Wia Me Mwahu Ni Ahnsoun Anahn
WAHNPOARON Pohl kihda mahsen en kangoang ni e mahsanih, “Eri, nindokon eh mie atail ahnsou, kitail en wia mwahu ong aramas koaros; ahpw mehlel ong irail kan me kisehn atail pwoson.” (Kalesia 6:10) Sounkadehdehn Siohwa kan nan sampah pwon kin pwerisek nannanti en kak doadoahngki kaweid wet nan arail mour, wia mwahu ong aramas koaros, ahpw mehlel iengerail me pwoson akan. Met kin kalap wiawi ni ahnsou me anahn kin pwarada. Kitail tehkpene mahs karasepen wehi riau.
Nan December 2002, melimel kehlail ieu lel Guam, oh kisinieng kehlailki mwail 190 awa ehu. Ihmw tohto ohla oh ekei mweredi douluhl. Mwomwohdiso kan wasao mwadangete kohpene oh sewese peneinei en Sounkadehde kan oh kamwakelehda imwen irail oko me arail wasa uhdahn ohla. Branch en Guam kihda dipwisou oh aramas en onehda sapahl ihmw akan, oh Branch en Hawaii pil kihda sawas. Ni erein wihk keite pwihn en daiksang ieu peidi sang Hawaii pwe ren iang sewese kauwada ihmw akan me ohla, ekei brother kan nan Guam pil kommoal sang doadoahk pwe ren kak iang sawas. Ngenen minimin ni peren wet pil wia kalohk mwahu ong kousoan koaros nan wasao.
Nan pahr en kalohk nekier, aramas tohto nan Mozambique lelohng ngalangaladahn pihl akan oh kahrehda duhpek pwe wahn sahpw akan ohla. Branch ohpis en Sounkadehdehn Siohwa kan nan wasao mwadangete kihda sawas en mwenge ong irail akan me apwal. Nehnehn mwenge wiawi ni Kingdom Hall akan, ekei pak mwurin mihding kan. Emen sister me sohte pwopwoud ahpw mie nah seri koasoia: “I kin pahtou kohdohng wasahn mihding, oh sohte ese dahme I pahn kamwengehki nei seri kan, ni aht pahn pwurala ni imwato.” Ihme e nda, “Likamwete I iasada”!
Sounkadehde kan pil kin “wia dahme mwahu” ni irair en pali ngehn ni arail kin ehukihong meteikan mahsen en kamweit oh kakehlepen koapworopwoar sang nan Pwuhk Sarawi. Irail ahneki pwoson duwehte ohl loalokong en kawao me mahsanih: “Duwehte aramas emen me kin karonge erpit en Koht, e pahn mihmi nan irair en meleilei oh sohte pahn kedirepwiki kamasepwehk en ahnsou apwal.”—Lepin Padahk 1:33, NW.
[Kilel nan Pali 31]
1, 2. Nehnehn mwenge kohwong aramas akan me lelong kahpwal akan nan Mozambique
3, 4. Melimel nan Guam me kauwehla ihmw tohto
[Kilel Credit nan Pali 31]
Seri, left: Andrea Booher/FEMA News Photo; liho, powe: AP Photo/Pacific Daily News, Masako Watanabe