Pwulopwul Kan—Siohwa Sohte Pahn Likidmeliela Amwail Doadoahk!
“Koht me uhdahn pwung; e sohte pahn ketin meliehla amwail wiewia kan de amwail limpoak ong Ih ni sawas me kumwail kasaledahr oh pil kin kasalehiong riamwail Kristian kan.”—IPRU 6:10.
1. Iaduwen Paipel pwuhken en Ipru oh Malakai kin kasansalehda me Siohwa kin ketin kesempwaliki omw doadoahk en kalohk?
MIE pak me ke kasalehda omw kadek ong kompoakpahmw ahpw e sohte kasalehda ah kalahngan? E inenen kamedek ma aramas pahn mwamwahleki wiewia kadek me ke kasalehong ih, de suwed sang met, ma e manokehla douluhl kadek me ke kasalehong ih. Ahpw, atail kin papah Siohwa, ki mongiongitail unsek, kin weksang met! Paipel mahsanih: “Koht [sohte pahn wiahda sapwung ehu]; E sohte pahn ketin meliehla amwail wiewia kan de amwail limpoak ong Ih ni sawas me kumwail kasaledahr oh pil kin kasalehong riamwail Kristian kan.” (Ipru 6:10) Medemedewe ia wehwehn iren Paipel wet. Siohwa pahn kilangwong met—manokehla wiewia mwahu kan me ke wia ong Ih de wiewia mwahu me ke kin wia nan sapwellime doadoahk—Siohwa pahn kilangwohng met nin duwen sapwung ehu de dihp ehu. Koht menet kin uhdahn kasalehda kalahngan!—Malakai 3:10.
2. Dahme kahrehda papah Siohwa iei pwais tohrohr ieu?
2 Ke ahneki pwais tohrohr ehu en kaudok ong Koht oh papah Ih nin duwen Koht kalahngan menet. Pwehki iengomw tohnkaudok akan kumwail mehte wenerar (six million) nanpwungen tohnsampah wenelik (six billion), amwail pwukoa tohrohr wia mehkot apwal en diar. Oh pil, pwehki ke kin rongorong oh mwekidkihda Rongamwahu, met kin kasansalehda me Siohwa kin ketin kupwurkin uhk. Pwe, Sises mahsanih: “Sohte emen me pahn kak kohdo rehi, ma Semei me ketin kadariehdo sohte kainangihedo rehi.” (Sohn 6:44) Ei, Siohwa kin ketin sewese emen emen aramas en kalahnganki kapai kan en meirong en Krais.
Kalahnganki Ahmw Pwais Tohrohr
3. Iaduwen nein Kora pwutak kan kin kasalehda duwen arail kalahngan ong pwais en papah Siohwa?
3 Nin duwen kitail sukuhliki nan artikel en mwowe, ke kin ahneki pwais tohrohr en kaperenda mohngiong en Siohwa. (Lepin Padahk 27:11) Menlau dehr mwamwahleki ahmw pwais. Nein Kora pwutak kan nan ehu koul me irail ntingihdi me Koht ketin kamwekid irail en wiahda, audepen koul wet kin kasalehda duwen arail kalahngan ong arail pwais en papah Siohwa. Kitail wadek: “Pwe rahn teieu nan Tehnpasomwi Sarawio mwahusang rahn kid wasa teikan; ei kin mihmi ni wenihmwen tehnpas en ei Koht mwahusang kousoan nan imwen aramas suwed akan.”—Melkahka 84:10.
4. (a) Dahme pahn kak kahrehong ekei aramas en kilangwong arail kaudok ong Siohwa nin duwen mehkot me kin mwomwen ireiukedihsang omw saledek? (b) Ni ahl dahieu me Siohwa kin ketin kasalehda me E kin ngoangki kilang oh katingih sapwellime ladu kan?
4 Ih duwen ahmw pepehm ong ahmw pwais en papah Samatail me kin ketiket nanleng? E mehlel me ekei ahnsou omw kaudok ong Siohwa kin mwomwen ireiukedihsang omw saledek. Mehlel, momourki kaweid en Paipel kan kin wehwehki me emen pahn anahne tohnmetei. Ahpw, dahme Siohwa kin kupwurki ken wia, ma ke pahn wia mehpwukat: pein kowe pahn paiekihda. (Melkahka 1:1-3) Likin met, Siohwa kin kilang ahmw nannanti oh E kin ketin kasalehda sapwellime kalahngan ong uhk ma ke pahn lelepek ong Ih. Ni mehlel, Pohl, ntingihdi me Siohwa “kin ketin katingih irail kan me kin raparapahki.” (Ipru 11:6) Siohwa kin ketin raparapahki ahnsou kan pwen katingih aramas pwukat. Soukohp pwung emen nan wehin Israel en mahs mahsanih: “Kauno kin ketin mwasamwasahn sampah pwon, pwehn ketin kakehlahda irail kan me arail mohngiong kin loalopwoatohng Ih.”—2 Kronikel 16:9.
5. (a) Ia ahl me keieu mwahu en kasalehda me ke kin mour unsekiong Siohwa? (b) Dahme kahrehda en koasoiong mehteikan duwen omw pwoson kin mwomwen apwal?
5 Ahl me keieu kaselel en kasalehda me mohngiongomw me unsekiong Siohwa iei en koasoiong aramas teikan duwen Ih. Mie ahnsou me ke koasoiong ekei iengomw tohnsukuhl akan duwen omw pwoson? Nin tepio, mwein ke pahn masak en wia met. Ele ke kak wia peidek wet, ‘Iaduwen ma irail pahn kouruhrkin ie?’ oh ‘Iaduwen ma irail nda me ahi pelien lamalam mwomwen iahk?’ Sises mahsanih me kaidehn aramas koaros pahn perenki rong Rongamwahu en Wehio. (Sohn 15:20) Ahpw, met sohte kin wehwehki me ahnsou koaros ke pahn tuhwong aramas akan me pahn kapailoke oh pelian uhk. Weksang met, Sounkadehde pwulopwul tohto kin tuhwong aramas akan me kin perenki rong oh pil iengarail tohnsukuhl akan kin waunekin irail, pwehki re kin kapwaiada dahme irail kin kamehlele.
“Siohwa Pahn Ketin Sewese Iuk”
6, 7. (a) Iaduwen emen serepein me sounpahr 17 kalohk ong ienge tohnsukuhl akan? (b) Dahme ke sukuhliki sang Jennifer?
6 Ahpw, iaduwen ke pahn kak ni eimah koasoi duwen ahmw pwoson? Ni ahnsou me aramas akan kin wia peidek duwen omw pelien lamalam, dahme ke soh song en sapeng irail ni mehlel? Medemedewe duwen dahme Jennifer me sounpar 17 wia. E koasoia, “I wie mwengmwenge nan sukuhl rahno (mwengehn souwas). Ekei serepein me mwomwohd limwahi kin wia koasoakoasoipene duwen pelien lamalam, oh emen serepein idek rehi duwen mehnia pelien lamalam me I kin iang.” Iaduwen—Jennifer salohda ni e medemedewe iaduwen e pahn sapeng serepein menet? E nda, “Ehi, I salohda pwe I sehse dahme serepein ko pahn wia ni ahi pahn sapeng ah serepeino peidek.” Eri, dahme Jennifer wia? E pousehla nda, “I padahkiong serepein ko me ngehi emen Sounkadehdehn Siohwa kan. Nin tepio, irail pwuriamwei. Mwein pwe irail kin ahneki madamadau me Sounkadehdehn Siohwa kan kin ehu soahng.” Met kamwekid irail en wia peidek kan ong ie, oh e wia ahnsou mwahu en kawehwehda duwen ekei madamadau sapwung kan me irail ahneki duwen Sounkadehdehn Siohwa kan. Mwurin rahno, ekei sang irail serepein pwukat kin ekei ahnsou wia peidek kan ong ie.”
7 Eri, Jennifer koluhkihla ah koasoiong mehteikan duwen dahme e kin kamehlele? Soh! E nda, “Mwurin mwengehn souwas rahno, I inenen peren. Ni ahnsou wet, serepein pwukat kin wehwehki ihs Sounkadehdehn Siohwa kan.” Kaweid me Jennifer kihda kin mengei en kapwaiada: “Ma ke kin apwaliki kalohk ong iengomw tohnsukuhl akan de sounpadahk kan, eri, ke kak wia kapakap mwotomwot ehu. Siohwa pahn sewese iuk. Ke pahn perenki me ke isaneki ahnsou mwahu en kalohk ong aramas teikan.”—1 Piter 3:15.
8. (a) Iaduwen kapakap kin sewese Nehmaia ni ahnsou me e lelong irair ehu me e sohte kasik? (b) Ahnsou dah kan me pahn kin wiawi nan sukuhl me ke anahne en wia pein omw kapakap mwotomwot ehu ong Siohwa?
8 Tehk wasaht, me Jennifer kangoange meteikan en ‘wia kapakap mwotomwot’ ong Siohwa ni ahnsou me ke men kalohk ong aramas teikan duwen ahmw pwoson. Iei soangohte me lelohng Nehmaia sounlongadahl ong Nanmwarki Ardaserksihs en wehin Persia, ni ahnsou me e lelohng irair ehu me e sohte kasik. E sansal me Nehmaia kin nsensuwed pwehki e ahpwtehn rong me mehn Suhs akan kin lelohng kahpwal ieu, pwe kehl oh ewen kehl kan en Serusalem ohlahr. Nanmwarkio kilang me Nehmaia kin pahtouki mehkot, eri, e ketin keinemwe Nehmaia kahrepen e kin nsensuwed. Mwohn e sapengla Nanmwarkio, Nehmaia kapakapki kaweid. Mwurin eh kapakap, ni eimah e peki rehn Nanmwarkio en mweidala irail en pwurala Serusalem oh sewese onehda sapahl kahnimwo. (Nehmaia 2:1-8) Ia mouren kaweid wet? Ni ahnsou pahn pwarada ken kak kadehde ong aramas teikan duwen omw pwoson, ahpw ke kin salohda, menlau dehr mwamwahleki ahneki ahnsou mwahu en wia kapakap en nan kapehd. Piter ntingihdi, “Mweidohng ih amwail pwunod koaros, pwehki eh kin ketin apwahpwalih kumwail.”—1 Piter 5:7; Melkahka 55:22.
“Onopada Ahnsou Koaros Pwe Kumwail en Kak Sapeng Aramas Teikan”
9. Dahme sewese Leah sounpar 13 en kihla pwuhken Young People Ask meh 23?
9 Tehk duwen pil ehu ekspiriens. Leah, me sounpar 13, me wadewadek nah pwuhk me oaralap koasoia Questions Young People Ask—Answers That Worka ni ahnsoun kommoal en souwas nan sukuhl. E koasoia, “Meteikan kin kilikilang ie, oh mwuhr, pokon ehu me kesinenda limwahi oh kilikilang dahme I wiewia. Irail tepida idek duwen audepen pwuhko.” Ni imwin rahno, serepein pahmen peki rehn Leah ma e kak kihong irail neirail pwuhken Young People Ask. Mwurin met, serepein pwukat kin kasalehiong meteikan pwuhk wet, oh meteikan pil men ale neirail pwuhk kan. Mwurin wihk kei, Leah kihong ienge tohnsukuhl akan oh kompoakparail kan pwuhken Young People Ask meh 23. E mengei ong Leah en koasoiong aramas teikan ni ahnsou irail kin idek duwen pwuhk me e wadewadek? Soh, e sohte mengei! E wehkada, “I inenen saloh nin tepio. Ahpw, I wia ai kapakap, oh I ese me Siohwa kin ketin sewese ie.”
10, 11. Iaduwen serepein pwulopwul emen en mehn Israel sewese kaun lapalap en karis kan en nanmwarkien Siria sukuhliki duwen Siohwa, oh wekidekla dah kei me e wiahda?
10 Ekspiriens en Leah mwein kin katamankin uhk duwen dahme serepein pwulopwul (mehn Israel) pil lelohng ni ahnsou me e selidi nan Siria. Nahman, kaun lapalap en karis kan en Siria, iang soumwahu en tokutok. Mwein ah pwoud tepiada wia koasoi me kin kamwekid serepein pwulopwulo en koasoia duwen ah pwoson. E koasoia, “Ma ei soumas pah tuhwong soukohp me kin koukousoan nan Sameria, eh tokutoko pahn mwahula.”—2 Nanmwarki 5:1-3.
11 Pwehki serepein pwulopwul menet kin kasalehda eimah, Nahman tepida esehla “me sohte emen koht likin Koht en Israel.” E pil inoukihda me e “solahr pahn wiahiong emen koht tohrohr meirong de meirong isihs, pwe ongete [Siohwa].” (2 Nanmwarki 5:15, 17) Siohwa kapaiada serepein pwulopwul menet me kasalehda eimah. E pil kak oh pahn wia met ong me pwulopwul kan en rahnwet. Leah pil kin ale kapai kan. Kedekedeo, ekei ienge tohnsukuhl akan tuhwong ih oh nda me pwuhk en Young People Ask kin sewese irail en tiahk mwahu. Leah nda, “I inenen peren pwe I ese me I kin sewese mehteikan sukuhliki duwen Siohwa oh wiliakapwala.”
12. Dahme pahn kak kakehlailih iuk en sapeng aramas ni ahnsou me peki rehmw ken kawehwe duwen koapworopwor me ke ahneki?
12 Ke kak lelohng irair akan me Jennifer oh Leah pil kin lelohng. Idawehn kaweid en Piter, me ntingihdi me nin duwen emen Kristian ke anahne “onopada ahnsou koaros pwe kumwail en kak sapeng mehmen me peki rehmwail kumwail en kawehwehiong koapworopwor me mih rehmwail.” (1 Piter 3:15) Iaduwen ke kak wia met? Kahlemengih irail Kristian akan nan keieun senturi me kin kapakap ong Siohwa, peki rehn Siohwa en sewese irail en wia doadoahk en kalohk “ni eimah.” (Wiewia 4:29) Mwurin met, ni eimah koasoiong aramas teikan duwen ahmw pwoson. Mwein ke pahn pwuriamweikihla ni ahnsou me aramas teikan pahn mwekidki omw koasoi kan. Oh pil, ke pahn kaperenda mohngiong en Siohwa.
Video kan oh Koasoandi en Sukuhl Tohrohr kan
13. Dahme ekei pwulopwul kan wia pwen isaneki ahnsou mwahu en kalohk ong mehteikan? (Kilang koakon nan pali 14.)
13 Pwulopwul tohto kin doadoahngki video kan pwen kawehwe ong iengarail tohnsukuhl akan de arail sounpadahk kan duwen arail pwoson. Ekei ahnsou, koasoandi en sukuhl tohrohr kan kin ritingada elen kapinga Siohwa. Karasepe ieu, pwutak riemen en Sounkadehdehn Siohwa kan, me mahki sounpar 15, kin iang klas me irail kin sukuhlki duwen poadoapoad en sampah (World History class), oh sounpadahk kihong irail arail doadoahk en ntingihdi ripoht me pid duwen ehu pelien lamalam nan sampah ahnsou wet. Pwutak pwukat doadoahkpene oh wiahda neira ripoht me pid duwen Sounkadehdehn Siohwa kan, oh ira doadoahngki pwuhk me oaralap duwen Jehovah’s Witnesses—Proclaimers of God’s Kingdom.b Ira pil wiahda padahk ehu ni minit limau. Mwurin ara padahk, pwutak riemenet kesihnenda mwohn tohnsukuhl ni minit 20, pwehki sounpadahko oh tohnsukuhl akan wia peidek tohto. Ni erein wihk kei mwurin ira wia ara padahk, iengara tohnsukuhl akan sohte uhdi wia arail peidek kan me kin pid Sounkadehdehn Siohwa kan!
14, 15. (a) Dahme kahrehda keper en masak aramas? (b) Dahme kahrehda ke anahne en eimah ehukihong mehteikan duwen ahmw pwoson?
14 Ekspiriens pwukat kin kasansalehda me ke kak ale kapai laud kan ma ke pahn padahkiong aramas teikan duwen dahme ke kin kamehlele nin duwen emen Sounkadehdehn Siohwa kan. Dehr mweidong masak aramas en kerempwa uhk sang pwais oh peren en sewese aramas teikan en esehla Siohwa. Paipel mahsanih: “Me keper pwunodki dahme aramas teikan lemeleme duwen kowe, ahpw ma ke pahn likih Kauno [“Siohwa,” NW], ke pahn saledek sang apwal.”—Lepin Padahk 29:25.
15 Nin duwen ahmw wia Kristian pwulopwul emen, tamanda me ke ahneki mehkot me iengomw kan uhdahn pil anahne—iei elen mour me keieu mwahu ni ahnsouwet oh pil inou en mour soutuk ong ni ahnsou kohkohdo. (1 Timoty 4:8) Kapwuriamwei en ese me nan United States—wasa me ke leme me pali laud en aramas sohte kin perenki rong duwen Koht de irail kin mouren sampah—ehu roporop duwen me pwulopwul kan kin kasansalehda me tohto sang elep en aramas akan me re kin koasoiong kin inenen wauneki pelien lamalam, oh me pwulopwul silikis ehu nda me pwoson me pid pelien lamalam kin “wia mehkot me kin keieu kamwekid” arail mour. Mwein met kin duwehte wasa teikan nin sampah wet. Mwein iengomw tohnsukuhl akan pahn perenki rong dahme ke men koasoiada duwen Paipel.
Nin Duwen Emen Pwulopwul, Karanih Siohwa
16. Likin atail kin koasoiong aramas teikan duwen Siohwa, dahme kitail pil anahne wia pwen kaperenda Ih?
16 Ni mehlel, en kaperenda sapwellimen Siohwa mohngiong kin pidada laudsang koasoiong aramas teikan duwen ih. Ke pil anahne kapwaiada sapwellime koasondi kan. Wahnpoaron Sohn ntingihdi: “Pwe iet duwen wehwehn poakohng Koht: kitail en peikiong sapwellime kosonned akan. Oh sapwellime kosonned akan me sohte apwal.” (1 Sohn 5:3) Ke pahn diarada me mahsen pwukat kin mehlel, ma ke pahn karanih Siohwa. Iaduwen ke kak wia met?
17. Iaduwen ke kak karanih Siohwa?
17 Isaneki ahnsou mwahu en wadek Paipel oh sawaspen Paipel kan. Ni omw pahn kalaudehla omw sukuhliki duwen Siohwa, e pahn mengei ong uhk en peikiong Ih oh koasoiong aramas teikan duwen Ih. Sises mahsanih, “Aramas mwahu men kin kapwarehda mehkan me mwahu pwehki eh mohngiong direki me mwahu; duwehte aramas suwed men kin kapwarehda me suwed pwehki eh mohngiong direki me suwed. Pwe ewen aramas kin kapwadewei dahme audepen nan eh mohngiong.” (Luk 6:45) Eri, audehkihla omw mohngiong mehkan me mwahu. Dahme ke soh men wiahda omw mehn akadei kan? Mwein ke pahn kak kaunopada ong mihding en mwomwohdiso kan nan wihket. Mwurin met, ke kak akadei ong en wia pasapeng mwotomwot ahpw pasapeng me kin kohsang mohngiongomw. Ahpw ni mehlel, e kesempwal ke en pil kapwaiada dahme ke kin sukuhliki.—Pilipai 4:9.
18. Edetehn ke pahn tuhwong aramas me pahn uhwong iuk, dahme ke pahn kak likih?
18 Kapai kan me kin kohsang papah Siohwa kin mihmi kohkohlahte. Ni mehlel, ekei ahnsou mwein ke kin tuhwong aramas me kin uhwong de kapailoke iuk, pwehki ke kin iang Sounkadehdehn Siohwa kan. Ahpw medemedewe duwen Moses. Paipel mahsanih, “e kilikilengwohngete keting me pahn kohdo.” (Ipru 11:24-26) Ke pil kak likih me Siohwa pahn ketin kapaiukada pwe ke kin nantiong sukuhliki duwen Ih oh koasoiong aramas teikan duwen Ih. Ni mehlel, e sohte pahn “ketin meliehla amwail wiewia kan de amwail limpoak ong ih ni sawas me kumwail kasaledahr.”—Ipru 6:10.
[Nting tikitik me mi pahs]
a Wiawiahda sang rehn Sounkadehdehn Siohwa kan.
b Wiawihda sang rehn Sounkadehdehn Siohwa kan.
Ke Tamanda?
• Dahme kahrehda ke kak likih me Siohwa kin kesempwaliki omw doadoahk?
• Ni ahl dah kei en wia kalohk ong tohnsukuhl akan nan wasahn sukuhl me ekei pwulopwul kan kin wia?
• Dahme pahn kak sewese iuk en ni eimah kalohk ong iengomw tohnsukuhl akan?
• Iaduwen ke kak karanih Siohwa?
[Box/Picture nan Pali 14]
Ahnsou kan me Ekei Pwulopwul kan kin Doadoahngki en Koasoia Duwen Arail Pwoson
Ni ahnsou me irail kin alehdi doadoahk nan sukuhl en wiahda ripoht de project, ekei pwulopwul kan kin pilada oaralap ieu me kin sewese irail en kak koasoia duwen arail pwoson
Irail me pwulopwul tohto kin kihong arail sounpadahk kan video de pwuhk ehu me kin pid duwen dahme arail class kin koasoiapene nan sukuhl
Ekei pwulopwul kan kin wadek neirail Paipel de sawaspen Paipel kan ni ahnsou me kommoal kan kin wiawi oh pwulopwul teikan kin kohla reh oh wia peidek kan
[Kilel nan Pali 12]
Sounkalohk koahiek kan pahn kak sewese irail me pwulopwul kan en papah Siohwa