Video Cassette ehu me Kin Sair Mohngiong en me Pwulopwul kan

ME pwulopwul tohto ale mehn kangoang laud pwe ren kak medemedewe laud duwen arail wiewia kan ni arail kilang video cassette me oaralap koasoia Young People Ask​—How Can I Make Real Friends?a Video cassette wet kin kihda kaweid sang Pwuhk Sarawi, pepehm akan sang rehn Kristian pwulopwul akan, oh pil “spai” ehu me pid duwen Daina​—⁠serepein men me mih nan Paipel oh duwen pahrekpen met ong nan atail ahnsou. (Senesis, irelaud 34) Iet ekei soahng kan me mehn Mexico koasoiahki video cassette wet:

Martha koasoia: “Video cassette wet sair mohngiongiet. Likamwete video cassette wet wiawihda ong duwen ngehi. I kin lemeleme me e itar me ahi sounpadahk kan oh iengei tohnsukuhl akan ese me ngehi emen Sounkadehdehn Siohwa. Ahpw I sohte kin kadehde ong irail met ni ahi kalohk ong irail. I inenen kapingahki mehlel soahng koaros me Siohwa ketikihda, ahpw mehlel ni ah kin kamwekidada atail pepehm oh madamadau kan nin duwen me video cassette wet wia.”

Juan Carlos koasoia: “Video cassette wet kin inenen wiahiong uhk ken medemedewe ahmw elen mour. Nin duwen ahi wia pwutak pwulopwul men, I kin wiahda soangen sapwung kei oh kin pahrekiong wiewiahn ekei nan “spai” wet. Pahr ekei samwalahr oko, I kin mourki mour riau, ahpw I diarada me soangen mour wet pahn wahdohng ie kasuwed tohto. Mwurin ahi kilang video cassette wet, I kakehlailihala ahi madamadau en lelepek ong Siohwa.”

Sulem wehkada me: “Ahnsou me I kilang video cassette wet, ahi lamalam inenen mwekidikihda. Mwohn met, I uhdi sang wadek nei Paipel oh I sohla kin kalap kapakap ong Siohwa. Ni ahi rongehr ahn emen emen me pwulopwul kan arail koasoi nan video cassette wet, kapehdi mwekidikihda oh ngehi tepiadahr pwurehng wadek nei Paipel oh pil kin kapakap ong Siohwa.”

Me pwulopwul akan nan rahnwet kin lelohng irair apwal akan nan arail mour, oh kompoakparail me re pilada en werekiong kak kamwekid arail elen mour. (Melkahka 26:4; Lepin Padahk 13:20) Video cassette wet: Young People Ask​—How Can I Make Real Friends? kin sewese me tohto en wiahda arail pilipil mwahu kan me pid irair en pilada kompoakpah mehlel kan.

[Nting tikitik me mi pahs]