Nsen Mwakelekel me Mehlel

NI AHNSOU me Charles, tohndoadoahk en sukuhl laud ehu nan Kenya, mwesmweselahng imweo ehu rahn, nah cell phone salongala. Nan Kenya, soangen dipwisou kan (cell phone) wie pweilaudte.

Charles koasoia: “I sohte kasik emen en kapwurehdo.” Ahpw, rahn kei mwuri, e pwuriamweikihla emen call ih sang Branch Ohpis en Sounkadehdehn Siohwa nan Kenya. E sohte kak kamehlele dahme e rongorong nan telephone ni arail nda en kohla oh ale nah cell phone! E dierekda me emen Sounkadehdehn Siohwa me kin kaukaule kalohk (pioneer) me iang Charles rahno nan sidohsa me e iang oh e diarada cell phone. Pwehn kak diarada ihs me naineki, sounkalohk menet wahla cell phone ni Branch Ohpis, oh irail me kin doadoahk mwo nantihong rapahkihda Charles sang ni nempe me irail kilangada ni cell phone.

Charles ntingihdi kisinlikou ong Branch Ohpis oh nda: “I inenen kalahnganki doadoahk laud me kumwail wia pwehn kak kapwurehdo nei cell phone mendahki e apwal. I men kalahnganki irail me kisehn ahmw pwihn me diarada cell phone, nantihong rapahki ie, oh kapwurehdo. E sohte mengei en diarada aramas me kin mehlel nan arail mour ahnsou koaros, ahpw e kin kangoange ie en ese me mihete aramas me mehlel oh I diarada me kumwail Sounkadehdehn Siohwa Koht me kin mehlel.”

Wasa koaros nan sampah, aramas kin ese me Sounkadehdehn Siohwa kan kin mehlel. Irail kin kahlemengih wahnpoaron Pohl me mahsanih: “Se likih me se ahneki nsen mwakelekel me mehlel, ni aht kin wia uwen aht kak en mehlel ni soahng koaros.” (Ipru 13:18; 1 Korint 11:1) Irail wehwehki me arail wiewia mehlel kan kin kalinganahda mwaren Siohwa Koht, nin duwen Sises mahsanih: “Ih pil duwen kumwail, amwail marain en sansal mwohn aramas akan pwe re en kilang amwail wiewia mwahu kan oh kapikapingahki Samamwail me ketiket nanleng.”​—Madiu 5:16.