“Kosonned En Siohwa” Sohte Kak Likamw

“I pahn kasalehda duwen kosonned en Siohwa; E mahsanihong ie: ‘Kowe nei pwutak . . . Peki rehi, a I pahn kihong uhk wehi kan koaros.’ ”​—MELKAHKA 2:7, 8.

1. Wekpeseng dah me mie nanpwungen sapwellimen Koht koasondi oh koasondi en wehi kan?

MIE sapwellimen Siohwa Koht koasoandi ong aramas oh sampah. Pil mie sapwellime koasondi ong wehi kan. Ahpw, ia uwen koasoandi pwukat ah nohn wekpeseng! Kitail uhdahn pahn kasik met pwe Koht ketin mahsanih: “Duwehte lahng kan, ahr ileilehsang sampah, pil ai ahl akan me ileile sang amw ahl akan, oh ai madamadau kan sang ahmw madamadau kan.” Sapwellimen Koht koasoandi uhdahn pahn pweida, pwe e pil mahsanih: “Duwehte keteu mwoasul ah kin mweredi, oh iangahki sinoh, sang nanleng kan oh sohte kin pwuralahng wasao, ma e sohte kadirehla nan pwelen sampah oh wiahiong tuhke en wos oh wah, oh kihong weren tuhke ong soumwet emen oh pilawa ong me pahn kang, iei pil duwen ai Mahsen me kin kepwilipwilwei sang nan dauwesei pahn uhdahn mwehlel. E sohte pahn pwurodohng ie ahpw sohte kihda wah mwahu kan, ahpw e pahn uhdahn wiahda dahme I kin kupwurpereniki, oh e uhdahn pahn pweida mwahu dahme I kapilkihwei.”​—Aiseia 55:9-​11.

2, 3. Dahme sansal nan keriau en melkahka, ahpw peidek dah kan me pwarada?

² Nan Melkahka irelaud riau e sansal mwahu me sapwellimen Koht koasoandi me pid sapwellime Nanmwarki Mesaia uhdahn pahn pweida. Ih me wiahda koulo, Nanmwarki Depit mehn Israel, ale manaman en ngehn sarawi en kohpada me pahn mie ahnsou ehu, ahnsou me wehi kan pahn mih nan irair en pingiping. Arail kaun akan pahn uhwongada Siohwa Koht oh sapwellime Me Keidio. Ahpw soun melkahkaho pil koulki: “Mweidong ie ien tehk sapahl sapwellimen Siohwa kosonnedo, e mahsanihong ie: ‘Kowe nei pwutak . . . Peki rehi, a I pahn kihong uhk wehi kan koaros, oh ke pahn limankihla sampah pwon.’ ”​—Melkahka 2:7, 8.

³ Ia wehwehn “kosonned en Siohwa” ong wehi kan? Iaduwen ah pahn pidada tohn sampah koaros? Ni mehlel, dahme “kosonned en Siohwa” ong wehi kan kin wiahiong irail me kin lahn Koht akan ni ar kin wadek Melkahka irelaud riau?

Wehi kan Mih Nan Irair en Pingiping

4. Iaduwen ahmw pahn oaralapiada ire kesempwal kan nan Melkahka 2:1, 2?

⁴ Me pid wiewiahn wehi kan oh ahr kaun akan, sounmelkahka ah koul oh nda: “Dahme wehi kan koasoakoasone re en ketiwohkihla? Oh wehi kan kin wia koasoi soh-katepe dahieu? Ar nanmwarki kan kahngohdilahr; ar kaun akan koasoakoasone nanpwungarail re en uhwong Siohwa oh pil uhwong sapwellime me keidio.”​—Melkahka 2:1, 2, NW.a

5, 6. Dahme pwihn en wehi kan kin “koasoakoasone” oh “wia koasoi soh-katepe kan?

⁵ “Soh-katepe” dahieu me pwihn en sampah kin “koasoakoasone nanpwungarail”? Irail sohte kin men pohnese sapwellimen Koht Me Keidio​—Mesaia, de Krais⁠—ahpw wehi kan kin “koasoakoasone,” de medemedewe me arail kaunda pahn mihmi kohkohlahte. Mahsen oko nan keriau en melkahka kan pil mie wehwe ong irail akan nan senturi keieu C.E. ahnsou me kaun akan en mehn Suhs oh mehn Rom miniminpene pwehn kemehla Nanmwarki me Koht ketin idiadao, Sises Krais. Ahpw, pweida laud en kokohp tepida pweida nan pahr 1914 ahnsou me Sises ketin sepwilda oh wiahda nanmwarki nanleng. Sangehr ahnsowo, solahr ehu pwihn en politik nan sampah pohnese sapwellimen Koht Nanmwarkio me sepwildahngehr nan mwoale nanleng.

⁶ Ia wehwehn ahnsou me soun melkahkaho peidek ki ‘dahme wehi kan kin wia koasoia soh-katepe’? Arail koasoandi me soh-katepe oh sohte pahn pweida. Irail sohte kak wahdo popohl ohng sampah wet. Ahpw, irail doulahte oh uhwong kaunda sarawio. Ni mehlel, irail miniminkihpene lemei oh patpene uhwong Ih me Keieu Lapalapo oh iangahki sapwellime Me Keidio. Ia uwen arail nohn pweipwei!

Sapwellimen Siohwa Nanmwarki Kehlailo

7. Ong kapakap, iaduwen sapwellimen Sises werek kan doadoahngki Melkahka 2:1, 2?

⁷ Sapwellimen Sises werek ko doadoahngki mahsen akan en Melkahka 2:1, 2 ong ih. Ni arail lelohng kamakam pwehki arail pwoson, sapwellime werek ko eri kapakapki: “Maing, Kaun [“Siohwa,” NW], oh Sounwiepen lahng, sampah, oh sehd, oh audeparail kan koaros! Sapwellimomwi ngehn sarawi mahsendohng kiht rehn sapwellimwomwi ladu Depit, samat kahlapo, ni eh patohwan, ‘Dahme mehn liki kan lingeringerkihki, dahme aramas akan wiewiahki arail koasoandi soh-katepe? Nanmwarki kan en sampah onopadahr pein irail, oh kaun akan pokonpenehr pwe re en pelian Siohwa oh sapwellime me keidio.’ Pwe mehlel Erod [Antipas] oh Pontius Pailet, iangahki mehn liki kan oh mehn Israel kan, pokonpenehr nan kahnimw wet oh peliandahr Sises, sapwellimomwi Ladu sarawi, me komwi ketin kasapwiladahngehr Mesaia.” (Wiewia 4:24-​27; Luk 23:1-​12)b Ei, mie uhwong mwersuwed me koukoulahng sapwellimen Koht ladu keidio Sises nan keieun senturi. Ahpw, melkahka wet pil awiawih ehu pweidahn kokohp sounpar epwiki kei mwuri.

8. Iaduwen Melkahka 2:3 kin kadoadoahk ong wehi kan en nan rahnwet?

⁸ Ni ahnsou me wehin Israel en kawao mie arail nanmwarki, me duwehte Depit, wehin liki kan oh kaun akan pokonpene oh pelian Koht oh sapwellime nanmwarki keidio. Ahpw, iaduwen nan atail ahnsou? Wehi kan en rahnwet sohte men peikiong kosonned akan en Siohwa oh Mesaia. Kahrehda, likamwete re kin nda: “Kitail kasaledengkitailla sang pahn ara kosonned, oh kesehweisang kitail ara manaman!” (Melkahka 2:3) Soahng soh lipilipil me Koht oh sapwellime me keidio pahn inapwih, kaun akan oh wehi kan pahn uhwong. Ahpw, posongosong koaros me re pahn wia pwehn kasaledengirailla pahn ara manaman sohte pahn pweida.

Siohwa Ketin Kumwuski Arail Koasoandi kan

9, 10. Dahme kahrehda Siohwa kin kamwusekihki wehi kan?

⁹ Siohwa sohte ketin nsenohki ahn kaunen wehi kan arail kin songen kauwada pein arail mehn uhtohradahsang kaunda en Siohwa. Melkahka irelaud riau doula oh mahsanih: “Siohwa ahpw ketin kiparamat sang nan mwoale nanleng, oh ketin kumwuski arail koasoandi kan.” (Melkahka 2:4) Koht ketilahte mwowe oh wia sapwellime koasoandi likamwete kaun pwukat sohte kesempwalparail. E ketin kiparamatiki arail saloalokong, oh ketin kumwuskin irail. Mweidong irail en pohnmwahsohki dah kan me irail men wia. Ong Siohwa irail wia sapwellime mehn kumwus. E ketin kiparamatki arail men pelianda Ih ahpw sohte kak pweida.

¹⁰ Pil wasa teikan nan pwuhken melkahka Depit kin koasoia duwen imwintihti kan oh wehi kan oh koul akan: “Komwi Maing Siohwa en karis en sounpei, iei Koht en Israel. Komw ohpala wasa oh ketin kaloke me rotorot akan; komw dehr ketin kupwurkalahngan ong me loallap suwed akan! Re kin pwurodo nin soutik, wie ngiringir duwehte kidi ni ar kin kohkohseli nan kahnimwo. Komw karonge mahs ar lokaia kepweikeng oh kamasepwehk kan. Lowarail kan duwehte kedlahs nan ewerail, re ahpw kin lemeleme me sohte me kin rong irail. Ahpw Maing Siohwa, komw kin ketin kiparamatkin irail; komw kin ketin wiahki me rotorot akan mehkot mwahl.” (Melkahka 59:5-8) Siohwa kin ketin kiparamatiki ahn wehi kan ar kin kalahn pweipweida oh kin uhwong Ih.

11. Dahme pahn wiawi ahnsou me wehi kan pahn song en pelian sapwellimen Koht koasoandi?

¹¹ Mahsen akan en Melkahka 2 kakehlaka atail pwoson me Koht kak ketin kamwahwihala kahpwal soh lipilipil. Kitail kak ahneki koapworopwor me ahnsou koaros sapwellime kupwur kan kin pweida oh sohte kin meliehla sapwellime ladu lelepek kan. (Melkahka 94:14) Eri, dahme pahn wiawi ni ahnsou me wehi kan kin song en uhwong sapwellimen Siohwa koasondi? Melkahka wet mahsanih me Koht “mahseniong irail nan sapwellime engieng,” likamwete ngilen ngiringirsek en nansapwe. Laudsang met, “nan sapwellime engieng kamasepwehk” likamwete piripir en liol, “e pahn ketin kamasepwehkinirailada.”​—Melkahka 2:5.

Sapwellimen Koht Nanmwarki Kesepwiladahr

12. Melkahka 2:6 kin dokedoke mehnia kesepwildahn nanmwarki?

¹² Dahme Siohwa mahsanih mwurin mwo ni ah ketin doadoahngki sounmelkahkao inenen kalingeringeriong wehi kan. Koht mahsanih: “I kasapwiladahr nei nanmwarki pohn ei dohl sarawio Saion.” (Melkahka 2:6) Nahna Saion iei uluhl ieu nan Serusalem wasa me Depit kesepwildahng wia nanmwarki en Israel. Ahpw Nanmwarki Mesaia sohte pahn ketidiong pohn mwoale nan kahnimwo de pil wasa tohrohr nan sampah. Ni mehlel, Siohwa ketin kasapwiladahr Sises Krais en wia Nanmwarki Mesaia nan Nahna Saion en nanleng.​—Kaudiahl 14:1.

13. Inou dah me Siohwa wia ong sapwellime Ohl?

¹³ Nanmwarki Mesaia ahnsowo mahsanih. E mahsanih: “Mweidong ie mahs en doadoahngki kosonned en Siohwa oh e mahsanih iong ie: ‘Kowe nei pwutak; oh rahnwet I wialahr semomw.’ ” (Melkahka 2:7, NW) Krais mahsanih duwen inoupen Wehio, ni ah mahsanihiong sapwellime tohnpadahk kan: “Kumwail me iang ie nan ai kalokolok kan; oh I wiahda inou ieu ong kumwail, duwen Sahmo ah ketin wiahda inou ieu ong ie, ong wehi ehu.”​—Luk 22:28, 29.

14. Dahme aramas kak ndahki me Sises sapwellimaniki lengileng en nanmwarki me sohte me kak uhwong?

¹⁴ Nin duwen kokohp en Melkahka 2:7, Siohwa ketin kasalehda me Sises iei sapwellime Ohl ni ahnsou me e papidais oh ni ah kaiasada ih ong wiahla ngehn. (Mark 1:9-​11; Rom 1:4; Ipru 1:5; 5:5) Ei, nanmwarki en Wehin Koht nanleng iei sapwellime Iehroso. (Sohn 3:16) Pwehki ih kadaudok en sohpeidi nan peneinei en Nanmwarki Depit, Sises sapwellimaniki pwung en wia nanmwarki men. (2 Samuel 7:4-​17; Madiu 1:6, 16) Nin duwen pwuhken Melkahka, Koht mahsanihong sapwellime Ohlo: “Peki rehi, a I pahn kihong uhk wehi kan koaros; oh ke pahn limankihla sampah pwon.”​—Melkahka 2:8.

15. Dahme kahrehda Sises pekihki wehi kan en wia sapwellime sohso?

¹⁵ Nanmwarkio​—Sapwellimen Koht Ohlo​—sapwellimaniki dehu ieu me ekiste mih pahnangin Siohwa. Sises iei sapwellimen Siohwa me alehier kasongosong oh kasalehdahr me e lelepek oh likilik. Laudsang met, Sises wia sapwellimen Koht Mesenih. Ni mehlel, Sises Krais “iei ih me wia kasalepen Koht me soh sansal, me wia mesenih en mehkan me kepikipikdah kan koaros.” (Kolose 1:15, NW) Ihte me e anahne wia iei en peki oh Koht pahn ‘ketikihong ih en wiahkihla ah sohso wehi kan oh wiahkihla ah irepen sampah kan.’ Sises ketin wia pekipek wet ni ah wia mehmen me kin kupwurperenki mehkan me pid nein aramas akan’ oh pwehki ah ketin kupwurki mehlel en wia kupwuren Seme nanleng me pid sampah oh towe kan.​—Lepin Padahk 8:30, 31.

Sapwellimen Siohwa Engiengih Wehi kan

16, 17. Nin duwen Melkahka 2:9, dahme wie kaukaunop ong wehi kan?

¹⁶ Pwehki melkahka irelaud riau kin pweida ahnsouwet, ahnsou en sapwellimen Sises Krais ketido ni soh sansal, dahme wie nennekidong wehi kan? Nanmwarkio pahn kereniongehr en wia dahme Koht ketin poahngoaki: “Ke pahn kauwehkinirailla sokon mete, ke pahn kamwereirailpeseng duwehte omw kin pwalangpeseng dahl pleit.”​—Melkahka 2:9.

¹⁷ Sapwellimen nanmwarki en kawa ko sokon kin wia kilelepen manaman en sohpeidi. Ekei sokon kin wiawihkihda mete, duwehte sokon me ntingdi nan melkahka wet. Lokaiahn karasaras wasaht kin kasalehda mengei en Nanmwarki Krais ah pahn kawehla wehi kan. Woak uk me e pahn wiahki sokon mete pahn pwalangpeseng dahl en sampah, oh sohte pahn kak pwurehng kapwurpwurpene.

18, 19. Pwe nanmwarki kan en sampah en kak alehdi kupwur mwahu en Koht, dahme irail anahne wia?

¹⁸ Eri iaduwen, kaun en wehin sampah kan pahn iang kadehde soangen ohla douluhl wet? Soh, pwe sounmelkahka menet wia pekipek ni mahsen pwukat: “Eri, kumwail nanmwarki kan, kumwail rong ie; kumwail kaunen sampah kan, kumwail rong duwen met.” (Melkahka 2:10) Pangoak kohieng nanmwarki kan ren peik oh doadoahngki loalokong. Irail en tehk soh katepen arail pilahn akan, me weksang mehlel dahme Wehin Koht pahn ketin wia pwe en mwahuiong tohnsampah.

¹⁹ Pwe nanmwarki en sampah kan en ale kupwurmwahu en Koht, irail anahne wekidla arail ahl akan. Kehkehlik kohieng irail en ‘papah Siohwa ni lemmwin oh rerrer ki peren.” (Melkahka 2:11) Eri, dahme pahn wiawi ma re kapwaiada met? Irail sohla pahn lelohng kahpwal de masepwehk, oh irail kakehr pereperenki kapai kan me Nanmwarki Mesaia pahn koasoanehiong irail. E pahn kesempwal ong kaun en sampah kan en uhdi sang arail pohnmwahso oh aklapalap me re kin kasalehda nan arail kaunda kan. Pil patehng met, irail anahne wekidekla mwadang ni ahnsou wet oh doadoahngki loalokong oh pohnese sapwellimen Siohwa kaunda lapalap en lahng oh sampah, me sohte mehkot pahrekiong, oh pohnese sapwellime Koht oh sapwellime Mesaia kehl me kaselel.

“Metik Sapwellime Ohlo”

20, 21. Ia wehwehn “metik sapwellime ohlo”?

²⁰ Pwuhken Melkahka irelaud 2 ahnsouwet ketikihda luhk ong kaun akan en wehi kan. Irail sohte kin kohpene pwehn uhwong, oh kaweid kohwong irail mahsanih: “Metik sapwellime ohlo, pwe Siohwa Koht en dehr engieng oh pwe ken dehr sohrala sang ahlo, pwe e kin mwadang engiengda.” (Melkahka 2:12a) Aramas akan en peikiong pahngok en Siohwa ni ah kin ketikihda sapwellime kosonned. Ni ahnsou me Koht ketin kasapwilada sapwellime ohlo nan mwoalen nanmwarki, kaun akan en sampah kan en dehr “koasoiahki mehkot me sohte-katepe.” Irail en mwadangete pohnese nanmwarkio oh kasalehong ih peik unsek.

²¹ Dahme kahrehda irail en “metik ohlo”? Ni ahnsou me melkahka wet wiewiawi, metik wia kilelepen kompoakpahneki emen, oh aramas kin wia met pwehn kasamwohdo aramas en kohdo men ong nan imwarail, wasa me re kak alehdi kadek en tohn ihmwo. Metik pil kak wia mwekid en kasalehda lelepek de loalopwoat. (1 Samuel 10:1) Nan Melkahka 2:12a, Koht ketin pangoakihong wehi kan en metik, de kasamwohdo, sapwellime Nanmwarki keidio.

22. Mehnia kehkehlik me kaun akan en wehi kan uhdahn anahne kapwaiada?

²² Irail oko me sohte kin pohnese ih me Siohwa pilada en kaunda nin duwen nanmwarki kin kansensuwedihala Siohwa. Irail sohte kin pohnese sapwellimen Siohwa Koht manaman en kaunda lahng oh sampah oh sapwellime manaman oh kehl en pilada Nanmwarki me keieu mwahu en wia kaunepen tohnsampah. Kaun akan en wehi kan pahn diarada me sapwellimen Koht engieng pahn mwadangete lelohng irail, nin doken arail nannantihong wia pein arail koasondi kan. “Sapwellime engieng kin mengei en kohda,” oh sohte me kak irehdi. Irail kaun akan en wehi kan anahne pohnese oh kalahnganki kaweid wet oh kapwaiada. Ma re wia met e pahn wehwehki mour soutuk ong irail.

23. Miemiehte ahnsou aramas akan en wia dah?

²³ Iren melkahka wet kaimwisekala oh mahsanih: “Meid pai irail kan koaros me kin wiahki Siohwa arail wasahn ruk.” (Melkahka 2:12b) Miemiehte ahnsou ong aramas akan en rapahki sawas. Pil met ritida ong irail kaun akan me kin iang utuht ong pilahn en wehi kan. Irail kak tangodohng rehn Siohwa, me pahn ketikihda wasahn ruk pahn kaundahn Wehio. Ahpw, irail anahne mwekid mwohn Wehin Mesaia kauwehla wehi kan me uhwong Ih.

24. Iaduwen kitail kak diar mour nsenamwahu mehnda ma kitail mihmi nan sampah suwed wet?

²⁴ Ma kitail pahn onop kanahieng iren Pwuhk Sarawi oh doadoahngki kaweid nan atail mour, kitail kak mourki mour nsenamwahu ahnsou wet nan sampah suwed wet. Doadoahngki kaweid en Pwuhk Sarawi pahn imwikihla peren nan peneinei oh saledek sang kapwunod oh kamasepwehk tohto kan me kadirelahr sampah. Idawehn kaweid en Pwuhk Sarawi kin kihong kitail koapworopwor me kitail kin kaperenda Sounkapikadao. Sohte emen likin Kaunen Lahng oh Sampah me kak mourkihong aramas ni mehlel “mour nan ahnsouwet oh ahnsou kohkohdo” mwurin sampah ah pahn saledeksang irail oko me kin uhwong dahme pwung ni arail kin sapwungki kaundahn Wehio.​—1 Timoty 4:8.

25. Pwehki “kosonned en Siohwa” sohte kak likamw, dahme kitail kak kasik en wiawi nan atail ahnsou?

²⁵ “Kosonned en Siohwa” sohte kak sapwung. Ni ah ketin wia atail Sounkapikada, Koht mwahngih dahme keieu mwahu ong aramas oh E pahn ketkihdo sapwellime koasondi pwehn kapaiki aramas peik kan popohl, nsenamwahu, oh mour saledek poatoapoat pahn wehin sapwellime Ohl kompoak. Me pid atail ahnsou, soukohp Daniel ntingihedi: “Eri, ni ahnsou me nanmwarki ko pahn kakaun wasa, Koht en nanleng pahn ketin kauwada mwehi ehu me sohte imwi. . . . E pahn kauwehla mwehi teikan koaros, oh pahn mihmi kohkohlahte.” (Daniel 2:44) Kahrehda, ni mehlel, met iei ahnsou me kitail en karuaru oh “metik sapwellime Ohlo” oh papah Kaun en Lahng oh Sampah, Siohwa!

[Nting tikitik me mi pahs]

Iaduwen Ke Pahn Sapeng?

• “Soh-katepe” dahieu me irail wehi kan kin “koasoakoasone”?

• Dahme kahrehda Siohwa ketin kamwuskihki wehi kan?

• Sapwellimen Koht kosonned dahieu me uhwong wehi kan?

• Ia wehwehn “metik sapwellime Ohl”?

[Kilel nan Pali 12]

Depit koulki duwen Nanmwarki Mesaia kana

[Kilel nan Pali 13]

Kaun akan oh aramas en wehn Israel wiahda pilahn suwed pwehn pelianda Sises Krais

[Kilel nan Pali 14]

Krais kasapwilada en wiahla Nanmwarki nan Nahna Saion nanleng