Pwuhken Wiewia kan me Inenen Kapwuriamwei

OHL ndand men, Richard E. Byrd, wia seiloak limau ong Antartica sang nan pahr 1928 lel pahr 1956. Ni ah kin ntingihdi dahme e kin wia nan ehu ehu rahn oh sang ni ah kin ntingihdi oaritik en seiloak kan, ih oh tohn ah pwihn en seiloak kan kakehr ese mwomwen elen kisinieng, oh wiahda map akan oh wiadahr mehn kaweid oh kepehse laud me pid sapwen Antartica.

Ahn Byrd seiloak kan kasalehda kesempwalpen ntingihdi oh kolokolpene pwuhken wiewia kan. Nan pwuhken wiewia ehu, nting kan kin pid oaritik me pid seiloak en sohp de pipihr en sompihr ieu. Soangen pwuhk wet kak wia mehn doadoahk mwuhr pwe aramas en pwurehng kousapahl dahme wiawi mahs de kak doadoahk pwehn kihda kaweid mwahu ong seiloak en mwuhr akan.

Pwuhk Sarawi kihda soangen mehn kaweid mwahu me pid Nohlik Lapalap me wiawi ni mwehin Noha. Nohlik Lapalap reireiki ahnsou ieu me laud sang sounpahr ehu. Pwehn kaunopada ong Nohliko, Noha, ah pwoud, neira pwutak silimen oh arail pwoud oko wiahda warihmw erein pahr 50 de 60​—warihmwo iei wahr laud ieu me loal wehte cubic feet 1,400,000. Ia kahrepe irail wiahda warihmwo? Pwehn kamourala aramas oh mahn akan sang Nohlik Lapalapo.​—Senesis 7:1-3.

Ni mehlel, pwuhken Senesis nan Paipel audaudki mehkan me kitail kak kahdaneki “Nein Noha Pwuhken Wiewia kan” me kasalehda dahme wiawi sangete ni tepin Nohlik lao ih oh ah peneinei pidoi sang nan warihmwo. Iaduwen​—⁠pwuhk wet audaudki mehkot me mie katepe ong kitail nan rahnwet?