Mie Mehkot me Kak Pere Sarawi kan en Dehr Ohla?
EMEN kaun en pelien lamalam nan Uganda me adaneki Stephen Tirwomwe koasoia: “Aramas akan nan Britain kin kamehlele Koht ahpw re sohte men wiahda arail inou rehn Krais.” Ohl menet (Stephen Tirwomwe) iang pitsang uhwong me kohsang rehn emen ohl adaneki Idi Amin. Rahnwet, Stephen Tirwomwe kin kapahrek nan wasahn werekpene en ohl akan nan Leeds, England, oh e kin mwadang wia ah kapahrek ni minit eisek mwohn irail kan me rongorong pahn tepida arail mwadong en bingo.
Ni pali teio nan wehin Amerika, sarawi en Anglican Mission me ahpwtehn lella mwo kin pil ahneki soangen kahpwalohte ni pali ngehn. Nan website en pelien lamalam wet kasalehda me “United States iei ehu wasa me keieu tohto en irail kan me sohte arail pelien lamalam oh pil arail mour sohte kin pidada mehkan me ngenin.” E pil pousehla oh koasoia: “Kitail me mihmi nan wehin Amerika wia wasa ieu me anahne doadoahk en misineri en wiawi.” Pwehki arail sohte kak wiahda wekidekla kan nan arail pelien lamalam, irail pwihn kapw wet uhd iangala kaun akan nan palien Asia oh Africa pwehn tepida “wia arail doadoahk en misineri nan United States.”
Dahme kahrehda irail misineri en Africa, Asia oh Latin-America kan kin kalohk ong irail akan nan wehin Europe oh North America me wia sahpw ekei me direki Kristian kan?
Ihs me Pahn Kapitala Ihs?
Sounpahr pahepwiki dower powe, ni ahnsou me irail misineri en Europe akan nantihong lelohng wasa kan me irail mehn Europe teikan kin pil kousoanlahr ie me iei nan Africa, Asia, Pacific oh South America. Arail mehn akadei iei en nantihong pwe irail akan me dene re sohte kin kamehlele Koht de Paipel en kak iangala arail pelien lamalam. Kedekedeo, irail mehn Amerika kan iangala pwihn wet oh alehda kaweid me dene e poahsoankihda padahk en Kristian oh mwuhr irail uhd pein wiahla arail pelien lamalam me kohseli nan sampah pwon pwehn kahrehiong meteikan en uhd iangirailla. Kahrehda koasoandi pil wekilahr pwe emente pein nda me irail me konehng padahki meteikan.
Andrew Walls, emen ohl me iang wiahda oh kin katanga palien roporop me kin pid duwen Kristian akan me mihmi likin Amerika koasoia: “Tepin wasa me irail me dene irail Kristian akan kihla arail padahk ie, ni ahnsou wet, e wekilahr.” Pwe, nan pahr 1900, persent 80 en irail akan me dene irail Kristian akan kin kohsang Europe de North America. Ahpw, rahnwet, persent 60 en irail akan me dene irail Kristian kan mihmi nan Africa, Asia, oh Latin America. Ehu ripoht kapw kasalehda me “Sarawi Kadolik nan Europe kin ale sawas sang kaun en lamalam kan nan Philippines oh India,” oh “emen sang nan kaun en lamalam wenemen en Amerika kin kohsang nan sahpw teikan likin Amerika.” Irail tohnkaudok en Prohs kan nan Africa me keseulahng Netherlands sang nan kahnimw en Ghana kin kilangwong pein irail nin duwen “misineri kei me mihmi nan sahpw me sohte kin katapanki mehkan me ngenin.” Oh pelien lamalam wet me pil mih nan Brazil kin wiahda koasoandi kan pwehn kangoange aramas en iangala irail nan Britain. Emen soun nting kasawihada me: “Irail kan me dene irail misineri kan wekilahr arail mehn akadei me re nantihong wiahdahr nin tepio.”
Uhpene Pahn Wiawi Nanpwungarail Ehu Rahn
Mwein sahpw akan nan Europe oh North Amerika pahn anahne misineri kan ehu rahn. Ehu makisihn me kin koasoia nuhs kasalehda me “nan Scotland, malaulau sang persent 10 kin kaukaule kohla sarawi.” Nan France oh Germany, pil inenen malaulau me kin iang sarawi. Roporop kasalehda me “mpen persent 40 en mehn Amerika oh persent 20 en mehn Canada kan kin kaukaule iang sarawi. Ahpw weksang met, nan sapwen Philippines, roporop kasalehda me kerenieng persent 70 kin iang sarawi, oh met pil mehlel nan sahpw laud teikan me wia kekeirada nan palien mwohni oh dipwisou kan.
E pil sansal me irail me kin kohla sarawi nan sahpw kan en pali kapi kin pidada laud nan palien tiahk laudsang irail kan me mih nan sahpw akan en pali powe. Karasepe, nan United States oh Europe, irail wia roporop ong irail me iang Kadolik oh irail diarada me Kadolik kan sohte kin likih kaun en lamalam akan oh irail mwahuki tohnmwomwohdiso en pidada mwekid en mwomwohdiso oh irail men lih akan en ahneki pwung en pidada soahng tohto duwehte me ohl kan kin wia. Ni pali teio, Kadolik kan nan sahpw en palieir nan sampah, kin utungada soahng koaros me sarawi koasoanehdi, re sohte kin kihda pein arail madamadau ong ire kan me sarawi koasoanehdier. Ni utuht en sarawi eh kohsangehr nan sahpw akan me mih pali powe en sampah oh uhd kohlahngehr sahpw kan me mih palieir en sampah, met kasalehdahr me pingiping pahn wiawi ni ahnsou kohkohdo. Philip Jenkins, emen me sukuhl laudki palien poadoapoad oh sarawi, kasalehda: “E kakete pahr eisek de rieisek sang met irail me dene irail Kristian kan nan palieir oh pali powe en sampah pahn uhpene pwe emente pahn kilangwong mehteio nan duwen pwihn ehu me sohte warohng en adaneki Kristian.”
Andrew Walls koasoia: “Ni atail kin kilang soangen mwekid pwukat peidek kesempwal ehu kin kohda: ‘Iaduwen mehn Asia, Latin America, North America oh Kristian nan Europe arail pahn kak mihpene nan ehu ihmw sarawi oh ahneki pwoson teieu.” Ia ahmw madamadau? Sarawi kan pahn kak mihmihte nan sampah liaktohrohr wet? Ia poahsoanpen miniminpenehn Kristian mehlel akan? Irail Sounkadehdehn Siohwa kan pahn perenki kihda pasapeng sang Pwuhk Sarawi ong peidek pwukat oh re pahn pil kaselehwei mehn kadehde sansal me mie ehu pwihn en Kristian me kin miniminpene ni mehlel oh miher wasa koaros nan sampah.
[Kilel nan Pali 4]
Ihmw sarawi en mahs wet wiahlahr wasahn mwenge me aramas akan kin kohla koul ie
[Kilel Credit]
AP Photo/Nancy Palmieri