Ahnsoun Mwenge Kaidehn Ihte Ahnsoun Mwengehte!

ARAMAS koaros kin perenki mwenge iou. Patehng mwenge, koasoi kaperen oh patehng aramas akan me ke kin poakohng, ah met kin wiaiong kitail en wia ahnsou kansenamwahu ieu me laudsang en ihte kihsang atail duhpek. Peneinei tohto kin wiahki arail tiahk en mwohdpene mehnda ma pak ehute nan ehu rahn pwe ren mwengepene. Ahnsoun mwenge kin kihong peneinei ehu ahnsou mwahu en koasoiapene wiewia kan oh pilahn akan en rahno. Pahpa oh nohno me kin men rong dahme neirail seri kan pahn nda kin kak wehwehki madamadau oh pepehm akan en neirail pwulopwul kan. Mwurin ahnsoukis, ehupene kaperen wet ni ahnsoun mwenge pahn kihong peneinei ehu pepehm en me sohte mehkot apwal kak pwarada, pepehm en likilik oh limpoak oh me pahn katengepene peneineio.

Rahnwet, pwehki tohnpeneinei tohto kin kedirepw oh kalap sohte kak soandipene, irail kin diar me e apwal ong irail en mwohdpene oh mwengepene. Nan ekei wasa nan sampah, tiahk en wasako sohte mweidong peneinei en mwengepene oh pil ahnsou en mwenge sohte me mweimwei en koasoi. Pil ekei peneinei kin wiahki ahnsou kilang TV ni ahr kin mwengmwenge, oh met kin pirapa sang irail ahnsoun koasoia mehkan me katapan.

Pahpa oh nohno Kristian akan, kumwail en isaneki ahnsou mwahu koaros pwehn kak kangoange amwail peneinei. (Lepin Padahk 24:27) Kawao, kaweid kohwong pahpa oh nohno kan me ehu ahnsou mwahu en koasoiapene Mahsen en Koht ong neirail seri kan iei ‘ahnsou me re mwomwohd nan imwarail.’ (Deuderonomi 6:7) Ahnsou en mwohdpenehn mwenge kin kihong pahpa oh nohno ahnsou mwahu tohrohr en kakairada nan loalen neirail seri kan limpoak loal ong Siohwa oh sapwellime kosonned akan. Ni ahmw pahn kakairada irair en peren oh saledek ni ahnsou en mwenge, ke kak wiahki ahnsou wet ahnsou kaperen oh ahnsoun kakairada pali ngehn en ahmw peneinei. Ei, wiahkihla ahnsoun mwenge en kaidehn ahnsoun mwengehte!