Ahmw Kapakap kan kin Katapan?

IHS nanpwungatail me saikinte lelohng irair apwal ieu me kitail sohla kin kakohng? Pwuhk Sarawi kasalehda me wahnpoaron Pohl ese me kapakap kak sewesehda imwilahn soangen apwal duwehte met.

Ahnsou me Pohl selikihdi karaunlikamw nan Rom, e peki rehn ienge me pwoson akan en kapakapki ih ni ah mahsanih: “I peki rehmwail en wia met, pwe ien kak mwadang pwuruwohng kumwail.” (Ipru 13:18, 19, NW) Pil ehu pak, Pohl kadehdehda ah koapworopwoarki me Koht pahn ketin sapeng kapakap akan me pid en mwadang lapwada sang nan imweteng. (Pailimwon 22) Mwurin mwo, Pohl mwadangete kasaledekla oh pil pwurehngehr wiewia ah doadoahk en kalohk.

Ahpw iaduwen, kapakap kin kak uhdahn wekidala ahmw kahpwal akan? Mwein. Ahpw, kitail kak tamataman me kapakap kaidehn wiepen sarawi ieu me kin mihte ni mwohmw. E kin wia irair en koasoakoasoipene mehlel ieu nanpwungen kitail oh Samatail nanleng me sapwellimaniki limpoak oh manaman. Kitail en dehr perki en oaritik nan atail kapakap akan ahpw mwuri kitail en kanengamah oh awiawih oh kilang ia mwomwen Siohwa ah pahn ketin wia pasapeng.

Koht kakete sohte ketin wia pasapeng ni ahl me kitail peki, de ni ahnsou me kitail kin kasik. Karasepe, Pohl ngidingid wia kapakap me pid “teken tuhke me mih nan uduke.” Koht sohte ketikihweisang ahn Pohl kahpwalo, ahpw e ketin kameleileiki kapehden Pohl mahsan pwukat: “Ei kalahngan itarohng uhk; pwe ei manaman kin sansalda mehlel rehn me luwet akan.”​—2 Korint 12:7-9.

Pil kitail kak koapworoapwoarki me edetehn Koht sohte pahn ketin ketikihweisang kahpwal ehu, e kak ketikihda ahl en pitsang ni kitail en kak kanengamahiong.” (1 Korint 10:13) Ehu ahnsou mwuhr, Koht pahn ketikihweisang en aramas kapwunod koaros. Ahpw nan ahnsouwet atail kin sohpeilahng “Sounkaronge kapakap.”​—Melkahka 65:2.