E Laudsang Ihte Mwadong
PWUHK me ede The Developing Child kawehwehda, “Seri kan kin perenki mwadong. Ahpw met kaidehn wiewia soh katepe ieu. Iei met me kin kakairada arail kehl en madamadau.” Ni ahnsoun mwadong, seri kan kin sukuhliki en doadoahngki arail kehl en kilang, rong, pehm, med, oh songada nemen mwenge, oh irail pil kin wehwehkihda mehkan me pidakih irailpene oh iaduwen arail pahn ehuiong aramas teikan.
Sangete ni ar sounpar pahieu de limau, seri kan pahn tepidahr mwomwehda wia doadoahk en aramas laud oh met kin wia kisehn arail mwadong. Ekei kin mwadong oh mwomwehda “kapwopwoud,” ah ekei kin mwomwehda wia “sousou en aramas mehla” oh seri kan kin kalap mwomwehda akamaipene ekei kahng wia dahme mehteio nda irail en wia. (Madiu 11:16, 17) Soangen mwomwen mwadong wet kak wia ong rehn ahneki pepehm en ahneki pwukoa me mie katepe oh serio me wie kekeirada.
Seri kan nan kilel pwukat kin mwomwehda sounpadahk en Pwuhk Sarawi oh tohnsukuhl. Met kaidehn uhdahn Pwuhk Sarawi, ahpw madamadau en ehukihong mehteikan padahk en Pwuhk Sarawi mie rehrail. Oh mehn karasepe mwahu wet wia mehkot kesempwal, pwe Sises kaweidiki sapwellime kan koaros en wia doadoahk en katohnpadahk oh padahkiong aramas akan en kapwaiada soahng kan koaros me e padahkiong irail.—Madiu 28:19, 20.
Pahpa oh nohno me neirail seri kan kin men mwomwehda wia onop en Paipel rehn aramas, de wia padahk, de kalohk sang ihmw lel ihmw kin kak pohlauliki met. E kin kalap, seri kan kin alasang dahme re kilang me aramas laud kan kin wia. Kamweit de mwadong me pid Pwuhk Sarawi me seri kan kin wia kin kasalehda me irail kin kekeirada “ki soangen elen kasukuhl oh kaweid me Kauno ketin kupwurki.”—Episos 6:4, Charles B. Williams.
Siohwa kupwurki me seri kan en iang mih nan kaudok mehlel. E mahsanihong Moses me “seri kan” en iang mih ni ahnsou me Kosonnedo pahn wadawad. (Deuderonomi 31:12) Ma seri pwulopwul kan kin ahneki pepehm me irail iang kisehn wiewia kan, eri arail mwadong kan pahn kin kasalehda met. Oh seri men me mwomwehda me ih minister en Koht oh met kin wia ewen kahk keieu oh wiahla minister men.