Ripoht En Sounkalohk Kan En Wehio

Irail me Salengepon kan nan Brazil “Rongorong” Rongamwahu en Wehio

PWEHN kalohki Rongamwahu en Wehio ong aramas salengepon kan, Sounkadehdehn Siohwa tohto nan Brazil sukuhlikier lokaiahki pehrail akan [Brazilian Sign Language]. Koasoandi wet inenen pweida mwahu nin duwen ekspiriens pwukat kin kasalehda.

Eva,a lih salengepon men nan São Paulo, tepiadahr sukuhliki lokaiahki peh kan mwurin ih oh nah seri silimen arail kousoanla rehn emen ohl me pil salengepon. Nan wasahn netinet laud ehu, Eva oh ah boyfriend tuhwongada pwihn en aramas salengepon kei en Sounkadehde oh irail luhke ira en iang towehda mihding nan Kingdom Hall. Ira alehda luhko, ahpw ira medemedewe me tuhpene wet pahn wia ihte ahnsoun tuhwong oh koasoiapene rehn aramas teikan.

Pwehki Eva a sohte nohn ese lokaiahki peh kan, e sohte nohn wehwehki soahng koaros me koasoipe wiawi nan mihdingo. Mwurin mwo, ekei Sounkadehde kan luhke ih ong imwarail kan en iang irail mwenge marahra. Irail eri doadoahngki kilel akan nan pwuhk me oaralap koasoia Paieki Mour Sampah Kohkohlahte!, oh irail kawehwe ong ih duwen inoupen sampah ah pahn wiahla paradais ni ahnsou keren. Eva perenkihda dahme e sukuhliki oh e tepida iang towehda mihding kan kaukaule.

Mwurinte mwo, Eva kohkohsang ah boyfriendo pwe en kak mourki sapwellimen Koht koasoandi kan me Paipel kin kasalehda. Mendahki uhwong laud me ah peneinei wiahiong ih, e nantihong oh kekeirada ni pali ngehn oh ih papidaisla nan pahr 1995. Sounpwong weneu mwuri, Eva iangala wia emen Regular Pioneer, de sounkalohk kaukaule. Sangehr ahnsowo kohdo, e sewesehdahr aramas salengepon pahmen oh irail inoukihong Siohwa arail mour oh pil papidaisla.

Carlos ipwidihte salengepon. Sang ni a wia seri tikitik, e tepidahr doadoahngki wini en kasahliel, mour samin (nenek) oh pil pirap. Ienge me tiahk suwed akan eri rapahki pwe en kemehla ih, ih eri tangala São Paulo oh ih koukousoan rehn João ahnsou kis. João pil duwehte Carlos pwe e pil salengepon oh pil mour suwed.

Pahr ekei mwuri, Carlos sukuhliki padahk mehlel duwen Wehin Koht, ih eri tepida kamwakelehda ah mour oh ih eri kapwopwoudiongala ah pwoud. Mwurin ah mour pahrekiongehr kaweid en Pwuhk Sarawi, Carlos inoukihong Siohwa ah mour oh papidaisla. Ahpw, pil ni ahnsowohte, Carlos sasairiki me João pil kin sukusukuhliki Rongamwahu en Wehin Koht, oh pil pein ih wiahdahr wekidekla laud nan ah elen mour. Ni João ah esehda me Siohwa sohte kupwurki dikedik en eni kan oh sansal kan, e kesehla nah sansal kan en “aramas sarawi kan.” Mwurin a weksang ah elen mour en mahso, João pil papidaisla.

Ia uwen peren me Carlos oh João ahneki ahnsou me ira tuhpene nan Kingdom Hall oh diarada me ira koaros wiahda wekidekla laud kan nan ara mour! Ira koaros wiahda pahpa en peneinei oh kehlail nan doadoahk en kalohk.

Nan Brazil ahnsou wet, mie mwomwohdiso 30 me kin lokaiahki pehrail kan nan arail mihding kan oh pil mie pwihn 154 me tohn kalohk koaros irail tohto sang aramas 2,500 oh irail meh mpen 1,500 me salengepon. Nan kapokon en 2001 nan Brazil me oaralap koasoia “Sounpadahk kan en Mahsen en Koht” ong irail me salengepon kan, aramas tohto sang 3,000 me iang towehda, oh aramas 36 me papidaisla. Sang ni sapwellimen Siohwa kapai, mie koapworopworpe me irail me tohto pahn pil alehda padahk en Wehio.

[Nting tikitik me mi pah]