me Siohwa ketin mwahngih unsek medek me re ahneki. Sawas kapatapat pwe en sewese ohlahn madamadau kak kohsang arail alehda utuht kadek oh wehwe me iengerail tohnmwomwohdiso en Kristian kin kasalehong irail. (Sohp 29:12; 1 Deselonika 5:14) Oh pil, pein arail nannanti en kihong arail madamadau ong mehkan me mwahu pahn sewese irail en ahnekihda “popohl en Koht me mwahusang soangen madamadau koaros.”​—Pilipai 4:6-9.

[Nting tikitik me mi pah]